YOTAANTSI 44
¿Onimotakerimpa Tasorentsi bieshita?
Ikoake Yioba abeshireabakaajeitya, okameetsati aparopee kitaiteri antero bieshita (jieshita). Iro kantaincha ¿iñakameetsatirompa Yioba maaroni bieshitapee? ¿Jaoka onkantyari ainijayeri Yioba akoake anteneri ikoakeri?
1. ¿Paita kaari iñakameetsatantaro Yioba aparopee bieshita?
Te iriñakameetsateroji Tasorentsi bieshita otimi tseeyantsi, aisati otimi matsitaantsi, ibieshitate kemisantashiyetachari, aisati bieshita kimoshirebentiriri kaminkari. Aparopee bieshita opoñaka yameyetarini tseenkantatsiri peerani, aisati te iriñakameetsateroji Yioba bieshita itimi amenirori suerte. Iriori ikantakeri kemisantajeitiriri: “Pinijantareajeri tseencantatsiri [...] eiro pantayetirotsi caari cameetsatatsi” (2 Corintosati 6:17).a
2. ¿Paita ikenkeshireakotirori Yioba bieshita kimoshirebentiriri atiri?
Ikantee Yioba: “Eiro ashirejeitaritsi atiri” (piñanatero Salmos 118:8). Yora tseenkantatsiri yantiro osheki bieshita kaari kameetsatatsi. Kemperi: Bieshita kimoshirebentiriri pinkatsaripee, bieshita kimoshirebentiriri soraro kamimentakerori inampi, bieshita patria aisati bieshita kimoshirebentirori bantera (1 Joa 5:21). Te iriñakameetsateroji Tasorentsi bieshita kimoshirebentiriri poritico aisati bieshita kimoshirebentiriri atiri piatsatinkari. Anterorika bieshita ampinkatsatasanotantyariri atiri, ¿jaoka inkantanentyari Tasorentsi?
3. ¿Paita kaari okameetsatanta aparopee bieshita?
Okanti Bibiria te onkameetsateji bieshita ariorika atiri “ishinquitapinita, imayempitavacaapinijeita, iquisavacaajeitaca” (1 Petero 4:3). Ara bieshitaki, ishinkita atiri aisati yantayetiro kaari kameetsatatsi. Pinkoakerika aikero pishaninkatajeari Yioba, okameetsati pinijantariero bieshitapee pitsitatsiri.
PIYOTASANOTERO YOTAANTSIKA
Tsame ayotero jaoka pinkanterori bieshita, aisati jaoka onkantyari pantero kameetsatatsiri pinkemisantantyariri Yioba.
4. Eiro pibeshireimentaro bieshita kaari iñakameetsati Yioba
Piñanatero Ejesosati 5:10 aisati pinkenketsatabakaajeitya:
Tekera panteroji bieshita, ¿paita piyoteri?
¿Yanteetirompa bieshita pinampiki? ¿Jaoka opajitari okapee bieshita?
¿Iñakameetsatirompa Yioba okapee bieshita?
¿Paita ikenkeshireakotirori Tasorentsi compereaño? Te onkanteji Bibiria peerani kemisantatsiniri yantakero iyompereañote, iro kantaincha okanti apite tseenkantatsiri yantakero iyompereañote. Piñanatero Génesis 40:20-22 aisati Mateo 14:6-10. Impoiji pinkenketsatabakaajeitya:
¿Paitakea okempetantari oka apite compereaño?
Piñanatakero okapee sankenarentsi Bibiria, ¿paita ikenkeshireakotirori Yioba compereaño?
Pibeshireimentyarorika compereaño orampa pashini bieshita kaari iñakameetsati Yioba, ¿jaoka inkantanentyari iriori? Piñanatero Éxodo 32:1-8. Impoiji pamenero SHIAKAANTSI aisati pinkenketsatabakaajeitya:
¿Paita okameetsatantari ayotero kaari inebeta Yioba?
¿Jaoka onkantyari ayotero kaari inebeta Yioba?
¿Jaoka onkantyari ayotero iñakameetsatirorika Tasorentsi bieshita?
¿Jaoka onkantyari piyotero okameetsatirika bieshita? Piyotakotero jaanika jibatakantirori bieshita aisati jaoka okantakari intantakarori.
Oka bieshita, ¿opinkatsatasanotirimpa atiri, nampitsi orampa bantera? Arojei apinkatsatasanotiri Yioba, ayotake apaniro irinti tsonkerone pomerentsitantsi.
¿Iñakameetsatirompa Tasorentsi yanteetiri bieshitaki? Okameetsati ankitete, eiro antiritsi kaari ai.
5. Paakameetsateri itsipapee atiri impinkatsatantempiri
Opomerentsitimotee eiro aijatiritsi yora beshireimentarori bieshita kaari iñakameetsati Yioba. Ariorika pinkamanteri pishaninka paita kaari pantantaro bieshita, eiro pikisatsi, irointikea piñanateri kameetsa. Piyotantyarori abishimotakerori aparo ebankaro pamenero SHIAKAANTSI.
Piñanatero Mateo 7:12 aisati pinkenketsatabakaajeitya:
Ikoakerika pishaninka irantero bieshita kaari iñakameetsati Yioba, ¿okameetsatimpa pishintsinateri eiro yantantarotsi?
Eirorika pikaratiri pishaninka irantantyarori bieshita, ¿jaoka onkantyari abirori poinijeri pinintiri pishaninka?
6. Ikoake Yioba ankimoshirejeite
Ikoake Yioba abeshireabakaajeitya jeri ashaninkapee aisati atsipabintsare. Piñanatero Itiancaneni Jesoshi 14:17 aisati pinkenketsatabakaajeitya:
Oka sankenarentsi, ¿jaoka okantari oinijee ikoake Yioba ankimoshirete?
Ikoakaakeri Yioba kemisantajeitiriri inkimoshirete. Pamenero SHIAKAANTSI piñantyariri ayemisantaririnte jaoka okantari ikimoshirejeiti antyaroiteki apatotaantsi.
Piñanatero Carashiasati 6:10 aisati pinkenketsatabakaajeitya:
¿Apintompa abeshireakayeari ashaninka bieshitaki, orampa otsipapee kitaiteri amatero abeshireakayeari?
Aparopee atiri ishintsinatabakaa impantyari irekaro ashi Navidad orampa compereañoki. ¿Pikoakempa abiro irishintsinayeetempi pimpashitantya, orampa pikoake pinkoyeero kitaiteri pimpashitantyariri pishaninka?
Osheki kemisantiriri Yioba ipashitari itomi paitapeerika kitaiteri. Timatsirika pitomi, ¿jaoka onkantyari poinijayeri pinintiri?
APAROPEE ATIRI IKANTI: “Te niyoteji jaoka opoñakari oka bieshita, apinto nokoake nobeshireantyaro jeri noshaninkapee”.
¿Jaoka pinkanteri abiro?
EIRO PIPEAKOTAROTSI
Ikoake Yioba abeshireabakaajeitya jeri ashaninkapee aisati atsipabintsare, iro kantaincha Yioba te inkoyeji abeshireimentyaro ora bieshita kaari iñakameetsati.
Paita piyotabakeri
¿Paita asampityari ayotantyarori iñakameetsatirorika Yioba bieshita?
¿Jaoka pinkantyari piyotakantyariri pishaninka te pantaneteroji bieshita yametari tseenkantatsiri?
¿Paitakea piyotakotantariri Yioba ikoake ankimoshirete?
PAMENERO PASHINIPEE
Piyotakotero bieshita kaari yanti kemisantiriri Yioba.
“¿Por qué los testigos de Jehová no celebran ciertas fiestas?” (Oka sankenarentsi otimi jw.org)
Piyotakotero paitakea kaari iñakameetsatantaro Tasorentsi ora compereaño.
“¿Por qué los testigos de Jehová no celebran los cumpleaños?” (Oka sankenarentsi otimi jw.org)
Piyoteri irijanikipee nintiriri Yioba ontimabetakearika bieshita eiro yamenirotsi oka, irointikea inkimoshiretakayeri Yioba.
Osheki kemisantatsiri te iribeshireimentyaroji Navidad. ¿Ikimoshiretakempa terika iranteroji oka?
“Encontraron algo mejor” (La Atalaya, 1 de diciembre de 2012)