Quale hè Diu ?

1. Perchè ci tocca à adurà à Diu ?

Ghjè Diu chì hà creatu tuttu. Ùn hà micca avutu inìziu è ùn averà mai fine (Salmu 90:2). Ghjè da Diu chì vènenu e bone nutìzie chì truvemu ind’a Bìbbia (1 Timuteu 1:11). È ghjè Diu chì ci hà datu a vita. Ghjè per quessa chì ùn ci vole à adurà chè ellu. — Leghje Apocàlisi 4:11.

2. Cume hè Diu ?

Nisun omu hà mai vistu à Diu perch’ellu hè un spìritu (i spiriti sò una forma di vita suprana à l’umani ; ùn anu micca corpi fìsichi è ùn càmpanu micca nant’à a terra) (Ghjuvanni 1:18 ; 4:24). Eppuru, pudemu quantunque scopre a persunalità di Diu per mezu di e cose ch’ellu hà fattu. Per esèmpiu, a diversità di i frutti è tutte e spèzie di fiori ci ampàranu ch’ellu hè pienu d’amore è di saviezza. È l’universu senza misura ci ampara ch’ellu hè putente. — Leghje Rumani 1:20.

À leghje a Bìbbia, pudemu scoprene ancu di più nant’à Diu. Per esèmpiu, ella ci dice ciò chì li piace è ciò chì ùn li piace, cum’ellu tratta l’omi è cum’ellu reagisce in certe situazione. — Leghje Salmu 103:7-10.

3. Diu hà un nome ?

Ghjesù hà dettu : « Nostru Babbu chì sì in lu celu ! Chì u to nome sia santificatu » (Matteu 6:9). Diu hà parechji tìtuli, ma nome ùn ne hà chè unu. Ssu nome ùn si dice micca di a listessa manera ind’è tutte e lingue. In corsu si dice « Ghjehova ». Ma certi dìcenu dinù « Yahweh ». — Leghje Salmu 83:18, nwt-F.

Indè parechje Bìbbie, u nome di Diu hè statu cacciatu è rimpiazzatu da tìtuli cume Signore, Eternu o Diu. Eppuru, à l’èpica, quandu a Bìbbia hè stata scritta, ci era u nome di Diu à pocu pressu 7 000 volte. Ghjesù hà fattu cunnosce stu nome à a ghjente quand’ellu li parlava di Diu. — Leghje Ghjuvanni 17:26.

Fighjà a vìdeo Diu hà un nome ?

4. Ghjehova si primureghja di noi ?

Suffrenze in lu mondu ci n’hè tant’è più. Vole dì chì Ghjehova ùn si primureghja micca di noi ? Certi dìcenu ch’ellu ci face soffre per metteci à e prove, ma ùn hè micca vera. — Leghje Ghjàcumu 1:13.

Diu hà fattu à l’umani l’onore d’avè a libertà di fà scelte. Simu di sicuru assai felici d’avè ssa libertà. Pudemu fà a scelta di serve à Diu ! (Ghjosuè 24:15). Per disgràzia, parechji scèglienu di fà u male à l’altri. Ghjè per quessa chì ci hè tante suffrenze. È Ghjehova hè adduluritu di vede ch’ellu ci hè tante inghjustìzie. — Leghje Gènesi 6:5, 6.

Ghjehova si primureghja di noi. Vole chè no càmpimu beati. Frà pocu, hà da sterpà e suffrenze è quelli chì e cagiunèghjanu. Intantu, e permette, ma hà una bona ragiò. A lezziò 8 ci ferà cunnosce sta ragiò. — Leghje 2 Petru 2:9 ; 3:7, 13.

5. Cume avvicinacci da Diu ?

Ghjehova c’incuraghjisce à avvicinacci da ellu parlenduli ind’a preghera. Si primureghja di ognunu di noi (Salmu 65:3 ; 145:18). Hè prontu à perdunacci. Rimarca i nostri sforzi per piaceli, ancu sè ùn ci la femu micca sempre. Infatti, ancu sè ùn simu micca perfetti, pudemu esse l’amichi di Diu. — Leghje Salmu 103:12-14 ; Ghjàcumu 4:8.

Ghjehova ci hà datu a vita. Ci tocca à tenelu caru più chì qualsìasi d’altru (Marcu 12:30). Cume fà vede chè vo tenite caru à Diu ? Amparendu à cunnoscelu è fendu ciò ch’ellu dumanda. Cusì, v’avvicinerete di più in più da ellu. — Leghje 1 Timuteu 2:4 ; 1 Ghjuvanni 5:3.