Appruntatevi digià oghje à campà l’alba di ssu mondu novu.
À l’orlu di un mondu novu !
Diu hà creatu a terra per chì umani ghjusti ci campèssinu in eternu (Salmu 37:29). Hà messu u primu còppiu umanu, Àdamu è Eva, in lu magnìficu giardinu d’Èdene è hà incaricatu stu còppiu è i so discendenti di cultivà a terra è di piglianne cura (Gènesi 1:28 ; 2:15).
Di sicuru, u mondu di oghje ùn hè micca u paradisu chì Diu avìa in capu. Però, u scopu di u Creatore ùn hè micca scambiatu. Cume hà da còmpielu ? Cum’è l’anu spiegatu l’artìculi di prima, ùn hà da micca distrughje a pianeta. Vole piuttostu ch’ella sìa a casa d’umani fidi. E so prumesse còmpie, cume serà a vita nant’à a terra ?
Un guvernu mundiale
Frà pocu, da u celu, u guvernu di Diu hà da guvernà l’umanità sana. Tandu, a terra diventerà un locu di benestà. I so abitanti ci camperanu in pace tutti inseme è si guderanu l’òpera di e so mani. Per esse à u capu di stu guvernu mundiale, Diu hà sceltu à Ghjesù Cristu. Ghjesù ùn serà micca cum’è i capizzoni di stu mondu, averà primura di i so citadini chì a forza di u so guvernu serà l’amore. Serà un rè pienu di buntà, di cumpassione è di ghjustìzia (Esàia 11:4).
Un solu pòpulu unitu
A naziunalità o a razza ùn sparterà più l’umani di ssa nova sucetà. L’umanità ferà pòpulu inseme, unita (Apocàlisi 7:9, 10). Tutti quelli chì camperanu nant’à a terra teneranu caru à Diu è à u so pròssimu. Piglieranu cura di a so casa, a terra, pròpiu cum’è Diu a vulìa prima, a feranu tutti inseme è in pace (Salmu 115:16).
Trà omu è natura : dinù l’armunìa
Quandu u reame di Diu guvernerà a pianeta, u Creatore ripiglierà torna a maestrìa di u clima è cusì ùn ci serà mai più catastròfe naturale (Salmu 24:1, 2). Quandu era nant’à a terra, Ghjesù hà fattu vede ciò ch’ellu era capace di fà cù a putenza chì Diu li avìa dattu. Per esèmpiu, hà appaciatu senza fà un sforzu una ventata impittuosa (Marcu 4:39, 41). Sott’à u regnu di Cristu, più nimu averà paura ch’elle accàdinu catastròfe naturale. Gràzia à u reame di Diu, ci serà torna l’armunìa ch’ellu ci era à u princìpiu trà l’omu è a natura (Osea 2:18).
Una salute perfetta è robba da manghjà à voline più
Tutti seranu in piena salute. Nimu cascherà malatu, nè cunnoscerà a vechjàia è a morte (Esàia 35:5, 6). L’ambiante serà cum’è in lu giardinu d’Èdene, pulitu pulitu è magnìficu. È cum’è in Èdene, in lu mondu novu, a terra pruducerà robba da manghjà à voline più, tutti l’abitanti di a terra si ne sazieranu (Gènesi 2:9). Cum’è l’Israèliti di l’antichità, tutti manghjeranu u so ‘pane à saziera’ (Levìticu 26:4, 5).
Una vera pace è una vera securità
Sott’à u guvernu di Diu, tutti l’umani seranu in pace, si tratteranu cù buntà è rispetteranu i diritti d’ognunu. Ùn ci serà nè guerre nè abusi di putere, è più strazii per avè u so bastanza. « Staranu ognunu sottu à a so vigna è sottu à a so fica, è ùn ci sarà più nimu pè scumpiglialli » (Michea 4:3, 4).
Una bella casa è un travàgliu piacèvule per tutti
Ogni famìglia averà a so casa è ci sterà senza avè a paura d’essene lampata fora. Di più, l’umani si guderanu tutte e so faccende, « ùn travagliaranu micca indarnu » o per nunda, dice a Bìbbia (Esàia 65:21-23).
Un insignamentu di prima trinca
A Bìbbia prumette : « A terra serà piena di a cunniscenza di Ghjehova » (Esàia 11:9, nwt-F). A nova sucetà umana serà insegnata è stradata da a tamanta saviezza di u Creatore, Ghjehova, è instruita da e maravìglie di a so creazione. L’omi ùn si ghjuveranu micca di a so cunniscenza per inventà arme o per pigliassila cun l’altri (Esàia 2:4). Ampareranu piuttostu à campà in pace l’uni cun l’altri è à piglià cura di a terra (Salmu 37:11).
Una vita chì mai finiscerà
Diu hà pigliatu u tempu d’assestà a terra affinchì ogni stonda di vita sìa una vera campa. A so brama era chì l’omi ci campèssinu per sempre (Salmu 37:29 ; Esàia 45:18). Per ghjunghje à què, hà da « riduce a morte à nunda è per sempre » (Esàia 25:8). « A morte ùn esisterà più, è ùn ci sarà più nè dolu, nè brionu, nè dulore », prumette a Bìbbia (Apocàlisi 21:4). Diu permetterà à tutti l’umani di campà per sempre, vale à dì, tutti quelli ch’ellu salverà mentre a distruzzione di ssu mondu gattivu, ma ancu tutti quelli ch’ellu risusciterà in lu mondu novu (Ghjuvanni 5:28, 29 ; Atti 24:15).
Millione di ghjente s’appròntanu digià oghje à campà l’alba di sta nova umanità. Sò imperfetti ma amparendu à cunnosce à Diu è à Ghjesù Cristu, cèrcanu à esse u ghjeneru di persone chì Diu accetterà in mondu sòiu (Ghjuvanni 17:3).
Vi piacerìa à sapenne di più nant’à ciò chì ci vole à fà per fermà in vita à a fine di ssu mondu è per campà in lu mondu novu oramai vicinu vicinu ? Allora, dite di sì à un corsu bìblicu gràtisi prupostu da i Testimoni di Ghjehova. I pudete dinù cuntattà cù u situ jw.org.