Chì avvene pè e religione ?

1. E religione sò tutte bone ?

Ci sò ghjente sincere indè tutte e religione. A bona nutìzia, ghjè chì Diu e rimarca è s’interessa à elle. Per disgràzia, parechje cose gattive sò fatte a nome di a religione (2 Curintini 4:3, 4 ; 11:13-15). L’attualità face vede chì certe religione sò ancu implicate ind’u terrorìsimu, i genucidii è e guerre. Certi capi religiosi maltràttanu i zitelli è d’altri abùsanu sessualmente d’elli. Chì afflittu per quelli chì crèdenu in Diu cù sincerità ! — Leghje Matteu 24:3-5, 11, 12.

A vera religione rende glòria à Diu, invece e farze religione fàcenu cose chì li dispiàcenu. Ampàranu idee chì ùn sò micca indè a Bìbbia, cum’è bugìe nant’à Diu è nant’à i morti. Ma Ghjehova vole chì l’omi sàppianu a verità nant’à ellu. — Leghje Ezechiellu 18:4 ; 1 Timuteu 2:3-5.

2. Cosa hà da accade à e religione ?

Anc’assai, Diu ùn si làscia micca ingannà da e religione chì dìcenu amallu, ma chì infatti àmanu u mondu di Satanassu (Ghjàcumu 4:4). Indè a Bìbbia, l’inseme di e farze religione hè chjamatu « a gran Babilònia ». Perchè ? Perchè a farza religione hè spuntata dop’u dilùviu ind’una cità chjamata Babilònia. Da quì à pocu, Diu hà da sterpà à l’ispensata e religione chì ingànnanu è fàcenu soffre l’omi. — Leghje Apocàlisi 17:1, 2, 5, 16, 17 ; 18:8.

Ghjehova ùn si scorda micca di a ghjente sincera spapersa indè e farze religione di u mondu sanu. Amparènduli a verità e racoglie ind’u veru cultu. — Leghje Michea 4:2, 5.

3. Chì li tocca à fà à a ghjente sincera ?

Ghjehova s’interessa à quelli chì àmanu ciò chì hè veru è bè. Ellu li dice di sorte di e farze religione senza aspettà. Qualchidunu chì tene caru à Diu hè prontu à scambià per piaceli. — Leghje Apocàlisi 18:4.

À u sèculu unu, a ghjente sincera hà reagitu cù una giòia tamanta quand’ella hà intesu e bone nutìzie chì predicàvanu l’apòstuli. Gràzia à Ghjehova, hà scupertu una nova manera di campà chì a rendìa di più felice è li dava un scopu è una speranza per l’avvene. Ella ci làscia un bellu esèmpiu : quand’ella hà intesu sse bone nutìzie, hà fattu passà à Ghjehova in prima in a so vita. — Leghje 1 Tessaluninchi 1:8, 9 ; 2:13.

Ghjehova accòglie ind’a so famìglia, cumposta di i so aduratori fidi, quelli chì gìranu u spinu à e farze religione. Sè vo accettate u so invitu calurosu, averete a so amicìzia, ferete parte di a so famìglia piena d’amore è riciverete a vita eterna. — Leghje Matteu 19:29 ; 2 Curintini 6:17, 18.

4. Cume Diu purterà a giòia à tutti quelli chì camperanu nant’à a terra ?

Da quì à pocu, Diu hà da fà smarì e farze religione. Eccu una bona nutìzia ! E suffrenze ùn piseranu più nant’à u mondu. Mai più ingannu è discòrdia trà l’omi per via di e farze religione. Tutti in celu è nant’à a terra adureranu uniti u solu veru Diu. — Leghje Apocàlisi 18:20, 21 ; 21:3, 4.