Quale hè Ghjesù Cristu ?

1. D’induve vinìa Ghjesù ?

Ghjesù ùn era micca cum’è l’altri umani : prima di nasce nant’à a terra, campava in celu è ghjera un spìritu (Ghjuvanni 8:23). Diu l’hà creatu u primu, eppo hà aiutatu à Diu à creà tutte l’altre cose. Ghjè u solu à esse statu creatu direttamente da Ghjehova. Ghjè per quessa chì a Bìbbia dice ch’ellu hè u so Figliolu « ùnicu » (Ghjuvanni 1:14). Hè chjamatu dinù « a Parolla » perch’ellu hè statu u Portaparolla di Diu : Ghjehova si n’hè ghjuvatu per trasmette messaghji. — Leghje Pruvèrbii 8:22, 23, 30 ; Culussesi 1:15, 16.

2. Perchè Ghjesù hè ghjuntu nant’à a terra ?

Diu hà mandatu u so Figliolu nant’à a terra : hà trasferitu a so vita indè u corpu d’una ghjòvana ghjudea vèrgine chì si chjamava Maria. Dunque, Ghjesù ùn hà micca avutu un babbu umanu (Lucca 1:30-35). Hè ghjuntu nant’à a terra 1) per insegnà a verità nant’à Diu, 2) per facci vede, pè u so esèmpiu, cume fà a vuluntà di Diu ancu indè e difficultà è 3) per dà a so vita perfetta cume « riscattu ». — Leghje Matteu 20:28.

3. Perchè avemu bisognu d’un riscattu ?

Un riscattu hè u prezzu à pagà per liberà una persona minacciata di morte (Esòdiu 21:29, 30). Oghje, s’invechja è si more. Ma ùn hè micca ciò ch’avìa privistu Diu per l’omi. Cume a sapemu ? Diu hà dettu à u primu omu, Àdamu, chè s’ellu disubbidìa, murerìa. Dunque, sè Àdamu ùn avìa micca disubbiditu, s’ellu ùn avìa micca fattu peccatu, ùn serìa mai mortu (Gènesi 2:16, 17 ; 5:5). A Bìbbia ci ampara chì a morte « hè intrut[a] » in u mondu colpu à Àdamu. Hà trasmessu à tutti i so discendenti u peccatu è u casticu di u peccatu : a morte. Avemu dunque bisognu d’un riscattu per esse liberati di a cundanna à morte ch’avemu avutu in làscita da Àdamu. — Leghje Rumani 5:12 ; 6:23.

Quale pudìa pagà ssu riscattu è liberacci di a morte ? Quandu si more, si paga solu pè i so peccati. Dunque, nisun omu imperfettu pò pagà pè i peccati di l’altri. — Leghje Salmu 49:8, 9.

4. Perchè Ghjesù hè mortu ?

Ghjesù ùn era micca cum’è noi : era perfettu. Ùn hà mai fattu peccatu. Dunque, ùn avìa micca bisognu di more pè i so peccati. Ghjè pè i peccati di l’altri ch’ellu hè mortu. Diu hà fattu vede u so amore tamantu per l’omi : hà mandatu u so Figliolu nant’à a terra more per noi. Ancu Ghjesù hà fattu vede u so amore per noi : hà ubbiditu à u so Babbu è hà datu a so vita pè i nostri peccati. — Leghje Ghjuvanni 3:16 ; Rumani 5:18, 19.

Fighjà a vìdeo Perchè Ghjesù hè mortu ?

5. Chì face Ghjesù oghje ?

Quandu Ghjesù era nant’à a terra, hà guaritu i malati, hà resu a vita à i morti è hà aiutatu a ghjente chì avìa difficultà. Cusì hà fattu vede ciò ch’ellu ferà à l’avvene per tutti l’omi chì ubbidìscenu à Diu (Matteu 15:30, 31 ; Ghjuvanni 5:28). Dopu a so morte, Diu li hà resu a vita cume spìritu (1 Petru 3:18). Poi, hà aspettatu « à a diritta di Diu » fin’à chì Diu li dessi u putere di guvernà nant’à a terra sana (Ebrei 10:12, 13). Oghje, ghjè Rè in celu. I so discìpuli fàcenu cunnosce ssa bona nutìzia nant’à a terra sana. — Leghje Daniellu 7:13, 14 ; Matteu 24:14.

Da quì à pocu, Ghjesù hà da ghjuvassi di u so putere di Rè per sterpà tutte e suffrenze è quelli chì e cagiunèghjanu. Tutti quelli chì anu fede in ellu è chì li ubbidìscenu camperanu in un paradisu nant’à a terra. — Leghje Salmu 37:9-11.