Zob
3 Apre sa, Zob ti konmans koze e modi sa zour ki i ti ne.* 2 Zob ti dir:
3 “Plito sa zour ki mon ti ne pa ti egziste,
Ni sa lannwit kot dimoun ti dir: ‘En garson in ne!’
4 Ki sa zour i vin fernwanr.
Ki Bondye lesyel i oubliy sa zour
E lalimyer pa klere sa zour.
5 Ki sa pli gro fernwanr* i anvai sa zour.
Ki en nyaz lapli i kouver li.
Ki fernwanr i kasyet lalimyer sa zour.
6 Ki sa lannwit i vin konpletman fernwanr.
Ki napa lazwa sa zour swar parey lezot zour dan lannen
E ki sa lannwit pa ganny konte parmi bann mwan.
7 Plito personn pa ti ne pandan sa lannwit
E personn pa ti kriy avek lazwa sa zour swar.
8 Ki bann ki modi sa zour i modi sa lannwit,
Sa bann ki kapab lev Levyatan.*
9 Apre soley kouse ki bann zetwal i vin sonm,
Ki lannwit i kontinyen esper lizour anven
E ki i pa vwar bann reyon soley granmaten.
10 Parski i pa ti ferm laport vant mon manman,
Ni anpes mwan vwar maler.
11 Akoz mon pa ti mor ler mon ti ne?
Akoz mon pa ti mor ler mon ti sorti dan vant mon manman?
12 Akoz mon manman ti met mwan lo son zenou
E donn mwan tete?
13 Alor si mon ti’n mor, mon ti pou alonz anpe,
Mon ti pou pe dormi e repoze
14 Avek bann lerwa lo later ek zot bann konseye
Ki ti konstri bann landrwa ki aprezan in ganny abandonnen.*
15 Mon ti pou avek bann prens ki ti annan lor
Ki zot lakaz ti ranpli avek larzan.
16 Akoz mon pa ti parey en pti baba ki’n mor dan vant son manman,
Parey bann zanfan ki pa’n zanmen vwar lalimyer?
17 Laba, menm bann move dimoun i reste trankil
E bann ki epwize i repoze.
18 Laba, tou bann prizonnyen i dan trankilite
E zot pa tann lavwa bann ki fors zot pour travay.
19 Laba, dimoun pti konman gran i egal
E lesklav i ganny libere avek son met.
20 Akoz Bondye i fer lalimyer klere lo sa enn ki pe soufer
E donn lavi bann ki soufer en kantite?*
21 Akoz zot anvi mor, me lanmor pa vini?
Zot rod lanmor plis ki bann trezor kasyet,
22 Zot ki dan en kantite lazwa
E ki ere ler zot al dan latonm.
23 Akoz Bondye i donn lalimyer en dimoun ki’n perdi son semen
E ki Bondye in bar li partou kote?
24 Parski dan plas manze mon soupire
E parey delo i devide, mon zis plennyen.
25 Parski sa ki mon ti per in arive,
Sa ki ti fer mwan ganny lafreyer sanmenm ki’n ariv mwan.
26 Mon napa ni lape, ni trankilite, ni repo
Akoz maler pe kontinyen ariv lo mwan.”