Izai
29 “Maler pour Ariyel!* Wi, Ariyel, sa lavil kot David ti kanpe!
Kontinyen lannen apre lannen.
Kontinyen fer zot bann lafet tou le-z-an.
2 Me mon pou fer Ariyel soufer.
I pou dan dey, i pou sagren
E i pou vin parey sa landrwa kot zot alim dife lo lotel Bondye.
3 Mon pou met mon kan toultour ou.
Mon pou fer en baraz avek dibwa e mon pou anserkle ou.
Mon pou konstri bann keksoz pour mwan anserkle ou.
4 Ou pou ganny imilye.
Ou pou ganny zete ater e ler ou pou koze,
Dimoun pa pou tann byen sa ki ou dir akoz lapousyer.
Ou lavwa pou sorti ater
Parey lavwa en dimoun ki kominik avek bann ki’n mor
E sa ki ou dir pou parey en pti son dan lapousyer.
5 Lafoul ou bann lennmi* pou parey lapoud fen,
Lafoul bann diktater pou parey lapay dible ki pe anvole dan divan.
Sa pou ariv en sel kou, byen vit.
6 Zeova Sef larme pou sov ou
Avek loraz, tranblemandter ek en gro tapaz
E osi avek tanpet divan, tanpet ek laflanm dife ki bril tou keksoz.”
7 Alor, sa bann nasyon ki pe lager avek Ariyel,
Setadir, tou sa bann dimoun ki pe lager avek li,
Bann latour ki’n ganny konstrir pour atak li
Ek sa bann dimoun ki pe fer li soufer,
Pou vin parey en rev, parey en vizyon aswar.
8 Wi, i pou parey ler en dimoun ki lafen i reve ki i pe manze,
Me ler i leve i lafen*
E i pou parey en dimoun ki swaf i reve ki i pe bwar en keksoz,
Me ler i leve, i fatige e i swaf.*
Sanmenm sa ki pou arive avek sa bann nasyon
Ki vin lager avek Montanny Siyon.
9 Zot pou etonnen e sirprann.
Ferm zot lizye pour zot pa vwar nanryen.
Zot sou, me pa akoz zot in bwar diven.
Zot pe drive, me pa akoz zot in bwar lalkol.
10 Parski Zeova in fer zot tonm dan en profon sonmey.*
I’n ferm zot lizye, bann profet
E i’n kouver zot latet, bann dimoun ki ganny vizyon.
11 Pour zot, tou vizyon i parey bann parol dan en liv ki’n ganny sele. Ler zot donn sa liv en dimoun ki konn lir e zot dir li: “Silvouple, lir sa byen for,” i pou dir: “Mon pa kapab, parski sa liv in ganny sele.” 12 Ler zot donn sa liv en dimoun ki pa kapab lir e zot dir li: “Silvouple, lir sa,” i pou dir: “Mon pa kapab lir.”
13 Zeova i dir: “Sa pep i ador mwan avek zot labous
E zot onor mwan avek zot labous,
Me zot leker i vreman lwen avek mwan.
Zot annan en gran respe pour mwan zis akoz bann komannman zonm ki zot in ganny ansennyen.
14 Alor, mon menm mwan sa Enn ki pou fer bann keksoz merveye ankor pour sa pep,
Mon pou fer en kantite keksoz merveye.
Zot bann dimoun saz pou nepli annan lasazes
E zot bann dimoun ki pridan pou nepli entelizan.”
15 Maler pour bann dimoun ki fer tou sa ki zot kapab pour kasyet zot bann plan* avek Zeova.
Zot fer zot bann keksoz dan fernwanr
E zot dir: “Lekel ki vwar nou?
Lekel ki konn sa ki nou pe fer?”
16 Gete ki mannyer zot devir keksoz!*
Eski ou kapab dir ki en potye i parey larzil?
Eski en lobze i kapab dir sa enn ki’n fer li:
“I pa’n fer mwan”?
Eski en lobze i kapab dir sa enn ki’n fer li:
“I pa konpran nanryen”?
17 Byento, Liban pou vin en plantasyon pye fri
E sa plantasyon pou ganny konsidere konman en lafore.
18 Sa zour, sa dimoun ki sourd pou tann parol ki dan sa liv
E sa dimoun ki aveg pou nepli dan fernwanr, zot pou vwar kler.
19 Bann dimoun ki annan limilite pou vreman zwaye akoz Zeova
E bann dimoun pov pou kontan akoz sa Enn ki Sen Izrael.
20 Parski i pou nepli annan diktater,
Sa enn ki vantar pou nepli la
E tou dimoun ki pare pour fer sa ki mal pou ganny detrir,
21 Wi, sa bann dimoun ki koz manti pour kondann lezot dimoun,
Ki met latrap pour bann dimoun ki defann* lezot dimoun kot baro lavil
E ki dir bann keksoz ki pa fer sans zis pour anpes en dimoun ki fer sa ki byen* ganny lazistis.
22 Alor la sa ki Zeova, sa Enn ki ti sov* Abraam, i dir bann desandans* Zakob:
“Zakob pou nepli onte
E son figir pou nepli vin pal.*
23 Parski ler i vwar son bann zanfan otour li,
Son bann zanfan ki mon’n fer,
Zot pou sanktifye mon non.
Wi, zot pou sanktifye sa Enn ki Sen Zakob
E zot pou annan en gran respe pour Bondye Izrael.
24 Bann dimoun ki rebele* pou vin entelizan
E bann dimoun ki konplent pou aksepte lenstriksyon.”