Psonm
Pour direkter lanmizik. Dapre ler lanmizik “Pa anmenn maler.” En sanson David. Miktam.*
58 Si zot reste trankil, eski zot kapab koz lo ladrwatir?
Zot bann imen, eski zot kapab ziz avek ladrwatir?
2 O kontrer, zot fer plan pour fer sa ki mal dan zot leker
E zot fer vyolans dan pei.
4 Zot parol i parey pwazon bann serpan,
Zot sourd parey en kobra ki bous son zorey.
5 Sa kobra pa pou ekout lavwa son met,
Menm si son met i konn fer byen mazik.
6 O Bondye, kas ledan dan zot labous!
O Zeova, kas lanmaswar sa bann lyon!*
7 Ki zot disparet parey delo ki sek.
Ki Bondye i ploy son lark* e fer zot tonbe avek son bann fles.
8 Ki zot parey en kourpa ki fonn anmezir ki i deplase.
Parey en pti baba ki ne mor ki pa’n zanmen vwar soley.
9 Avan ki zot bann kastrol i santi lasaler pye pikan,
Bondye pou balye bann pti brans mouye e osi bann ki pe brile, konmsi dan en tanpet divan.
10 Sa enn ki fer sa ki byen pou dan lazwa akoz i’n vwar vanzans Bondye.
Son lipye pou benny dan disan bann move dimoun.
11 Alor dimoun pou dir: “Vreman i annan en rekonpans pour dimoun ki fer sa ki byen.
Vreman, i annan en Bondye ki ziz lo later.”