Izai
31 Maler pour bann dimoun ki desann Lezip pour al rod led,
Bann dimoun ki depan lo bann seval,
Bann dimoun ki annan konfyans dan bann saret lager akoz i annan en kantite saret
E bann dimoun ki annan konfyans dan bann seval lager* akoz zot for.
Me zot pa depan lo sa Enn ki Sen Izrael
E zot pa rod Zeova.
2 Me li osi i saz, i pou anmenn maler
E i pou fer sa ki i’n dir.
I pou pran aksyon kont bann move dimoun
E kont bann dimoun ki ed bann dimoun ki fer sa ki mal.
3 Me bann Ezipsyen i bann imen, zot pa Bondye.
Zot bann seval i laser, zot pa envizib.
Ler Zeova i lev son lanmen,
Nenport dimoun ki vin ede, pou tonbe
E nenport dimoun ki ganny led, pou tonbe.
Zot tou zot pou mor an menm tan.
4 Parski la sa ki Zeova in dir mwan:
“Zis parey en lyon i kriye, en zenn lyon for i kriye ler i vey sa zannimo ki i’n touye,
Ler en group berze i rasanble pour atak li
E sa lyon pa per zot lavwa
E i pa ni per bann tapaz ki zot fer,
Koumsanmenm ki Zeova Sef larme pou desann pour vin lager
Pour Montanny Siyon e pour son pti montanny.
5 Zeova Sef larme pou defann Zerizalenm parey bann zwazo i defann zot bann piti.
I pou defann li e sov li.
I pou protez li e delivre li.”
6 “Pep Izrael, retourn kot sa Enn ki zot in revolte kont li. 7 Parski sa zour, sak dimoun pou rezet son bann bondye annarzan ek son bann bondye annor ki pa vo nanryen. Zot ti fer sa bann bondye avek zot lanmen e sa ti en pese.
8 Sa Asiriyen pou ganny touye avek lepe, me pa avek lepe en dimoun.
En lepe pou touy li, me pa lepe en dimoun.
I pou sove akoz sa lepe
E son bann zonm pou ganny forse pour travay dir.
9 Son ros pou disparet akoz lafreyer
E son bann prens pou per akoz sa poto ki annan en lansenny.” La sa ki Zeova in dir,
Sa Enn ki son lalimyer* i Siyon e ki son four i Zerizalenm.