Zob
11 Alor Zofar en Naamatit ti reponn:
2 “Eski tou sa bann parol pa pou ganny reponn
Oubyen eski sa enn ki koz bokou ki annan rezon?*
3 Eski ou bann parol vid pou anpes dimoun koze?
Eski personn pa pou koriz ou si ou monk lezot?
4 Parski ou dir, ‘Mon lansennyman i pir
E mon inosan devan Bondye.’
5 Me si Bondye ti koze
E ouver son labous pour reponn ou!
6 Alor i ti pou fer ou konn sekre son lasazes,
Parski i annan en kantite keksoz pour aprann konsernan lasazes.
Koumsa ou ti pou realize ki Bondye pa anvi rapel serten ou bann fot.
7 Eski ou kapab konn bann keksoz profon konsernan Bondye
Oubyen konpran tou keksoz lo* sa Enn Tou Pwisan?
8 Lasazes i pli o ki lesyel. Ki ou pou kapab fer?
Lasazes i pli fon ki Latonm.* Ki ou kapab konnen?
9 I pli long ki later
E pli gran ki lanmer.
10 Si Bondye i pase, tyonbo en dimoun e anmenn li ankour,
Lekel ki kapab reziste li?
11 Parski i konnen ler dimoun i anbet lezot.
Ler i vwar sa ki mal, pa i remarke?
12 Me en dimoun bet pou ganny en konpran
Zour ki en bourik maron i donn nesans en zonm.
13 Si selman ou ti prepar ou leker
E priy Bondye.*
14 Si ou lanmen pe fer sa ki mal, met li lwen avek ou
E pa les sa ki move reste dan ou bann latant.
15 Alor ou pou kapab lev ou latet san okenn laont.
Ou pou reste ferm, ou pa pou per.
16 Alor ou pou oubliy ou maler.
Ou pa pou mazin li zis parey delo ki’n fini koule.
17 Ou lavi pou pli briye ki soley midi
Menm fernwanr dan ou lavi pou parey lalimyer bomaten.
18 Ou pou annan konfyans akoz i annan lespwar.
Ou pou get toultour ou e dormi an sekirite.
19 Ou pou al dormi e personn pa pou fer ou per.
Bokou dimoun pou rod ou laprouvasyon.
20 Me lizye bann move dimoun pa pou vwar kler.
Zot pa pou annan okenn landrwa pour zot sove
E zot sel lespwar pou lanmor.”