Premye liv Kronik
24 Sa ti bann group bann desandans Aaron: Bann garson Aaron ti Nadab, Abiou, Eleazar ek Itamar. 2 Me Nadab ek Abiou ti mor avan zot papa e zot ti napa garson. Eleazar ek Itamar ti kontinyen servi konman bann pret. 3 David ansanm avek Zadok ki ti en desandans* Eleazar ek Aimelek ki ti en desandans Itamar, ti organiz zot dan diferan group pour donn zot bann travay pour zot fer dan zot servis. 4 Vi ki i ti annan plis sef parmi bann desandans Eleazar ki parmi bann desandans Itamar, zot ti ganny divize dan sa fason: Bann desandans Eleazar ti annan 16 sef fanmir* e bann desandans Itamar ti annan 8 sef fanmir.
5 Zot ti osi tir osor* pour separ tou le de group, parski i ti annan bann sef pour landrwa sen ek bann sef pour sa vre Bondye parmi bann desandans Eleazar ek bann desandans Itamar. 6 Apre, Semaya garson Netanel ki ti sekreter bann Levit, ti ekri zot non devan lerwa, devan bann prens, pret Zadok, Aimelek garson Abyatar e bann sef fanmir* parmi bann pret ek bann Levit. Zot ti swazir en fanmir dan desandans Eleazar ek en fanmir dan desandans Itamar.
7 Ler zot ti tir osor, premye par ti al pour Zeoyarib, dezyenm ti al pour Zedaya, 8 trwazyenm pour Arim, katriyenm pour Seorim, 9 senkyenm pour Malkiya, sizyenm pour Miyamin, 10 setyenm pour Akos, wityenm pour Abiya, 11 nevyenm pour Zesoua, dizyenm pour Sekanya, 12 onzyenm pour Eliasib, douzyenm pour Zakim, 13 trezyenm pour Oupa, katorzyenm pour Zesebeab, 14 kenzyenm pour Bilga, sezyenm pour Imer, 15 disetyenm pour Ezir, dizwityenm pour Apizez, 16 diznevyenm pour Petaya, ventyenm pour Zeezkel, 17 venteentyenm pour Zakin, venndezyenm pour Gamoul, 18 venntrwazyenm pour Delaya e vennkatriyenm pour Maazya.
19 Sa ti bann travay ki zot ti bezwen fer dan zot servis ler zot ti antre dan lakaz Zeova dapre prosedir ki zot zanset Aaron ti’n mete, zis parey Zeova Bondye Izrael ti’n donn li lord.
20 Parmi larestan bann Levit, i ti annan Soubael ki sorti dan desandans Amram. Parmi bann desandans Soubael, i ti annan Zedeya. 21 Parmi bann desandans Reabya, i ti annan Isia ki ti sef. 22 Parmi bann Izarit, i ti annan Selomot. Parmi bann desandans Selomot, i ti annan Zaat. 23 Parmi bann desandans Ebronn, i ti annan Zeriya ki ti sef, Amariya dezyenm, Zaazyel trwazyenm, Zekameam katriyenm. 24 Parmi bann desandans Ouzyel, i ti annan Mika. Parmi bann desandans Mika, i ti annan Samir. 25 Frer Mika ti Isia. Parmi bann desandans Isia, i ti annan Zekarya.
26 Bann desandans Merari ti Mali ek Mousi. Parmi bann desandans Zaazya, i ti annan Beno. 27 Parmi bann desandans Merari, i ti annan Zaazya. Bann desandans Zaazya ti Beno, Soam, Zakour ek Ibri. 28 Parmi bann desandans Mali, i ti annan Eleazar ki ti napa garson. 29 Parmi bann desandans Kis, i ti annan Zerameel. 30 Bann desandans Mousi ti Mali, Eder ek Zerimot.
Sa ti bann desandans Levi dapre zot fanmir.* 31 Zot ti osi tir osor devan Lerwa David, Zadok, Aimelek ek bann sef fanmir* parmi bann pret ek bann Levit, parey zot frer bann garson Aaron ti fer. Fanmir sa enn ki ti pli vye ti ganny trete parey fanmir sa enn ki ti pli zenn.