Psonm
Pour direkter lanmizik. Sa sanson i devret ganny zwe avek bann lenstriman lakord. Lanmizik ek sanson Asaf.
76 Bann dimoun Zida i konn Bondye.
Son non i gran dan pei Izrael.
2 Son latant i Salenm
E son lakaz i Siyon.
3 Laba i ti kas bann fles alimen,
Boukliye, lepe ek bann zarm lager. (Sela)
4 Ou briye en kantite,*
Ou pli ekstraordiner ki bann montanny kot bann zannimo sovaz i reste.
5 Bann ki annan kouraz in ganny depouye.
Zot in mor,*
Tou bann gerye ti san defans.
6 O Bondye Zakob, parski ou’n koriz zot,
Seval ek sa enn ki dan saret lager in mor.*
7 Zis ou ki enpresyonan.*
Lekel ki kapab reziste ou gran lakoler?
8 Dan lesyel ou’n anons ou zizman.
Dimoun lo later ti per e zot ti reste trankil
9 Ler Bondye ti leve pour anmenn zizman
E sov tou dimoun ki annan limilite lo later. (Sela)
10 Parski lakoler ou lennmi pou ganny servi pour loue ou,
Menm sa dernyen keksoz ki ou lennmi i fer dan son lakoler, ou pou servi sa pour glorifye ou.
11 Fer ou bann ve avek Zeova ou Bondye e gard zot.
Ki tou bann ki otour li i anmenn zot kado avek gran respe.
12 I pou abes bann sef ki orgeye
E fer bann lerwa ki lo later annan en gran respe pour li.