Zob
21 Alor Zob ti reponn:
2 “Ekout byen sa ki mon annan pour dir,
Koumsa, sa pou konsol mwan.
3 Silvouple les mwan koze,
Ler mon’n fini koze, zot pou kapab monk mwan.
4 Eski mon pe konplent kont en zonm?
Si sa i leka, pa mon ti pou’n perdi pasyans?
5 Get mwan e zot pou etonnen.
Met zot lanmen devan zot labous.
6 Ler mon mazin sa, mon lespri i fatige
E mon lekor antye i tranble.
7 Akoz bann move dimoun i kontinyen viv,
Vin vye e vin ris?*
8 Zot zanfan i toultan avek zot
E zot vwar zot desandans.
9 Zot lakaz i an sekirite, zot pa per nanryen
E Bondye pa pini zot avek son baton.
10 Zot bann toro pa ganny okenn problenm pour reprodwir.
Zot bann bef* i ganny piti e zot piti pa mor dan vant.
11 Zot bann garson i tay deor zis parey en troupo zannimo
E zot zanfan i sotaye partou.
12 Zot sante avek tanbourin* ek larp
E zot dan lazwa ler zot tann laflit pe zwe.
14 Me zot dir sa vre Bondye, ‘Les nou trankil!
Nou pa anvi swiv ou bann komannman.
15 Lekel sa Enn Tou Pwisan ki nou devret servi li?
Ki byenfe nou pou gannyen si nou konn li?’
16 Me mon konnen ki zot napa pouvwar pour zot prospere.
Mon napa menm rezonnman* ki bann move dimoun.
17 Konbyen fwa lalanp bann move dimoun i tennyen?
Konbyen fwa maler i tap zot?
Konbyen fwa Bondye i detri zot dan son lakoler?
18 Eski zot vin parey lapay dan divan,
Parey lapay dible ki anvole dan en tanpet divan?
19 Bondye pou pini bann garson akoz sa ki zot papa in fer.
Me Bondye i devret pini li pour ki i konnen i’n fer sa ki mal.
20 Ki son prop lizye i vwar son maler
E ki li menm i bwar lakoler sa Enn Tou Pwisan.
21 Si son lavi i akoursi,*
Eski i pou fatig li avek sa ki pou arive avek son lakaz?
22 Eski en dimoun i kapab ansenny Bondye*
Ler Li menm ki ziz bann dimoun ki pli enportan?
23 En dimoun i mor ler i ankor for
Ler i anpe e i pa enkyet nanryen.
24 Ler son kwis in kouver avek lagres
E son lezo i for.*
25 Me en lot dimoun i mor dan son soufrans
San ki i’n apresye bann bon keksoz.
26 Tou le de pou alonze dan lapousyer
E zot pou ganny kouver avek moutouk.
27 Gete! Mon konn tre byen sa ki zot pe panse
E sa ki zot pe plàn pour fer mwan ditor.*
28 Parski zot dir, ‘Oli lakaz sa dimoun enportan
E latant kot sa move dimoun ti reste?’
29 Eski zot pa’n demann kestyon bann vwayazer?
Eski zot pa’n etidye o profon sa ki zot in dir*
30 Ki en move dimoun i ganny sove zour dezas
E i ganny delivre zour lakoler Bondye?
31 Lekel ki pou dir li sa ki i’n fer i mal
E lekel ki pou fer li peye pour sa ki i’n fer?
32 Ler i ganny anmennen kot simityer,
En dimoun pou vey son latonm.
33 Later dan vale* kot i ganny antere pou dou pour li
E tou bann imen pou swiv par deryer li*
Parey sa kantite ki’n al avan li.
34 Akoz zot pe donn mwan bann konsolasyon ki pa fer sans?
Tou sa ki zot pe dir mwan i bann mansonz!”