Zob
15 Alor Elifaz sa Temannit ti reponn:
2 “Eski en dimoun saz pou reponn avek bann largiman ki pa fer sans?
Oubyen eski i pou ranpli son vant avek divan sorti dan les?
3 Koriz en dimoun avek zis parol i initil
E zis koze pa anmenn okenn byenfe.
4 Ou fer dimoun perdi respe pour Bondye
E ou fer lezot pa enterese avek Bondye.
5 Ou fot ki fer ou koz koumsa
E ou servi bann parol ki anbet lezot.
6 Ou prop parol ki kondann ou, pa mwan.
Ou prop labous i temwanny kont ou.
7 Eski ou sa premye zonm ki’n ne
Oubyen eski ou ti ne avan bann montanny?
8 Eski ou tande ler Bondye i koz an sekre
Oubyen eski zis ou ki annan lasazes?
9 Ki ou konnen ki nou pa konnen?
Ki ou konpran ki nou pa konpran?
10 Parmi nou i annan dimoun ki annan seve blan e ki aze,
Bann zonm ki bokou pli aze ki ou papa.
11 Eski bann parol rekonfortan sorti kot Bondye
Oubyen bann parol dous pa ase pour ou?
12 Akoz ou les ou leker kontrol ou
E akoz ou lizye i ranpli avek lakoler?
13 Parski ou ankoler avek Bondye
E sanmenm sa ou koz dan sa fason.
14 Ki mannyer en imen i kapab pir
Oubyen ki mannyer en dimoun* i kapab drwat?
15 Gete! Bondye napa konfyans dan son bann lanz*
E i pa ni menm konsider lesyel pir.
16 Alor ki mannyer i pou annan konfyans dan en dimoun ki degoutan e move,
En dimoun ki fer sa ki mal parey i bwar delo!
17 Ekout mwan, mon pou dir ou!
Mon pou rakont ou sa ki mon’n vwar,
18 Sa ki dimoun saz in rakonte san kasyet nanryen,
Bann keksoz ki zot in aprann avek zot zanset.
19 Sa pei ti ganny donnen zis avek zot zanset
E i ti napa okenn etranze ki ti pas dan sa landrwa.
20 En move dimoun i soufer tou son lavi
E en diktater i pas dan problenm tou dilon son lavi.
21 I tann bann tapaz ki fer per.
Menm ler i annan lape, bann bandi i atak li.
22 I pa krwar ki i pou sape dan sa fernwanr.
I pou mor par lepe.
23 I al partou pour rod manze,* me kote i pou gannyen?
I konn tre byen ki sa zour fernwanr pros pour vini.
24 Ladetres ek langwas i fer li per.
Zot domin li parey en lerwa ki pare pour atake.
25 Parski i’n lev son lanmen kont Bondye li menm
E i’n esey opoz* sa Enn Tou Pwisan.
26 I antete e i atak Li
Avek son gro boukliye ki solid.
27 Son figir i kouver avek lagres
E son vant* i gro.
28 I reste dan bann lavil ki pou ganny detrir,
Dan bann lakaz kot personn pa pou reste
Ki pou vin en ta ros.
29 I pa pou vin ris e son larises pa pou ogmante.
I pa pou ganny bann propriyete partou dan pei.
30 I pa pou sape dan sa fernwanr.
Dife pou fer son pti brans sek*
E en gro divan sorti dan labous Bondye pou fer li disparet.
31 I pa devret les li ganny anbete e met son konfyans dan keksoz ki napa valer,
Parski sa ki i pou gannyen an retour pou napa valer.
32 Sa pou ariv li avan son zour
E son bann brans pa pou zanmen fleri.
33 I pou parey en pye rezen ki son rezen i grennen ler i ankor ver,
Parey en pye zoliv ki tou son fler i grennen.
34 Parski ler dimoun ki napa respe pour Bondye* i zwenn ansanm, sa pa abouti dan nanryen
E dife pou bril latant dimoun ki aksepte gous.
35 Zot fer plan pour fer ditor e zot donn nesans sa ki mal.
Zot vant i ranpli avek mansonz.”