Zob
18 Alor Bildad sa Souit ti reponn:
2 “Kan ki zot pou aret dir sa bann kalite parol?
Demontre bon zizman e alor nou pou kapab koze.
3 Akoz nou devret ganny konsidere konman bann zannimo
E konman bann dimoun bet* devan zot?
4 Menm si ou fer ou lekor ditor akoz ou ankoler,
Eski later pou ganny abandonnen
Oubyen eski en ros pou sorti dan son plas akoz ou?
5 Wi, lalimyer en move dimoun pou tennyen
E laflanm son dife pa pou klere.
6 Lalimyer dan son latant pou sirman vin sonm
E lalanp ki par lao li pou tennyen.
7 I pou nepli kapab fer bann gran lepa
E son prop konsey pou fer li tonbe.
8 Son lipye pou anmenn li dan en lasenn
E i pou ale vini ladan.
9 Son talon pou pri dan en latrap
E i pou tonm dan en pyez.
10 En lakord in ganny kasyet pour li ater
E i annan en latrap dan son semen.
11 I pou per tou sa ki otour li
E i pou dan lafreyer partou kot i ale.
12 I pou nepli annan lafors
E i pou drive* akoz maler.
13 En maladi fatal* pe manz manz son lapo
E osi son lanmen ek son lipye.
14 I’n ganny tire dan son latant kot i ti an sekirite
E i pou ganny anmennen kot lerwa lafreyer.*
15 Bann etranze pou reste dan son latant.
Souf* pou ganny fannen lo son lakaz.
16 Anba li, son bann rasin pou sek
E par lao li, son bann brans pou fletri.
17 I pou ganny oubliye lo later
E dan semen, personn pa pou konn son non.*
18 I pou ganny tire dan lalimyer e ganny mete dan fernwanr
E i pou ganny pouse lo later.
19 I pou napa zanfan, ni desandans parmi son pep
E i pou napa personn ki pou reste vivan la kot i reste.*
20 Ler son zour i arive, bann dimoun dan Was pou soke
E bann dimoun dan Les pou vreman per.
21 Sanmenm ki arive avek latant en move dimoun
Ek landrwa reste en dimoun ki pa’n konn Bondye.”