Zob
39 “Eski ou konnen kan bann kabri montanny i met ba?
Eski ou’n deza vwar bann serf pe ganny zot piti?
2 Eski ou kapab kont lakantite mwan ki zot plenn?
Eski ou konnen kan zot met ba?
3 Zot bese ler zot ganny zot piti
E zot nepli dan douler.
4 Zot piti i vin for e zot grandi dan lakanpanny.
Zot ale e zot pa retourn kot zot manman.
5 Lekel ki’n fer bourik maron* lib
E lekel ki’n delarg lakord bourik maron?
6 Mon’n fer li reste dan dezer
E bann laplenn sale in vin son landrwa reste.
7 I pa kontan tapaz lavil.
I pa tande ler en met i kriye.
8 I al partou lo montanny pour rod zerb,
I rod nenport plant ver pour li manze.
9 Eski toro maron pou pare pour travay pour ou?
Eski i pou pas lannwit dan ou park bef?*
10 Eski ou pou kapab anmar en toro maron pour li fouy en transe
Oubyen eski i pou swiv ou pour labour* later dan vale?
11 Vi ki i vreman for, eski ou pou kapab fye li
E les li fer bann travay dir pour ou?
12 Eski i pou ed ou pour fer rekolt*
E anmenn dible kot i ganny bate?
14 I kit son dizef ater
E i sof zot dan later.
15 I bliye ki lipye en dimoun i kapab kraz son dizef
Oubyen ki en zannimo sovaz i kapab kraz zot.
16 I tret son piti dan en fason brit konmsi zot pa pour li.
I pa per ki son travay i anven.
17 Parski Bondye pa’n fer li ganny* lasazes
E i pa’n donn li lentelizans.
18 Me ler i leve e bat son lezel,
I riy seval ek son kavalye.
19 Eski ou ki’n donn seval son lafors?
Eski ou’n abiy li avek krinyer* dan son likou?
20 Eski ou kapab fer li sote parey en sotrel?
Son kriye i for e i fer per.
21 I pil ater dan vale e i fyer pour montre son lafors.
I taye pour atake dan lager.*
22 Ler i annan keksoz ki fer per, i riye e i pa per nanryen.
I pa sove akoz lepe.
23 Fles dan fouro i sonnen o bor li
E bann lans i klate.
25 Ler i tann tapaz tronpet, i dir, ‘Anr!’
I santi loder lager depi dan lwen
E i tann bann komandan kriye e tapaz lager.
26 Eski i gras a ou lentelizans ki katiti* i anvole
E ouver son lezel pour al dan direksyon sid?
27 Eski ou ki donn lord leg pour anvole
E pour li fer son nik anler lo oter,
28 Pour li pas lannwit anler lo en ranpar
E reste dan son landrwa an sekirite lo en kap ros?
29 Depi laba anler, son lizye i get byen lwen
Pour rod son manze.
30 Son bann piti i sis disan
E la kot i annan en kadav, i pou la.”