Konman ki Moiz ti ganny sove

OU VWAR sa pti baba pe plere, e pe atrap ledwa sa madanm. Sa i Moiz. Eski ou konnen lekel sa zoli madanm? I en prenses Ezipsyen, fiy Faraon.

Manman Moiz ti kasyet son pti baba ziska ki i ti annan 3 mwan, akoz i pa ti oule ki i ganny touye par bann Ezipsyen. Me i ti konnen ki zot ti kapab trouv Moiz, alor annou vwar ki i ti fer pour nobou sov li.

I ti pran en pannyen e i ti aranz li byen afen ki delo pa pou kapab antre ladan. Apre i ti met Moiz ladan, e i ti depoz sa pannyen dan bann gran zerb obor Larivyer Nil. Miryam, ki ti ser Moiz ti ganny demande pour debout obor e gete ki ti pou arive.

En pti moman apre fiy Faraon ti vin bennyen dan Larivyer Nil. Toudenkou i ti vwar sa pannyen dan sa bann gran zerb. I ti apel enn son serviter: ‘Ale, al sers sa pannyen pour mwan.’ Kan sa prenses ti ouver sa pannyen, i ti vwar en zoli pti baba. Pti Moiz ti pe plere, e sa prenses ti pran pitye pour li. I pa ti oule ki i ganny touye.

Apre Miryam ti vini. Ou kapab vwar li dan sa portre. Miryam ti demann avek fiy Faraon: ‘Eski mon kapab al apel en madanm Izraelit pour pran swen avek sa pti baba pour ou?’

‘Ale,’ prenses ti dir.

Alor Miryam ti taye vitman pour al dir son manman. Kan manman Moiz ti vin kot prenses, i ti dir: ‘Pran sa pti baba e pran swen avek li pour mwan, e mon ava pey ou.’

Manman Moiz ti pran swen avek son prop zanfan. Plitar kan Moiz ti’n pli gran, i ti anmenn li kot fiy Faraon, ki ti adopte li konman son prop garson. Se koumsa ki Moiz in grandi dan lakaz Faraon.