En rwayonm ti ganny divize

Tan ki Salomon ti ador Zeova, i ti annan lape Izrael. Me Salomon ti marye avek en kantite madanm etranze e sa bann madanm ti ador zidol. Salomon ti konmans sanze dousman dousman e i ti konmans ador bann zidol li osi. Zeova ti ankoler. I ti dir Salomon: ‘Nasyon Izrael pou ganny pran avek ou fanmir e ganny divize an de. Mon pou donn sa pli gro bout enn ou serviter e ou fanmir pou diriz sa pli pti bout.’

Zeova ti fer son desizyon kler dan en lot fason osi. Enn bann serviter Salomon, Zeroboam ti lo semenn ler profet Aiya ti zwenn li. Aiya ti desir son lenz an 12 morso e dir Zeroboam: ‘Zeova pou pran rwayonm Izrael avek fanmir Salomon e diviz li an de. Pran sa dis morso parski ou pou vin lerwa dis tribi.’ Ler Lerwa Salomon ti tann sa, i ti esey touy Zeroboam! Alor, Zeroboam ti sove e al Lezip. Lerwa Salomon ti mor pli tar e son garson Reoboam ti vin lerwa. Zeroboam ti santi ki son lavi ti nepli an danze, alor i ti retourn Izrael.

Bann ansyen Izrael ti dir Reoboam: ‘Si ou tret byen lepep, zot pou fidel avek ou.’ Me bann zanmi pli zenn Reoboam ti dir: ‘Ou bezwen dir avek lepep! Fer zot travay pli dir!’ Reoboam ti plito ekout konsey son bann zanmi. I ti tret lepep dan en fason kriyel e zot ti revolte. Zot ti fer Zeroboam vin lerwa lo dis tribi ki ganny apele rwayonm Izrael. Sa de lezot tribi ti vin rwayonm Zida e zot ti reste fidel avek Reoboam. Sa douz tribi Izrael ti aprezan ganny divize an de.

Zeroboam pa ti oule son pep i al Zerizalenm pour ador Zeova vi ki sa ti dan rwayonm Reoboam. Eski ou konnen akoz? Zeroboam ti per pangar zot vir kont li e siport Reoboam. Alor i ti fer de pti bef annor e dir son pep: ‘Zerizalenm i tro lwen. Zot kapab fer zot ladorasyon isi menm.’ Bann dimoun ti konmans ador sa bann bef annor e ankor en fwa, zot ti oubliy Zeova.