Danyel dan trou lyon

En lot lerwa Babilonn ti Daryis sorti Medi. Daryis ti remarke ki Danyel ti spesyal. I ti met Danyel ansarz bann dimoun pli enportan dan sa pei. Sa bann dimoun ti zalou e zot ti anvi touy Danyel. Zot ti konnen ki Danyel ti priy Zeova trwa fwa par zour, alor zot ti dir Daryis: ‘Nou lerwa, nou devret fer en lalwa ki tou dimoun i devret priy zis avek ou. Nenport dimoun ki dezobei sa lalwa i devret ganny zete dan trou lyon.’ Daryis ti kontan sa nide, alor i ti siny sa lalwa.

Dek ki Danyel ti tann sa nouvo lalwa, i ti al kot li. Devan en lafnet ki ti ouver, i ti tonm azenou e konmans priy Zeova. Sa bann zonm zalou ti antre dan son lakaz e ti vwar li pe priye. Zot ti tay kot Daryis e dir: ‘Danyel pe dezobei ou. I priy avek son Bondye trwa fwa par zour.’ Daryis ti kontan Danyel e i pa ti anvi touy li. Tou dilon lazournen, i ti sey mazin en fason pour sov Danyel. Me menm lerwa pa ti kapab sanz en lalwa ki i ti’n sinyen. I ti bezwen donn lord son bann zonm pour zet Danyel dan trou lyon.

Sa zour swar, Daryis ti sitan trakase akoz Danyel ki i pa ti kapab dormi. Son lannmen bomaten, i ti tay kot trou lyon e dir Danyel: ‘Eski ou Bondye in sov ou?’

Daryis ti tann en lavwa. I ti lavwa Danyel! I ti dir Daryis: ‘Lanz Zeova ti ferm lagel bann lyon. Zot pa’n fer mwan okenn dimal.’ Daryis ti vreman kontan! I ti donn lord pour tir Danyel dan sa trou. Danyel ti napa en sou grife lo li. Apre, lerwa ti donn sa lord: ‘Zet sa bann zonm ki ti akiz Danyel dan trou lyon.’ Ler sa bann zonm ti ganny zete dan sa trou, bann lyon ti devor zot.

Daryis ti donn sa lord son pep: ‘Tou dimoun i devret annan en gran respe pour Bondye Danyel. I’n sov Danyel dan trou lyon.’

Eski ou priy Zeova toulezour parey Danyel?