Sermon lo Montanny

Apre ki i ti’n swazir son 12 zapot, Zezi ti desann lo montanny. I ti zwenn en gran lafoul dimoun ki ti’n rasanble. Zot ti’n sorti Galile, Zida, Tir, Sidon, Siri ek lot kote Zourden. Zot ti anmenn dimoun ki ti malad e ki ti posede par demon. Zezi ti geri zot tou. Apre i ti asize lo montanny e konmans koze. I ti eksplike ki nou bezwen fer si nou anvi vin zanmi Bondye. Nou devret realize ki nou bezwen Zeova dan nou lavi e ki nou bezwen kontan li. Me nou pa kapab kontan Bondye si nou pa kontan lezot dimoun. Nou devret bon e zis anver tou dimoun, menm anver nou lennmi.

Zezi ti dir: ‘I pa ase pour kontan zis ou bann zanmi. Ou devret osi kontan ou bann lennmi e senserman pardonn lezot. Si en dimoun i ankoler avek ou, al vwar li deswit e demann leskiz. Fer pour lezot sa ki ou ti a kontan lezot i fer pour ou.’

Zezi ti osi donn dimoun bann bon konsey konsernan larzan ek keksoz materyel. I ti dir: ‘I pli enportan pour vin zanmi Zeova ki annan en kantite larzan. En voler i kapab vol ou larzan me personn pa kapab vol ou lanmitye avek Zeova. Aret enkyet konsernan ki ou pou manze, bwar oubyen lenz ki pou mete. Get bann zwazo. Bondye i toultan fer sir ki zot annan dekwa pour manze. Traka pa pou fer ou viv en zour an plis. Pa bliye, Zeova i konnen ki ou bezwen.’

Lafoul pa ti’n zanmen tann personn koz parey Zezi. Zot bann ansenyan relizye pa ti’n ansenny zot sa bann keksoz. Akoz Zezi ti sitan en bon ansenyan? Akoz tou sa ki i ti ansennyen ti sorti kot Zeova.