Eski Bondye i en personnaz reel?
Larepons ki nou souvan tande:
▪ “I partou, dan tou keksoz. I parey divan.”
▪ “I en lafors ekstraordiner e entelizan.”
Ki Zezi ti dir?
▪ “I annan en kantite lasanm dan lakaz mon Papa.” (Zan 14:2) Dan en sans senbolik, Zezi ti koz lo Bondye konmsi i annan en lakaz oubyen en landrwa reste.
▪ “Mon’n sorti kot mon Papa, mon’n vin dan lemonn, e aprezan mon pe kit lemonn pour al kot mon Papa.” (Zan 16:28) Zezi ti konnen ki Bondye i en Personnaz reel e i annan en landrwa spesifik kot i reste.
ZEZI pa ti zanmen refer avek Bondye konman zis en lafors. O kontrer, i ti koz e priy avek Bondye. I ti souvan apel Bondye, son Papa ki dan lesyel, en term ki montre ki i ti annan en relasyon tre pros avek Bondye.—Zan 8:19, 38, 54.
I vre ki “personn pa’n deza [v]war Bondye” e “Bondye i Lespri.” (Zan 1:18; 4:24) Me sa pa vedir ki i napa okenn kalite lekor oubyen laform. Labib i dir nou: “Si i annan en lekor natirel i annan osi en lekor spirityel.” (1 Korentyen 15:44) Alor, eski Bondye i annan en lekor spirityel?
Wi. Kan Zezi ti resisite, i “ti antre . . . dan lesyel menm, pour prezant limenm devan Bondye pour nou.” (Ebre 9:24) Sa i ansenny nou de keksoz enportan lo Bondye. Premyerman, i annan en landrwa kot i reste. Dezyenmman, i en Personnaz, me pa zis en lafors ekstraordiner ki partou.
Alor, ki mannyer i posib pour Bondye azir partou? Bondye i kapab anvoy son lespri sen oubyen lafors aktif dan nenport landrwa dan liniver. Parey en papa ki fer tou sa ki i kapab pour konsol e donn sipor son bann zanfan, Bondye i servi son lespri sen pour akonplir son plan.—Psonm 104:30; 139:7.
Vi ki Bondye i en Personnaz, i osi annan en personnalite setadir i annan bann keksoz ki i kontan ek bann ki i pa kontan e i menm annan santiman. Labib i dir nou ki i kontan son pep, i trouv lazwa dan son travay, i ay idolatri e son leker i fer mal kan i vwar mesanste. (Zenez 6:6; Deterononm 16:22; 1 Lerwa 10:9; Psonm 104:31) Dan 1 Timote 1:11 i ganny apele en “Bondye beni [oubyen “ere,” NW].” I pa etonan alor ki Zezi ti dir nou kapab aprann kontan Bondye avek tou nou leker!—Mark 12:30.a
[Not anba lo paz 5]
a Pour plis lenformasyon lo sa size, vwar sapit 1 dan liv Ki Labib i vreman dir? pibliye par Temwen Zeova.
[Portre lo paz 5]
Parey en papa ki fer tou pour son zanfan, Bondye i servi son lespri sen pour akonplir son plan