Kestyon sorti kot nou lekter . . .

Eski Bondye i kontan en ras plis ki lezot?

▪ Non, sa pa le ka. Labib i dir klerman: “Bondye pa fer preferans pour personn, me dan nenport ki nasyon tou dimoun ki annan respe pour li e ki fer sa ki byen Bondye i kontan li.”​—Akt 10:34, 35.

Pwennvi Bondye dan sa domenn i bokou pli siperyer ki pour bann imen enparfe. Bokou dimoun i krwar ki en ras (normalman zot ras) i pli siperyer ki lezot. Sa kalite pwennvi i parey pour Charles Darwin ki ti ekrir: “A lavenir, . . .  bann ras imen ki sivilize pou preski elimin e ranplas bann ras sovaz.” Malerezman, bokou dimoun in vreman ganny viktimize par lezot ki ti krwar ki zot ras i pli siperyer.

Eski i fer sans pour krwar ki en ras i pli siperyer ki lezot? Eski lasyans par egzanp in prouve ki serten ras i pli siperyer zenetikman tandis ki lezot i pli enferyer? Bryan Sykes, en Syantis ek profeser Oxford i dir: “Napa okenn baz dan domenn zenetik pour klasifye konman siperyer en serten ras ouswa group etnik. . . .  Mon pe toultan ganny demande si i annan DNA Grek oubyen Italyen, me byensir napa. . . .  Nou tou nou byen pros avek kanmarad.”

Sa bann lenformasyon syantifik i an armoni avek sa ki Labib i dir. Labib i dir ki Bondye ti kree zis en zonm ek en fanm. Tou larestan imen i zot desandans. (Zenez 3:20; Akt 17:26) Alor, pour Bondye i annan en sel ras e sa i ras imen.

Pour Zeova, kouler lapo en dimoun oubyen son laparans napa okenn lenportans. Sa ki annan bokou plis valer pour Li se sa ki nou ete anndan. I dir: “Dimoun i ziz kanmarad par zot laparans, me mwan mon ziz dimoun par sa ki dan zot leker.” (1 Samyel 16:7, Contemporary English Version) I vreman ankourazan pour nou konn sa. Akoz?

Dan tou ras, i annan bokou dimoun ki pa kontan serten laspe zot lekor, me napa sitan bokou keksoz ki nou kapab fer pour sanz sa. Par kont, nou kapab amelyor sa ki pli enportan pour nou, nou panse ek santiman profon. (Kolosyen 3:9-11) Si nou onnet avek nou lekor, nou kapab remarke ki nou annan sa tandans pour krwar ki nou en pti pe pli siperyer ouswa pli enferyer ki bann dimoun en lot ras. Vi ki tou le de pwennvi pa annakor avek fason panse Zeova, nou devret fer bokou zefor pour tir sa bann move santiman dan nou leker.​—Psonm 139:23, 24.

Anmezir nou fer bokou zefor pour vwar nou lekor ek lezot lafason ki Zeova i vwar zot, nou kapab asire ki i pou ed nou. Son Parol i rapel nou: “An sa ki konsern Zeova, son lizye pe ale vini partou lo later pour li montre son lafors an faver bann ki zot leker i tou pour li.” (2 Kronik 16:9) Sa i en realite pour tou bann ras ki egziste.