Kestyon sorti kot nou lekter . . .

Eski paran i devret ansenny zot zanfan lo sèks?

▪ Bokou paran i fer en kantite pour protez zot zanfan pour ki zot pa atrap bann maladi grav. Zot devret osi protez zot zanfan pour ki zot annan sa bon valer moral. En fason zot kapab fer sa se ler zot eksplik zot zanfan lo sèks. (Proverb 5:3-23) Sa bann formasyon ki paran i donnen e sa gidans moral i vreman enportan akoz deplizanpli bann zanfan i ganny kontak avek tou sort kalite lenformasyon baze lo sèks, ki swa lo televizyon ek Internet, dan liv e dan liv kartoun.

Diane Levin, en Profeser ek oter i dir: “Problenm ki egziste denozour se pa ki nou zanfan pe aprann keksoz lo sèks. Me plito se sa ki zot pe aprann lo la, laz ki zot pe aprann tou sa la e ki sennla ki pe ansenny zot. Bann keksoz ki zanfan i ganny ansennyen lo sèks atraver bann piblisiter ek sa ki tou dimoun pe fer i annan en gran lefe lo zot e i menm kapab afekte zot.”

Paran i devret protez zot zanfan avek sa bann move pwennvi ek fason panse imoral ki lasosyete i promote. (Proverb 5:1; Efezyen 6:4) Bann zanfan i devret aprann ki mannyer zot lekor i fonksyonnen, ki mannyer zot devret pran swen avek zot lekor fizikman e konman pour protez zot lekor avek bann move dimoun. Avan ki en zanfan i ariv laz ladolesans, sa laz kot i konmans vin matir seksyelman, en fiy i devret konn bann sanzman ki pou arive avek son lekor e osi konpran akoz i ganny son peryod e ki mannyer sa i arive. De lot kote, en garson i devret konnen davans konsernan bann desarz sperm ki i pou eksperyanse. Kan en zanfan i ankor pti, paran i devret konmans ansenny zot bann non prop ki ganny servi pour zot bann parti lekor. Bann bon paran pou ansenny zot zanfan trwa leson enportan konsernan zot parti lekor: (1) Sa bann parti lekor i spesyal e i prive. (2) I pa devret ganny koz lo la dan en move fason. (3) Personn napa drwa get zot parti prive ouswa touse. Anmezir en zanfan i grandi, paran i devret vey sa bon moman pour eksplik zot ki mannyer en madanm i tonm ansent.a

Kan ki paran i devret konmans edik zot zanfan lo sa size? Pli boner ki zot kapab. En fiy i kapab konmans ganny son peryod a laz 10 an ouswa pli boner. En garson i kapab ganny son premye desarz sperm a laz 11 an ouswa 12 an. Sa bann sanzman dan zot lekor i kapab enkyetan pour ou zanfan si i pa konnen ki pe arive. Paran i devret fer zot zanfan konnen davans ki i napa nanryen mal avek sa bann devlopman ki pe arive avek zot lekor. I osi sa bon moman pour ed zot konpran valer ek lenportans pour swiv bann standar moral dan Labib, en keksoz ki laplipar progranm lo sèks dan lemonn pa montre.​—Proverb 6:27-35.

[Not anba lo paz]