I pratik pour nou letan

“Ou parol i en lalanp pour mon lipye e en lalimyer pour mon semen.”​—PSONM 119:105.

DAN KI FASON LABIB I DIFERAN? I annan bokou liv ki renonmen me nou pa kapab servi zot pour ganny bann gidans pratik. Bann liv lekol ozordi osi pe souvan ganny revize. De lot kote Labib i dir ki “tou sa ki’n ganny ekri dan lepase in ganny ekri pour nou lansennyman.”​—Romen 15:4.

EN LEGZANP: Menm si Labib i pa en liv medikal, i annan bann sizesyon pratik ki kapab ed nou pour fer fas avek bann problenm lasante fizik e emosyonnel. Par egzanp, i dir: “En leker kalm i fer dibyen nou lekor.” (Proverb 14:30) Labib i osi donn sa lavertisman: “Sa ki izol son lekor pe rod son prop dezir egois; i pou al kont tou lasazes pratik.” (Proverb 18:1) Par kont, i osi dir: “I annan plis lazwa pour donnen ki pour resevwar.”​—Akt 20:35.

SA KI RESERS I MONTRE: Annan en leker kalm, demontre zenerozite e fer bann bon zanmi i kapab amelyor ou lasante. The Journal of the American Medical Association i fer resorti: “Bann zonm ki pran lakoler vitman i annan de fwa plis sans pour ganny en latak leker ki bann zonm ki kontrol zot lakoler.” En resers ki ti dire pour di-z-an Lostrali i dir ki bann dimoun aze ki ti annan “bokou zanmi ensi ki bann dimoun ki zot ti kapab fer konfyans” ti annan pli sans pour viv pli lontan. An 2008, bann serser Kanada ek Leta-z-ini ti remarke ki “depans larzan pour byennet lezot i donn plis lazwa ki ler nou depans larzan pour nou menm.”

KI OU PANSE? Eski ou ti pou annan konfyans dan bann konsey lo lasante sorti dan nenport ki liv ki’n ganny ekrir 2,000 an pase? Oubyen Labib i en liv inik?

[Ekstre lo paz 8]

“Labib i enteres mwan en kantite . . . akoz i annan bann lenformasyon pratik lo lasante.”​—DOKTER HOWARD KELLY, MANM FONDATER THE JOHNS HOPKINS UNIVERSITY SCHOOL OF MEDICINE