Kestyon lekter

Eski i apropriye pour bann Kretyen bril lekor?

▪ Labib pa kont bril lekor.

I annan bann resi Labib ki montre ki i ti annan bann lekor oubyen lezo bann dimoun ki ti ganny brile. (Zoz. 7:25; 2 Kron. 34:4, 5) I kapab ki sa ti pe montre ki sa bann dimoun pa ti merit en lanterman apropriye. Me kan dimoun ti ganny brile, sa pa ti toultan vedir ki zot pa ti merit en lanterman apropriye.

Nou kapab vwar sa dan resi lanmor Lerwa Sail ek son trwa garson. Zot tou le kat zot ti mor dan lager kont bann Filisten. Enn son garson ti Yonatann, en bon zanmi David ki ti siport li fidelman. Kan bann Izraelit ki ti pe reste Yabes-Gilead ti aprann sa ki ti’n arive, zot ti pran sa kat lekor, bril zot e apre anter bann lezo. Pli tar, David ti felisit sa bann Izraelit pour zot aksyon.​—1 Sam. 31:2, 8-13; 2 Sam. 2:4-6.

Labib i dir ki lespwar pour bann dimoun mor i rezireksyon, setadir Bondye pou fer sa dimoun viv ankor. Ki swa lekor en dimoun mor i ganny brile oubyen non, napa nanryen ki kapab anpes Zeova redonn sa dimoun lavi avek en nouvo lekor. Sa trwa Ebre fidel ki ti mank lanmor dan en four dife, parey ti’n ganny lord par Lerwa Neboukadnetsar, pa ti bezwen per ki si zot ti ganny detri par dife, Bondye pa ti pou kapab resisit zot. (Dan. 3:16-18) Sa ti osi leka pour bann serviter Zeova ki ti ganny touye e apre ganny brile dan kan konsantrasyon Nazi. Bokou serviter fidel Bondye in mor dan bann leksplozyon oubyen dan lezot fason kot zot lekor pa’n ganny trouve apre. Kantmenm sa, zot pou ganny resisite.​—Rev. 20:13.

Zeova pa bezwen lekor ki sa dimoun ti annan avan pour resisit li. Nou kapab vwar sa, lefet ki Bondye i resisit bann Kretyen swazir pour viv dan lesyel. Parey Zezi, ki ti “revin vivan [konman] Lespri,” bann Kretyen swazir i ganny resisite konman sa menm dimoun me avek en lekor spirityel. Napa okenn parti zot lekor fizik ki al avek zot dan lesyel.​—1 Pyer 3:18; 1 Kor. 15:42-53; 1 Zan 3:2.

Nou lespwar pour ganny resisite pa depan lo sa ki arive avek nou lekor fizik, me lo nou lafwa dan abilite Bondye e sa dezir ki i annan pour akonplir son promes. (Akt 24:15) I vre, nou pa vreman kapab konpran ki mannyer Bondye ti resisit bann dimoun dan lepase oubyen ki mannyer i pou fer sa dan lavenir. Kantmenm sa, nou met nou konfyans dan Zeova. I’n donn “laprev” par resisit Zezi.​—Akt 17:31; Lik 24:2, 3.

Bann Kretyen i fer byen pour pran an konsiderasyon zot kiltir, santiman bann dimoun dan landrwa kot zot reste e bann regilasyon legal konsernan ki pour fer avek lekor bann dimoun mor. (2 Kor. 6:3, 4) Apre, si lekor en dimoun pou ganny brile oubyen non, sa i en desizyon personnel oubyen en desizyon familyal.