LO KOUVERTIR | AKOZ MOVE KEKSOZ I ARIV AVEK BANN BON DIMOUN?

Move keksoz i partou!

Smitaa ti reste Dhaka, Bangladesh ti en madanm 35 an ki ti renonmen pour kontan e pran swen avek lezot. Dimoun ti konn li konman en zenn madanm ki ti travay dir e toultan zwaye. I ti pare pour ed lezot konn sa ki i’n aprann lo Bondye. Alor, i ti en gran sok pour fanmir ek zanmi Smita kan i ti ganny en maladi san ekspekte ki ti pran son lavi dan mwens ki en semenn.

James ek son madanm, en zenn koup dan zot 30 an, ti annan menm repitasyon ki Smita. En zour prentan, zot ti al vizit zot bann zanmi ki ti reste dan Lakot Was Leta-z-ini. Zot pa ti zanmen retourn kot zot New York. Laba, zot ti mor dan en aksidan loto e zot fanmir, zanmi ek koleg travay i mank zot en kantite.

Ou pa bezwen al lwen pour vwar ki lemal ek soufrans pe ogmante partou kote. Lager pa touy zis solda me osi sivilyen. Bann dimoun inosan i soufer akoz krim ek vyolans. Tou sort kalite dimoun nenport ki laz ek ran sosyal i ganny afekte avek bann aksidan fatal ek maladi grav. Nenport ki kominote i kapab ganny tape par en dezas natirel. Prezidis ek lenzistis i partou dan lemonn. Petet ou menm ou’n deza ganny afekte avek enn sa bann sityasyon.

Alor i toutafe normal pour demann bann kestyon koumsa:

• Akoz move keksoz i arive avek bann bon dimoun?

• Eski Bondye i devret ganny blanmen pour sa bann move keksoz?

• Eski bann maler i ariv par azar oubyen se zonm ki responsab?

• Eski petet nou soufer akoz Karma, setadir lafason ki nou ti viv nou lavi dan lepase?

• Si Bondye i tou pwisan, akoz i les bann bon dimoun soufer?

• Eski en zour nou pou kapab viv san okenn lemal ek soufrans?

Pour reponn sa bann kestyon, nou bezwen konpran larepons de kestyon de baz: Akoz bann move keksoz i arive? Ki Bondye pou fer?

[Not anba lo paz]