Eski ou annan en lanz gardyen?

Labib pa dir ki sak dimoun i annan en lanz gardyen. Zezi ti dir: “Fer atansyon ki zot pa mepriz enn sa bann dimoun ki parey en zanfan [bann disip Kris], parski mon dir zot ki zot lanz dan lesyel i toultan devan mon Papa ki dan lesyel.” (Matye 18:10) Par kont, Zezi pa ti pe dir ki tou dimoun i annan en lanz gardyen me i ti pe montre ki bann lanz i vreman enterese avek sakenn son bann disip. Alor, bann vre serviter Bondye pa pran bann risk initil pour gete si bann lanz Bondye pour protez zot.

Me eski sa i vedir ki bann lanz pa ed bann imen? Non. (Psonm 91:11) Serten dimoun, parey Kenneth ki’n ganny mansyonnen dan sa lartik avan, i krwar ki Bondye i servi bann lanz pour protez e gid zot. Menm si nou pa kapab asire ki sa ki i pe dir i vre, i kapab ki i pe dir laverite. Temwen Zeova i souvan vwar levidans kot bann lanz in ed zot ler zot dan predikasyon. Par kont, vi ki bann lanz i envizib, nou pa kapab dir ki Bondye pa pe servi zot pour ed dimoun dan bann diferan sityasyon. An tou ka, nou kapab remersye Bondye pour nenport ki sipor ki i donn nou.​—Kolosyen 3:15; Zak 1:17, 18.