Rann Temwannyaz Par Vin en Bon Vwazen
1 Zezi ti dir “kontan ou prosen parey ou kontan ou prop lekor.” (Mat. 22:39) San okenn dout, ou “fer dibyen” anver bann konpanyon Kretyen, me eski ou kapab ofer ou lanmour bann dimoun ki reste obor ou? (Gal. 6:10) Dan ki fason?
2 Par Idantifye Ou Lekor: Eski ou bann vwazen i konnen ki ou en Temwen? Si non, akoz ou pa vizit zot ler ou dan predikasyon? Rezilta i kapab sirprann ou! Oubyen si ou santi pli alez, esey temwanny avek zot enformelman. Ler ou deor ou lakour, petet ou vwar zot pe travay dan zot lakour oubyen pe pronmnen lo semen. Apros zot avek en sourir amikal. Esey koz lo ou bann krwayans, landrwa kot Lasal Rwayonm i ete, kwa ki deroule laba, e les zot konn lezot dimoun dan vwazinaz ki asiste bann renyon. Envit zot renyon. Determinen pour rann temwannyaz oprofon lo sa bon nouvel avek tou dimoun ki ou konnen.—Akt 10:42; 28:23.
3 Par Ou Kondwit Egzanpler: Ou latitid amikal i koz bokou pour ou e i kapab ouver semen pour donn en temwannyaz. I osi ‘fer loner lansennyman lo Bondye.’ (Tit 2:7, 10) Montre lentere senser dan ou bann vwazen. Montre ou zantiy. Respekte zot drwa pour annan en lanvironnman trankil e prive. Si enn parmi zot i tonm malad, montre konsiderasyon e ofer pour ede. Ler en nouvo fanmiy i vin reste dan vwazinaz, rann zot en vizit pour swet zot labyenveni. Bann tel akt bonte i donn en bon lenpresyon e i fer plezir Zeova.—Ebr. 13:16.
4 Par Laparans Ou Lakour: En bon vwazen i osi enplik okip byen ou lakaz afen ki i prezantab. En lakaz ek son lanvironnman ki prop e atiran i donn en bon temwannyaz lo li menm. Me en lakaz ki sal oubyen ki annan salte partou deor, pou probableman fer lezot malparl mesaz Rwayonm. Alor, i tre enportan pour gard ou lakaz, lakour, ek transpor prop e dan en bon leta.
5 Demontre lentere pour sa bann ki an deor kongregasyon Kretyen i endike ki ou annan lanmour pour ou bann vwazen. Ki lefe sa i kapab fer? Akoz “zot bonn aksyon,” i tre probab ki serten ki pe gete pou “rann glwar Bondye.”—1 Pyer 2:12.