Sa Pep pli ere lo Later
1 “Ere sa pep ki son Bondye i Zeova!” (Pson. 144:15) Sa bann parol i dekrir Temwen Zeova konman sa pep pli ere lo later. Napa pli gran lazwa ki sa ki vin atraver servi sa sel vre Bondye vivan, Zeova. Lefe ki i “Bondye ere,” bann ki ador li i reflekte son lazwa. (1 Tim. 1:11, NW ) Ki serten laspe nou ladorasyon ki fer nou vreman ere?
2 Rezon pour ere: Zezi ti asir nou ki boner i vin ler nou “konsyan [nou] bezwen spirityel.” (Mat. 5:3) Kontinyelman etidye Labib e asiste tou nou bann renyon Kretyen i satisfer sa bezwen. Aprann laverite dan Parol Bondye in liber nou kont bann mansonz relizye ek lerer. (Zan 8:32) Bann Lekritir in osi ansenny nou pli bon fason pour viv. (Iza. 48:17) Akoz sa, nou rezwir en bon relasyon Kretyen parmi nou lasosyasyon bann frer ki ere.—1 Tesa. 2:19, 20; 1 Pyer 2:17.
3 Nou ganny gran satisfaksyon kan nou obeir bann standar moral o-nivo Bondye, akoz nou konnen ki sa i protez nou e fer Zeova zwaye. (Prov. 27:11) En zournalis ti dir: “Malgre zot bann prensip strik, bann Temwen Zeova pa paret malere. Okontrer, bann zenn osi byen ki bann aze [parmi zot] i paret zwaye e ekilibre.” Konman nou kapab ed lezot pour viv parey nou?
4 Ed lezot trouv Boner: Sa monn i ranpli avek latristes, e zeneralman dimoun i annan en pwenn-vi sonm lo lavenir. Me nou, nou annan en pwenn-vi briyan, nou konnen ki en zour personn pa pou santi li tris ankor. (Rev. 21:3, 4) Alors, avek zel nou partisip dan predikasyon, resers bann ki annan leker senser avek ki nou partaz nou lespwar e nou krwayans lo Zeova.—Ezek. 9:4.
5 En ser pionye ti dir: “Ed dimoun pour konn Zeova ek son laverite i pli meyer keksoz pour fer.” Annou fer tou sa ki nou kapab pour ankouraz plis dimoun ankor pour aksepte letid Labib kot lakour. Servi Zeova e ed lezot pour servi li i anmenn pli gran boner.—Akt 20:35.