Revizyon Pour Lekol Minister Teokratik

Sa bann kestyon swivan pou ganny egzaminen oralman dan Lekol Minister Teokratik pandan semenn le 24 Fevriye, 2003. Sirveyan lekol pou kondwir en revizyon 30 minit baze lo lenformasyon ki’n ganny trete dan bann ekspoze depi semenn le 6 Zanvye ziska le 24 Fevriye, 2003. [Not: Kot napa referans apre kestyon, ou pou bezwen fer ou prop resers pour trouv larepons.—Vwar liv Lekol Minister, p. 36-7.]

PWEN LANSENNYMAN

1. Vre oubyen Fo: Pour kapab lir korekteman fodre fer sir ki sa ki nou lir i paret egzakt, menm si sa ki nou lir i en pti pe diferan avek sa ki’n ganny ekrir. Eksplike. [be p. 83] Fo. Sa ki paret egzakt pour en lekter i kapab pa touzour korek. Pour kapab lir korekteman, en dimoun i bezwen lir aotvwa bann mo egzakteman parey zot in ganny ekrir lo papye. Pa sot bann mo, inyor porsyon bann mo, oubyen esanz en mo pour en lot. Pronons bann mo korekteman.

2. Konplet sa fraz: Pour en dimoun kapab lir korekteman, fodre ki i egzerse, egzerse, egzerse, e fer li aotvwa. [be p. 85]

3. Akoz i enportan pour koz dan en fason kler? (1 Kor. 14:8, 9) [be p. 86] Ler ou koz klerman avek bon prononsyasyon, lezot i kapab byen konpran. I probab ki lezot pou pran oserye bann mo ki ganny prononse klerman. (Lide zeneral i sifi.)

4. Ki serten keksoz ki kapab fer en parol pa tro kler, e ki nou kapab fer pour koz pli kler? [be p. 87-8] Si ou pa ouver ou labous ase gran, ou koz tro vit, oubyen ou sot bann silab, sa i kapab fer ou fason koze pa kler. Ou kapab fer amelyorasyon par tenir ou latet anler, ouver ou labous ase gran, e aprann egzers relaks ou bann misk figir ek ou bann misk lagorz. (Lide zeneral i sifi.)

5. Ki serten mo ki’n ganny servi dan Lekol Minister Teokratik pandan sa de dernyen mwan ki ou santi ou bezwen egzerse konman pour byen prononse? [be p. 92] [Not pour sirveyan lekol: Ekrir bann mo ki souvan mal prononse. San koz okenn lanbara, endike ki mannyer pour byen pronons zot. Sa i enkli bann mo an Kreol, e osi serten mo an Angle oubyen an Franse ki souvannfwa ganny mal prononse.]

EKSPOZE NO. 1

6. Vre oubyen Fo: Nou lizye i kapab ed nou pour ekoute. Eksplike. [be p. 14] Vre. Sa ki nou fikse nou lizye lo la i domin nou latansyon. Servi nou lizye pour ed nou konsantre par fikse sa orater e swiv ansanm avek li kan i lir bann verse Labib. Si ou lizye i sorti lo sa orater, ou pou perdi bokou sa ki pe ganny prezante lo lestrad.

7. Konplet sa fraz: Later, lalin, ek soley i bann keksoz ki Bondye in fourni pour endik letan. [si p. 279 par. 7]

8. Konplet sa fraz: Dapre lafason ki Labib i servi sa term “zour” i kapab refer avek en peryod 12 er-d-tan, 24 er-d-tan, 1,000 an, oubyen plizyer milener. Konteks i endike dan ki sans i ganny aplike. [7, si p. 279 par. 8] (Larepons i kapab ganny donnen dan nenport ki lord.)

9. Konman legzanp Ana, Mark, ek Eliya i kapab ed nou pour fer fas avek dekourazman? Ki mannyer nou kapab servi sa bann legzanp pour ed lezot? [w01 1/2 p. 20-3 (Angle/Franse)] Olye dekouraze oubyen gard rankin, kan i ti ganny mal zize par gran pret an Izrael, Ana ti prezant bann fe devan li avek fransiz ek respe. Mark ti kontinyen son aktivite predikasyon, i ti akonpanny Barnabas olye dekouraze akoz zapot Pol pa ti anmenn li avek li lo son vwayaz misyonner. Eliya osi ti annan serten problenm ki ti rann li malere pour en pe letan. Kantmenm sa, i ti depan lo Zeova pour lenstriksyon ek lafors pour li kapab kontinyen profetize. Sa bann legzanp i kapab ed nou pour ankouraz lezot ki dekouraze pour fer fas avek zot problenm e pour viv en lavi satisfezan. (Lide zeneral i sifi.)

10. Ki mannyer en konprenezon lo bann levennman sportif dan letan ansyen i fer li pli fasil pour nou konpran serten verse Labib? Ki lefe sa lenformasyon i devret annan lo nou lavi? [w01 1/1 p. 28-31 (Angle/Franse)] Letan nou konpran ki ‘okenn kriminel renonmen pa ti ganny drwa partisip’ dan bann levennman sportif organize par bann ansyen Grek, alor nou pli byen kapab konpran komanter Pol dan 2 Timote 2:5, ki dir ki en dimoun i devret ‘swiv bann regleman’ dan lakours pour lavi. Letan nou konnen ki bann atlet dan bann ansyen levennman sportif pa ti met en ta lenz oubyen lekipman lo zot, i ed nou konpran parol Pol dan Ebre 12:1 konsernan ‘debaras nou avek tou fardo.’ Bann lakours dan letan ansyen ti dir e ti demann lafors ek landirans. Sa i fer pli kler parol Pol konsernan tay avek landirans. Bann atlet ki ti sorti premye dan bann paryaz taye organize par bann ansyen Grek ti souvan ganny bann kouronn lorye, zoliv maron, oubyen sapen. Sa fe i ed nou pour pli byen sezi sinifikasyon parol Pol dan 1 Korentyen 9:​24, 25, kot i dir ki pri pour landirans Kretyen i dirab. Sa i diferan avek pri pour en konkour atletik. Alors zapot Pol ti idantifye klerman rekonpans kan nou fer sa ki Bondye i ekspekte nou fer, nou abandonn pwennvi materyalis, e andire pour ganny sa pri lavi eternel. (Lide zeneral i sifi.)

LEKTIR LABIB LASEMENN

11. Vre oubyen Fo: Vi ki Rwayonm Bondye in ganny etablir dan lesyel an 1914, i nepli fer sans pour priye, “Ki ou Renny i ganny etabli.” (Mat. 6:10) Eksplike. [be p. 279; w96 1/6 p. 31 (Angle/Franse)] Fo. Pour priye “Ki ou Renny i ganny etabli” i ankor fer sans e i annan en gran sinifikasyon. Sa se akoz Rwayonm seles Bondye ki pe aprezan dominen pou azir dan en fason konkret anver sa later. Se sa ki nou annan antet kan nou dir bann tel lekspresyon parey dan lapriyer ki Zezi in ansenny nou pour fer.

12. Vre oubyen Fo: Parol Zezi dan Matye 11:24 i vedir ki bann ki Zeova ti detrir par dife an Sodonm ek Gomor pou ganny resisite. Eksplike. Fo. Zezi pa ti pe direkteman diskit zizman eternel ek rezireksyon. Pwen ki i ti pe fer resorti se lafason ki bann dimoun an Korazen, Betsayda, Kapernaoum ti endiferan. I ti osi montre ki sa bann dimoun pa ti pou sanze. Kan i ti dir ki “zour zizman” pou “mwen sever” pour Tir/Sidon ek Sodonm/Gomor, Zezi ti pe servi egzazerasyon konman en mwayen pour met lanfaz. I pa ti neseserman anvi ki nou pran li literalman. Deplis, vi ki Labib i servi legzanp Sodonm/Gomor ek Deliz pour dekrir destriksyon lafen sa sistenm, i kler ki bann ki Bondye ti detrir dan sa bann zizman lepase in eksperyans destriksyon permanan.​—2 Pyer 2:​ 4-9; Zid 7. [2, w88 1/6 p. 30-1 (Angle/Franse)]

13. Swazir larepons ki byen: Lesklav fidel e pridan ki ganny mansyonnen par Zezi dan Matye 24:45-47 dan Traduction du monde nouveau, i (a) Konsey Direkter Temwen Zeova; (b) tou Kretyen swazir konman en group lo later dan nenport ki moman letan; (c) Zezi Kri li menm. Sa lesklav i fourni manze spirityel kan i ler avek bann “lezot serviter,” ki reprezant (a) bann Kretyen swazir endividyelman; (b) lezot mouton; (c) tou sa ki lir piblikasyon Kretyen. Sa met ti apwent sa lesklav lo tou son byen dan lannen (a) 1914; (b) 33 N.L.; (c) 1919. [5, w93 1/5 p. 16-​18; vwar osi w90 15/3 p. 14. (Angle/Franse)]

14. Swazir larepons ki byen: Sa lasenn ki ganny mansyonnen dan legzanp Zezi dan Matye 13:47-50 i enkli kongregasyon Kretyen swazir osi byen ki (a) Rwayonm Mesyanik Bondye; (b) zot konpanyon lezot mouton; (c) Kretyente. Sa lasenn i reprezant en lorganizasyon lo later ki dir ki i kongregasyon Bondye e ki pe rasanble “pwason” oubyen imen ki dir zot swiv Kris. Sa lasenn in enkli Kretyente, ki’n rasanble en gran kantite “pwason” ki pa bon e ki napa laprouvasyon Bondye. I osi enkli kongregasyon Kretyen swazir, ki’n kontinyen rasanble “bon pwason,” anba gidans bann lanz an akor avek Matye 13:49. [3, w92 15/6 p. 20 (Angle/Franse)]

15. Dapre parol Zezi dan Matye 5:24, ki ou devret fer si ou santi ki ou’n ofans en frer oubyen en ser? [g96 8/2 p. 26-7 ] Si ou konsyans i rapel ou ki ou’n ofans en frer oubyen en ser, ou bezwen apros sa dimoun zantiman avek lanmour Kretyen, avek bi pour amelyor sitiasyon, souvannfwa par eskiz ou lekor.