Revizyon Pour Lekol Minister Teokratik
Sa bann kestyon swivan pou ganny egzaminen oralman dan Lekol Minister Teokratik pandan semenn le 25 Out, 2003. Sirveyan lekol pou kondwir en revizyon 30 minit baze lo lenformasyon ki’n ganny trete dan bann ekspoze depi semenn le 7 Zilyet ziska le 25 Out, 2003. [Not: Kot napa referans apre kestyon, ou pou bezwen fer ou prop resers pour trouv larepons.—Vwar liv Lekol Minister, p. 36-7.]
PWEN LANSENNYMAN
1. Ler nou pe partisip dan predikasyon, ki byenfe nou gannyen kan nou gard kontakt vizyel? [be p. 125 par. 1-2; bwat p. 125] Lizye ki transmet santiman ek respe i kapab dir bokou konsernan sa kalite dimoun ki ou ete e ed bann ki ou koz avek santi zot pli alez. Kontakt vizyel apropriye i osi kapab ed ou determinen konman pour tret diferan sitiasyon.
2. Si i arive ki ou nerve avan al dan predikasyon, kwa ki kapab ed ou? [be p. 128 par. 4-5] Ansanm avek en bon preparasyon ek lapriyer avek Zeova, mazin mizerikord Zeova pour envit dimoun rezwir lavi eternel dan Paradi; fikse ou latansyon lo bezwen lezot. I byen pour rapel ki tou dimoun i annan liberte pour swazir e kapab swa aksepte oubyen rezet sa mesaz. Ou devwar se senpleman pour prese. (Mat. 24:14; Akt 4:29)
3. Ler ou pe prezant en diskour lo lestrad, kwa ki pou ed ou koz dan en fason natirel e parey ou koze toulezour? [be p. 129 par. 2; bwat p. 129] Donn latansyon bann lide prensipal, non pa bann mo presi, i kontribye pour en stil prezantasyon ki natirel. Prezantasyon i kapab vin tre serye e formel si en dimoun i aprann en diskour parker oubyen si son not i tro detaye.
4. Ki lefe bann prensip dan Levitik 16:4, 24, 26, 28; Zan 13:10; ek Revelasyon 19:8 i devret annan lo nou laparans personnel, e akoz sa i enportan? [be p. 131 par. 3; bwat p. 131] Labib i ankouraz nou pour nou prop, ki enkli nou lekor ek nou lenz, sirtou ler nou pe al dan en landrwa ladorasyon oubyen nou pe partisip dan predikasyon. Nou laparans personnel i kapab enfliyans lafason ki lezot i vwar nou krwayans Kretyen ek fason viv ki nou reprezante.
5. Dekrir en dimoun ki modes e ki annan ‘bon sans.’ (1 Tim. 2:9, 10) [be p. 132 par. 1] En dimoun ki modes i vwar li enportan pour pa ofans lezot pour en rezon initil e atir latansyon ki pa neseser lo li menm. En dimoun ki annan bon sans i pridan e annan bon zizman. I annan respe pour bann standar divin e pare pour aplik bann gidans Labib dan son lavi.
EKSPOZE NO. 1
6. Menm si bann Kretyen i devret siport kanmarad avek pasyans, kwa ki pa ganny tolere parmi zot? (Kol. 3:13) [w01 15/7 p. 22 par. 7-8 (Angle/Franse)] Bann Kretyen pa toler lemal dan okenn fason, ni inyor bann fot. (Gal. 6:1)
7. Vre oubyen Fo: En tyenm i en nimero ki antye ouswa konplet. Eksplike. [si p. 282 par. 24-5] Fo. En tyenm i endik pozisyon dan lord, tel parey premye, dezyenm, trwazyenm, me i pa endik en nimero konplet. Par egzanp, ler en dimoun pe koz lo 21 tyenm syek, i pa pe vedir ki 21 syek antye in fini pase. Parkont, en nimero kardinal i en nimero konplet, ouswa antye.
8. Ki pli bon motif ki nou kapab annan pour lir Parol Bondye, e akoz annan en tel motif i enportan? [be p. 24 par. 1] Lanmour pour Zeova i pli bon motif ki nou kapab annan pour lir son Parol. Kontan Zeova ‘avek tou nou lespri’ pou motiv nou pour konsantre bokou pour pran konnesans Bondye. (Mat. 22:37)
9. Konman en dimoun ki annan lasazes i “apresye konnesans”? (Prov. 10:14) [w01 15/7 p. 27 par. 4-5 (Angle/Franse)] En dimoun i devret ranpli son lespri avek konnesans Bondye ki batir, ki ganny trouve dan “tou Lekritir.” (2 Tim. 3:16, 17) Sa konnesans i osi devret tous leker sa dimoun atraver meditasyon regilye.
10. Akoz bann bon labitid Zob i remarkab? (Zob 1:1, 8; 2:3) [w01 1/8 p. 20 par. 4 (Angle/Franse)] Bann bon labitid Zob ti ede fer li vin en zonm “san repros e drwat.” I ti abitye zwe rol pret lafanmiy, par ofer sakrifis an faver son bann zanfan. (Zob 1:5) Dan fanmiy Zob, bann koutim ki ti santre lo ladorasyon Zeova ti tre enportan.
LEKTIR LABIB LASEMENN
11. Konman bann manm Konsey Direkter ti kapab tonm “dakor” ki bann Kretyen non Zwif pa fodre sirkonsi pour kapab ganny sove? (Akt 15:25) Premyerman, Pyer ti dir ki Bondye ti donn lespri sen bann Kretyen non Zwif ki pa ti’n ganny sirkonsi. I ti pe refer avek Korney ek son fanmiy ki ti’n konverti. (Akt 15:7-9) Apre, Barnabas ek Pol ti rakont zot leksperyans avek bann dimoun lezot nasyon ki ti’n vin Kretyen. (Akt 15:12) Finalman, Zak ti refer avek Amos 9:11, 12. (Akt 15:13, 16) Alors, bann leksperyans ek Lekritir enspire ti fer zot vwar sa bon desizyon ki zot devret pran. [1, w90 15/6 p. 13 par. 14-15 (Angle/Franse)]
12. Ki mannyer Konsey Direkter ti demande ki Pol i akonpli serten kondisyon Lalwa Moiz, kan Zeova ti’n aboli sa Lalwa? (Akt 21:20-26) [it-1-E p. 481 par. 3, it-2-F p. 701 par. 4; it-2-E p. 1163 par. 6–p. 1164 par. 1, it-2-F p. 1166 par. 2] Lalwa Moiz ti lalwa pei Zide. Kan serten koutim ki ti asosye avek sa lalwa pa ti vyol bann prensip Kretyen ouswa rezet bann doktrin Kretyen, bann Kretyen premye syek pa ti vwar li en problenm pour zot swiv koutim Zwif pour zot pa ofans lezot initilman.
13. Ki bann fo lakizasyon ki ti ganny fer kont zapot Pol ki fer nou rapel bann remark ki’n ganny fer kont bann Temwen Zeova tou dernyenman? (Akt 24:5, 6) [w01 15/12 p. 22 par. 7–p. 23 par. 2 (Angle/Franse)] Bann lennmi Pol ti akiz li pour rebelyon ki’n koz mekontantman parmi popilasyon. Zot ti osi pretann ki i ti lider en sekt drol akoz larelizyon Kretyen ti diferan avek krwayans ki bann Zwif ti abitye avek. Deplis, i ti ganny akize konmkwa i’n vyol bann lalwa konsernan permisyon pour antre dan tanp.
14. Konman ki Pol in kit en bon legzanp konman en proklanmater Rwayonm menm letan i ti’n ganny anprizonnen dan en lakaz pour de zan? (Akt 28:30, 31) Menm si i ti anba restriksyon, Pol ti fer sa ki i kapab dan sa bann sitiasyon. I ti prese e ansenny avek “lasirans san okenn lanpesman.” Dan prizon, i ti ekrir bann let enspire pour bann Efezyen, Filipyen, Kolosyen, bann Kretyen Ebre, e osi Filemon. [4, w90 15/6 p. 25 par. 20 (Angle/Franse); Rbi8 p. 13 latab]
15. Dan ki fason “lotorite ki gouvernen” in ganny “etabli par Bondye,” e konman ki sa i devret afekte bann Kretyen? (Rom. 13:1, 2) [w00 1/8 p. 4 par. 5 (Angle/Franse)] Bann gouvernman politik in ganny permet pour egziste tanporerman e egzers lotorite ki zot in gannyen dapre plan Bondye. Bann Kretyen i volonterman soumet avek zot lotorite osi lontan ki i pa fer zot fer keksoz ki pa an akor avek lavolonte Bondye.