Bann Zenn—Lir Parol Bondye!
1 Lazenes i en letan kot nou rankontre difikilte e fer fas avek bann gro desizyon. Toulezour, bokou parmi zot bann zenn Kretyen pe fer fas avek presyon pour dezobei bann standar Bondye lo fason viv. Avan ou konmans fer bann desizyon konsernan ledikasyon, travay, ek maryaz, ou’n devret deza fini etablir bann lobzektif spirityel. Se zis dan sa fason ki ou kapab fer lezot desizyon ki ou pou benefisye larestan ou lavi. Bann lobzektif spirityel spesifik pou ed ou pour azir dan en bon fason e fer ou reisi. Par lir e reflesir lo Parol Bondye regilyerman, ou pou ganny pouse pour viv an armoni avek son konsey enspire, e ou pou reisi dan sa ki ou fer.—Zoz. 1:8; Ps. 1:2, 3.
2 Konman i pou benefisye ou? Lemonn Satan i ranpli avek bann tantasyon ki pous dimoun fer sa ki mal. (1 Zan 2:15, 16) Ou kapab konn serten ou bann kanmarad lekol ouswa lezot ki dan ou laz ki’n tonm dan gro problenm akoz zot in les zot ganny enfliyanse avek bann zanmi. Ler ou reste atase avek bann konsey Labib, sa pou donn ou lafors moralman e spirityelman pour ou reziste en move semen. Deplis, konsey Parol Bondye i kapab ed ou pour evit bann latrap Satan. (2 Kor. 2:11; Ebr. 5:14) Ler ou mars dan semen Bondye ou pou trouv sa vre boner. Ou pou santi ou satisfe avek fason ki ou pe viv ou lavi.—Ps. 119:1, 9, 11.
3 Bann prensip dan Parol Bondye ki pa sanze i pli meyer ki lasazes lemonn. (Ps. 119:98-100) En bon konnesans lo bann prensip Labib ek refleksyon lo bann plan Zeova ansanm avek lapriyer senser, i kapab ed ou pour batir en relasyon pros avek Loter Labib ki ranpli avek lasazes, Zeova Bondye. I promet: “Mon pou fer ou annan disernman e ansenny ou ki semen ou devret ale. Mon lizye pou lo ou pour konsey ou.”—Ps. 32:8.
4 Fer Letan pour lir Parol Bondye: En zenn ser Kretyen ti annan sa lobzektif pour lir Labib antye, e i ti fini dan enn an. Konman i’n benefisye? I rapel: “Mon’n aprann en kantite lo Zeova. Mon’n aprann bann keksoz ki’n fer mwan apros pli pre avek li e ki’n fer mwan anvi annan lakrent pour li toudilon mon lavi.” (Zak 4:8) Eski ou’n lir Labib antye? Si non, akoz ou pa fer li ou lobzektif? Zeova pou sirman beni ou bann zefor, e ou pou ganny bann gran rekonpans.