Nou partaz nou lespwar Rwayonm
1 Pandan sa bann dernyen zour difisil, bokou dimoun dan lemonn napa lespwar. (Efe. 2:12) Lezot in met zot konfyans dan bann larises materyel, bann dirizan imen, lasyans modern e bokou lezot ankor. Pa nou ere ki nou nou annan sa vre lespwar pour lavenir, en lesperans ki parey “en lank solid e ferm pour nou lam”!—Ebr. 6:19.
2 Anba dominasyon Rwayonm Bondye, later pou ganny transformen dan en paradi. Bann dimoun ki nou kontan me ki’n mor, pou resisite. (Akt 24:15) Lapovrete, lenzistis, maladi, lavyeyes, ek lanmor pou nepli. (Ps. 9:18; Mat. 12:20, 21; Rev. 21:3, 4) Sa i zis detrwa bann promes Zeova ki pou byento ganny akonplir. Ki laspe nou lespwar ki ou pe sirtou espere avek enpasyans?
3 Anons sa bon nouvel: Nou pa devret gard sa mesaz Rwayonm zis pour nou tousel. Lanmour ki nou annan pour Bondye ek nou prosen pou pous nou pour imit Zezi e “pour anons bonn nouvel pour bann pov . . . pour proklanm delivrans pour bann prizonnyen, e fer bann aveg war kler, pour donn laliberte bann ki ganny oprimen.” (Lik 4:18) Zapot Pol ti pres sa bon nouvel lo bazar e nenport landrwa kot ti annan dimoun. I ti toultan okipe dan minister. (Akt 18:5) Kan nou imit son legzanp e demontre devouman dan nou travay predikasyon, sa pou anpes “traka lavi, [ek] plezir larises” diminyen nou lespwar konman Kretyen.—Mark 4:19.
4 Nou lespwar pour sa Rwayonm pa devret afeblir kan nou zwenn bann dimoun ki pa enterese, bann ki montre zis en ptigin lentere dan mesaz Rwayonm ouswa bann ki opoz nou. O kontrer nou devret “tenir ferm nou lesperans.” (Ebr. 10:23) Nou pa “onte pour anons Levanzil.” (Rom. 1:16) I kapab ki kan zot vwar nou konviksyon ek perseverans sa i kapab pous zot pour ekout nou mesaz.
5 Menm si nou koz lo sitiasyon sa lemonn ki pe deteryore e ki pe akonplir bann profesi dan Labib, nou pa bann proklanmater ki koz zis lo bann keksoz terib. O kontrer, nou minister i met lanfaz lo lespwar Rwayonm, setadir sa bon nouvel lo Rwayonm Bondye. Fotespere ki nou kontinyen pres lo sa bon nouvel avek konviksyon ek devouman pour ki nou ‘montre menm lantouzyasm ziska lafen pour fer sir ki nou lesperans i realize.’—Ebr. 6:11.