Levidans en lafwa for!
1.Ki levennman Zezi ti predir ki ti pou trakas dimoun?
1 Anmezir ki Zezi ti koz lo son prezans ek konklizyon sa sistenm, bann zapot ti ekout atantivman. I ti pou annan bann levennman ki ti pou trakas limanite tel parey lager, lafamin, tranblemandter, ek lepidemi ki zot ti pou bezwen fer fas avek. Apre, Zezi ti dir ki dimoun ti pou ay son bann disip, persekit zot, e met zot a mor. Ti pou annan bann fo profet ki ti pou vini e zot ti pou anbet bokou dimoun. Lanmour en pli gran kantite dimoun ti pou diminyen.
2.Akoz i remarkab ki sa bon nouvel pe ganny anonse dan lemonn antye?
2 Apre tou sa bann move keksoz ki ti pou arive, petet i ti sirprann bann zapot kan Zezi ti dir ki sa bon nouvel lo Rwayonm Bondye ti pou ganny anonse partou dan lemonn. (Mat. 24:3-14) Nou vwar lakonplisman remarkab sa profesi eksitan ozordi. Menm si nou pe viv dan letan vreman danzere, Temwen Zeova pe anons sa bon nouvel avek bokou devouman. Anmezir ki lanmour en kantite dimoun i diminyen, nou lanmour i vin pli for. Menm si “tou nasyon” i ay nou, sa bon nouvel i ganny prese dan preski sak nasyon.
3.Ki sif ankourazan ou vwar dan sa rapor mondyal?
3 Pa i ankourazan pour revwar sa ki Temwen Zeova in fer pandan sa dernyen lannen servis parey sa latab lo paz 3 ziska 6 i montre! Pour en sezyenm lannen konsekitif Temwen Zeova in pas plis ki en bilyon erdtan dan travay predikasyon e pour fer disip. Pa sa i levidans en lafwa for! I ti annan en ogmantasyon 5.8 poursan dan lakantite pionye, 3.1 poursan dan proklanmater, e 4.4 poursan dan letid Labib. Batenm ti ogmante 20.1 poursan plis ki dernyen lannen servis. I vreman eksitan pour vwar preski set milyon dimoun pe fidelman servi Zeova konmela plis ki zanmen oparavan dan listwar imen! Kwa ki ou vwar sirtou ankourazan anmezir ou egzamin sa latab?
4.Ki problenm en zonm ti sirmonte pour ki i kapab ganny batize?
4 Menm si sa bann sif i enpresyonan, nou pa devret zanmen bliye ki zot reprezant bann dimoun ki’n demontre zot lafwa. Konsider en legzanp. Guillermo ti grandi Bolivi. I ti ne an 1935, e depi laz nef an i ti travay dan en plantasyon koka. Depi son lanfans, i ti moul fey koka pour soulaz son lekor apre sa travay dir. Plitar i ti abiz lalkol e fim sigaret. Anmezir i ti aprann konsernan sa ki Bondye i ekspekte li fer, Guillermo ti aret fimen e apre i ti aret abiz lalkol. Son pli gran defi ti pour aret moul bann fey koka, en keksoz ki i ti’n abitye fer tou dilon son lavi. I ti persiste dan lapriyer e i ti nobou aret sa move labitid. Lefet ki i ti’n rezet son bann move labitid, i ti batize. Guillermo i dir “Aprezan mon santi mwan prop e vreman ere.”
5.Ki ou ti pou kontan?
5 Zeova i vreman enterese avek imen. I son dezir ki tou dimoun i arive repantir. (2 Pyer 3:9) Se sa ki nou osi nou ti pou kontan. Fotespere ki nou leker i pous nou pour fer tou sa ki nou kapab pour kontinyen ed bann ki annan en leker senser konn e kontan Zeova parey nou.