Sa kalite pli enportan ki en bon ansenyan i annan
1. Ki sa kalite pli enportan ki fer en dimoun vin en bon ansenyan?
1 Ki sa kalite pli enportan ki fer en dimoun vin en bon ansenyan? Eski i son ledikasyon, leksperyans oubyen i vin natirelman? Larepons i trouve dan sa menm kalite ki akonpli Lalwa, sa kalite ki fer nou kapab idantifye bann disip Zezi e i sa kalite pli dominan e atiran dan bann kalite prensipal Zeova. (Zan 13:35; Gal. 5:14; 1 Zan 4:8) Se lanmour. En bon ansenyan i demontre lanmour.
2. Akoz i enportan pour kontan nou prosen?
2 Kontan nou prosen: Nou Gran Ansenyan Zezi ti demontre lanmour anver bann dimoun e sa ti pous zot pour ekout li. (Lik 5:12, 13; Zan 13:1; 15:13) Si nou enterese avek dimoun, nou pou sezi tou loportinite pour pres avek zot. Bann lobstak parey persekisyon pa pou dekouraz nou, ni menm kan dimoun pa demontre lentere anver nou mesaz. Nou pou demontre lentere personnel dan en fason senser anver bann ki nou pres avek e nou pou mazinen ki mannyer nou pou kapab ed zot. Nou pou anvi pran letan pandan letid avek nou etidyan e osi kan nou pe prepare pour al fer sak letid.
3. Lefet ki nou kontan Labib, ki mannyer sa pou ed nou dan predikasyon?
3 Kontan laverite ki dan Labib: Zezi ti osi kontan laverite ki dan Labib, i ti konman en trezor pour li. (Mat. 13:52) Si nou kontan laverite, nou pou koz avek lantouzyazm e sa pou fer bann ki ekout nou devlop sa lanvi pour kontinyen ekoute. Sa kalite lanmour pou ed nou pour konsantre lo sa bann lenformasyon enportan ki nou pe pas avek sa dimoun dan plas konsantre lo nou febles e nou pou santi nou pli alez dan predikasyon.
4. Ki mannyer nou kapab devlop lanmour?
4 Devlop lanmour: Ki mannyer nou kapab devlop lanmour pour nou prosen? Nou kapab fer sa par reflesir lo lanmour ki Zeova ek son Garson in demontre e lo sa kondisyon spirityel deplorab ki dimoun dan nou teritwar i ladan. (Mark 6:34; 1 Zan 4:10, 11) Nou lanmour pour sa laverite ki dan Labib pou ogmante si nou fer letid personnel ek meditasyon regilyerman. Lanmour i en laspe fri lespri. (Gal. 5:22) Nou kapab demann Zeova son lespri sen ek led pour nou kapab kontinyen devlop lanmour. (Lik 11:13; 1 Zan 5:14) Alor, nenport ki nivo ledikasyon, leksperyans oubyen abilite ki nou annan, nou kapab vin en ansenyan Labib ki efikas par demontre lanmour.