Kwen Kestyon

◼ Ki nou merit gard antet si nou anvi ki serten oubyen tou nou bann byen i al pour lorganizasyon Zeova ler nou mor?

Ler en dimoun i mor, i nepli annan kontrol lo son bann byen materyel. (Ekle. 9:5, 6) Alor, bokou dimoun i fer en testaman byen davans pour eksplik sa ki zot ti a voudre fer avek zot bann byen. (2 Rwa. 20:1) Sa dokiman legal i osi mansyonn non sa dimoun ki zot ti a kontan i administre zot testaman. Dan bokou pei, si napa okenn dokiman legal, se lotorite ki pou deside ki pou fer avek bann byen sa defen. Alor, si ou annan okenn swe konsernan ou bann byen, par egzanp si ou ti a voudre ki serten oubyen tou ou bann byen i al pour lorganizasyon Zeova, i enportan ki ou fer en dokiman legal pour endik sa e swazir en dimoun ki pou administre ou testaman.

Sa dimoun pou annan en gran responsabilite. Depandan lo lakantite byen ki sa defen i posede, i pou annan bokou detay pour verifye e i kapab pran bokou letan pour rasanble e distribye sa bann keksoz. Deplis, normalman i annan serten keksoz ki bezwen ganny fer dapre lalwa. Pa tou dimoun dan kongregasyon ki kapab administre sa testaman dan en bon fason. Sa dimoun ki ganny swazir i merit enn ki diny konfyans, pare pour fer sa ki i ganny demande e ki annan sa abilite pour desarz sa responsabilite.​—Vwar sa lartik “The Wisdom and Benefits of Estate Planning,” dan Awake! le 8 Desanm 1998.

Si ou ganny demande pour administre testaman en dimoun: Si en dimoun i demann ou pour administre son testaman ler i mor, priy lo la e kalkil byen ki i pou kout ou e si ou pou kapab desarz sa responsabilite. (Lik 14:28-32) Apre lanmor sa dimoun, ou pou bezwen enform tou dimoun ki’n ganny mansyonnen dan sa testaman. Enn fwa ki ou ganny permisyon avek lotorite, ou pou bezwen distribye sa bann byen dapre lalwa e zis parey sa testaman i endike. Ki swa sa byen i en kantite oubyen non, sa dimoun ki administre sa testaman pa devret deside pour li menm fason ki i pou partaz sa bann byen. Si en testaman i mansyonnen ki serten ouswa tou sa byen i pour Temwen Zeova, sa larzan ouswa byen i ganny dedye avek lorganizasyon Zeova.​—Lik 16:10; 21:1-4.