Pran konman legzanp bann profet: Osea
1. Ki kestyon ki nou kapab demann nou lekor?
1 ‘Ki sakrifis ki mon pare pour fer pour Zeova?’ Petet ou’n deza demann ou lekor sa kestyon kan ou pe medit lo gran labonte ek mizerikord Zeova. (Ps. 103:2-4; 116:12) Menm si parfwa i ti bezwen fer serten sakrifis personnel, Osea ti pare pour fer sa ki Zeova ti demann li. Ki mannyer nou kapab imit Osea?
2. Ki mannyer nou kapab imit bon legzanp Osea par persevere dan predikasyon?
2 Pres dan letan difisil: Mesaz Osea ti’n ganny donnen premyerman avek sa dis tribi rwayonm Izrael akoz vre ladorasyon laba ti pros pour disparet. Lerwa Yarobam 2 ti pe fer sa ki mal dan lizye Zeova e i ti kontinyen swiv ladorasyon pti bef ki Yarobam 1 ti’n konmanse. (2 Rwa. 14:23, 24) Sa bann lerwa ki ti swiv ti kontinyen promot fo ladorasyon ziska ki sa dis tribi rwayonm ti ganny detri an 740 A.N.L. Menm si fo ladorasyon ti popiler, Osea ti servi Zeova fidelman konman en profet pour apepre 59 an. Eski nou osi nou determinen pour prese lannen apre lannen, menm si nou zwenn dimoun ki pa enterese oubyen nou rankontre lopozisyon?—2 Tim. 4:2.
3. Ki mannyer lavi Osea ti en legzanp mizerikord Zeova?
3 Konsantre lo mizerikord Zeova: Zeova ti demann Osea pour marye avek “en madanm fornikasyon.” (Ose. 1:2) Menm si son madanm, Gomer, ti donn nesans en garson pour li, sa de zanfan ki i ti donn nesans apre pa ti pour Osea. Lefet ki i ti pare pour pardonn son madanm, sa ti en legzanp gran mizerikord Zeova anver pep Izrael kan zot ti repantir. (Ose. 3:1; Rom. 9:22-26) Eski nou pare pour met dekote nou bann preferans personnel pour fer tou dimoun konn mizerikord Zeova?—1 Kor. 9:19-23.
4. Ki bann sakrifis nou kapab fer pour Zeova?
4 Serten serviter Zeova in abandonn en bon plas travay pour pas plis letan dan predikasyon. Lezot in deside pour reste selibater oubyen bann ki’n marye in deside pour pa fer zanfan pour pourswiv lentere Rwayonm. Kan nou medit lo lavi Osea, petet nou kapab mazinen, ‘Mon pa ti pou zanmen kapab fer sa.’ Me, anmezir ki nou devlop lapresyasyon pour labonte ekstraordiner Zeova e depan lo son lespri sen pour ganny kouraz, i kapab servi nou dan diferan fason ki nou pa ti krwar i pou posib, zis parey Osea.—Mat. 19:26; Fili. 2:13.