Kontinyen progrese konman en predikater
1. Ki bann legzanp dan premye syek ki montre ki nou devret progrese konman predikater?
1 Bann Kretyen i devret progrese konman en predikater. Se pour sa rezon ki Zezi ti kontinyen form son bann disip dan predikasyon. (Lik 9:1-5; 10:1-11) I osi akoz Akilas ek Prisil ti anmenn Apolos kot zot pour “eksplik li pli byen Semen Bondye.” (Akt 18:24-26) Pour sa menm rezon, Pol ti ankouraz Timote, sa predikater eksperyanse, pour kontinyen devoue dan son lansennyman pour ki “tou dimoun i a war” son progre. (1 Tim. 4:13-15) Menm si nou’n servi Senyer konman proklanmater pour en kantite letan, nou bezwen kontinyen rafin nou abilite pour prese.
2. Ki mannyer nou kapab aprann avek lezot?
2 Aprann avek lezot: En fason pour amelyor nou bann abilite se par aprann avek lezot. (Prov. 27:17) Alor, ekoute kan en proklanmater ki ou pe travay avek dan predikasyon i fer son prezantasyon. Demann bann sizesyon spesifik avek bann proklanmater efikas e ekout byen sa ki zot dir. (Prov. 1:5) Eski ou en pe ezite pour fer retourn vizit, konmans en letid Labib oubyen partisip dan lezot laspe predikasyon? Pran linisyativ e demann ou sirveyan group oubyen en proklanmater eksperyanse pour form ou. Pa oubliye ki lespri sen Zeova i osi kapab ed ou pour amelyor ou abilite, alor toultan demann Zeova dan lapriyer pour donn ou son lespri sen.—Lik 11:13.
3. Ki mannyer nou devret reazir si en dimoun i donn nou en konsey menm si nou pa’n demande?
3 Pa bezwen ofanse si en dimoun i donn ou en konsey lo ki mannyer pour amelyor ou abilite menm si ou pa’n demann li. (Ekle. 7:9) Parey Apolos, aksepte sa led avek limilite ek rekonesans. Par fer sa ou pe demontre vre lasazes.—Prov. 12:15
4. Ki rezon enportan Zezi ti donnen pour progrese konman en predikater?
4 Progre i glorifye Bondye: Par servi en legzanp, Zezi ti ankouraz son bann disip pour progrese konman bann predikater. I ti konpar son lekor avek en pye rezen e son bann disip swazir avek bann brans sa pye rezen. I ti dir ki son Papa i tay sak brans ki raporte “pour fer zot raport ankor plis fri.” (Zan 15:2) Zis parey met en plantasyon rezen i anvi ki tou bann brans lo son pye rezen i raport plis, Zeova i anvi ki nou kontinyen amelyor nou abilite pour “loue son non par nou labous.” (Ebr. 13:15) Ki bon rezilta nou pou gannyen kan nou progrese konman en predikater? Zezi i donn nou sa larepons: “Mon Papa i ganny glorifye ler zot raport bokou fri.”—Zan 15:8.