Eski ou ti konnen?
Akoz i ti en bon keksoz ki Zeova ti permet bann Izraelit ofer bann tourtrel ek pizon konman sakrifis?
DAPRE Lalwa Moiz, bann Izraelit ti kapab ofer bann tourtrel ek pizon konman sakrifis pour Zeova. Dan bann lalwa konsernan sakrifis, sa de zwazo ti toultan ganny mansyonnen ansanm e bann Izraelit ti kapab ofer tourtrel ouswa pizon konman sakrifis. (Lev. 1:14; 12:8; 14:30) Akoz sa ti en bon keksoz? En rezon, i ki bann Izraelit pa ti toultan kapab ganny tourtrel. Akoz sa?
Tourtrel
Tourtrel i en zwazo migrater ki viv partou an Izrael pandan bann mwan ki fer so. Tou le lannen, pandan lotonn, zot al dan bann pei ki pli so e zot retourn Izrael pandan prentan. (Sal. 2:11, 12; Zer. 8:7) Sa ti vedir ki pandan liver i ti difisil pour bann Izraelit dan letan Labib ofer bann tourtrel konman sakrifis.
Pizon
De lot kote, bann Izraelit ti kapab ganny pizon tou dilon lannen parski normalman pizon pa en zwazo migrater. Osi, bann Izraelit ti sonny pizon kot zot lakour. (Konpar Zan 2:14, 16.) Dapre sa liv Bible Plants and Animals, dimoun dan “tou vilaz ek lavil Palestin ti sonny pizon. Sak met lakour ti annan en lakaz pizon ouswa en trou dan zot miray kot bann zwazo ti reste.”—Konpar Izai 60:8.
Pizon dan en lakaz pizon
Vi ki bann Izraelit ti kapab ganny pizon tou dilon lannen, Zeova ti aksepte ki zot ofer pizon konman sakrifis. Sa ti montre ki Zeova i rezonnab e ki i kontan son bann serviter.