Eski ou ti konnen?
Akoz i ti annan bann zonm etranze dan larme Lerwa David?
DAN larme Lerwa David i ti annan bann zonm etranze. Par egzanp, i ti annan Zelek en Amonnit, Ouriya en Itit ek Itma en Moabit.a (1 Kron. 11:39, 41, 46) Dan larme David i ti osi annan “bann Keretit, Peletit [ek] Gitit.” (2 Sam. 15:18) I paret ki bann Keretit ek Peletit ti trouv fanmir avek bann Filisten. (Ezek. 25:16) Bann Gitit ti reste dan lavil Gat, ki ti en lavil Filisten.—Zoz. 13:2, 3; 1 Sam. 6:17, 18.
Me akoz David ti permet sa bann etranze pour form parti son larme? David ti annan konfyans ki sa bann zonm ti fidel anver li e pli enportan ankor, zot ti fidel avek Zeova. Par egzanp, sa liv The New Interpreter’s Dictionary of the Bible i dir sa konsernan bann Keretit ek Peletit: “Zot ti reste fidel avek David dan bann moman pli difisil pandan son renny.” Ki mannyer zot ti fer sa? Ler “tou bann zonm Izrael” ti kit Lerwa David pour zot al swiv “en fouter dezord ki ti apel Seba,” bann Keretit ek Peletit ti reste avek David e zot ti ed li aret sa rebelyon ki Seba ti’n konmanse. (2 Sam. 20:1, 2, 7) En lot fwa, Adoniya, ki ti garson Lerwa David, ti esey vin lerwa dan plas Salomon. Ankor enn fwa, bann Keretit ek Peletit ti reste fidel avek David e zot ti ede pour fer Salomon vin lerwa parski Salomon ti sa enn ki Zeova ti’n swazir pour vin lerwa apre David.—1 Rwa. 1:24-27, 38, 39.
Itay en Gitit i en lot etranze ki ti vreman fidel avek David. Itay ek son 600 gerye ti siport Lerwa David ler Absalonm, garson David, ti rebel kont David e i ti esey fer pep Izrael fer li vin lerwa dan plas David. David ti dir Itay ki vi ki i ti en etranze, i pa ti oblize lager pour David. Me Itay ti dir li: “Mon fer serman devan Zeova sa Bondye vivan e devan mon senyer lerwa ki vivan, ki nenport landrwa kot mon senyer lerwa i ete, mwan osi mon pou la, ki swa mon viv oubyen mon mor!”—2 Sam. 15:6, 18-21.
Itay ti fidel avek David, sa enn ki Zeova ti’n swazir konman lerwa
Menm si bann Keretit, Peletit ek Gitit ti bann etranze, zot ti rekonnet ki Zeova i sa vre Bondye e ki David ti sa enn ki Zeova ti’n swazir. Nou kapab asire ki David ti vreman rekonesan pour annan sa bann zonm fidel ki ti pe siport li!
a Lalwa Bondye ki dan Deterononm 23:3-6 ti dir ki bann Amonnit ek bann Moabit pa ti ganny drwa form parti kongregasyon Izrael. Me i paret ki sa lalwa ti pe dir ki sa bann nasyon pa ti kapab legalman vin en manm pep Izrael e ganny bann byenfe ki en Izraelit ti annan. Me zot ti kapab asosye avek e menm reste parmi pep Bondye. Vwar Insight on the Scriptures, Volim 1, paz 95 an Angle.