Noe ti konstri en lars

NOE ti annan en madanm ek trwa garson. Son bann garson ti apel Sem, Kam ek Zafet. Sakenn sa bann garson ti annan en madanm. Alor ti annan 8 dimoun dan fanmiy Noe.

Aprezan Bondye ti fer Noe fer en keksoz drol. I ti dir li konstri en gran lars. Sa lars ti gran parey en bato, me i ti parey en gro bwat. Bondye ti demann Noe pour fer li an trwa letaz avek bann lasanm. Sa bann lasanm ti pour Noe ek son fanmiy, pour bann zannimo, e pour met manze ki zot ti pou servi.

Bondye ti dir Noe aranz sa lars byen afen ki delo pa pou kapab antre. Bondye ti dir: ‘Mon pe al anmenn en gran deliz e detri lemonn antye. Tou bann ki pa dan lars pou mor.’

Noe ek son bann garson ti obeir Zeova e zot ti konmans konstri lars. Me lezot dimoun ti zis riye. Zot ti kontinyen fer move. Personn pa ti krwar Noe kan i ti dir zot sa ki Bondye ti pe al fer.

Ti pran bokou letan pour konstri lars akoz i ti sitan gro. Me finalman, apre plizyer lannen, i ti fini. Aprezan Bondye ti demann Noe pour anmenn bann zannimo dan lars. Serten kalite zannimo Bondye ti demann Noe pour anmenn de dan sak, en mal ek en femel. Me lezot kalite, Bondye ti demann Noe pour anmenn set. Bondye ti osi demann Noe pour anmenn tou sort kalite zwazo. Noe ti fer egzakteman sa ki Bondye ti dir li.

Apre sa, Noe ek son fanmiy ti antre dan lars. Bondye ti ferm laport. Anndan, Noe ek son fanmiy ti espere. Mazin ou dan lars avek zot, pe espere. Eski pou vreman annan en deliz parey Bondye ti’n dir?