Zob ti fidel avek Bondye

ESKI ou pran lapenn pour sa zonm malad? I apel Zob, e sa i son madanm. Ou konnen ki i ti pe dir Zob? ‘Modi Bondye e mor.’ Annou nou vwar akoz ki i ti dir en keksoz koumsa, e akoz ki Zob ti pe soufer en kantite.

Zob ti en zonm fidel ki ti obeir Zeova. I ti reste an Ourz, pa tro lwen avek Kanaan. Zeova ti kontan Zob en kantite, me ti annan en personnaz ki pa ti kontan li. Ou konnen lekel?

Se Satan Dyab. Mazinen, Satan ti sa move lanz ki pa ti kontan Zeova. I ti nobou fer Adan ek Ev dezobei Zeova, e i krwar ki i kapab fer tou dimoun dezobei Zeova osi. Me eski i ti kapab fer li? Non. Zis mazin sa kantite zonm ek fanm fidel ki nou’n aprann lo zot. Ki kantite ki ou kapab nonmen?

Apre ki Zakob ek Zozef ti’n mor Lezip, Zob ti sa dimoun ki ti pli fidel avek Zeova lo later antye. Zeova ti oule fer Satan konnen ki i pa ti pou kapab fer tou dimoun vin move, alor i ti dir: ‘Get Zob. Vwar konman ki i fidel avek mwan.’

‘I fidel,’ Satan ti argimante, ‘akoz ou’n beni li e i annan en kantite bon keksoz. Me si ou pran sa bann keksoz, i pou modi ou.’

Alor Zeova ti dir: ‘Ale. Pran sa bann keksoz. Fer tou bann move keksoz ki ou anvi avek Zob. Nou pou vwar si i modi mwan. Selman fer sir ki ou pa touy li.’

Premyerman, Satan ti fer bann zonm vol bef ek bann samo Zob, e zot ti touy son bann mouton. Apre i ti touy son 10 garson ek son bann fiy dan en tanpet. Apre, Satan ti frap Zob avek sa maladi terib. Zob ti pe soufer en kantite. Se pour sa rezon ki son madanm ti dir li: ‘Modi Bondye e mor.’ Me Zob pa ti pou fer sa. Deplis, trwa fo zanmi ti vin kot li e zot ti dir li ki i’n viv en move lavi. Me Zob ti reste fidel.

Sa ti fer Zeova vreman kontan, e apre i ti beni Zob, parey ou kapab vwar dan sa portre. I ti geri son maladi. Zob ti ganny ankor 10 zoli zanfan, e de fwa plis bef, mouton ek bann samo ki i ti annan oparavan.

Eski ou pou touzour reste fidel avek Zeova parey Zob? Si ou pou reste, Bondye pou beni ou osi. Ou pou kapab viv pour touzour kan later antye pou vin zoli parey zarden Edenn.