Bef annor

KI BANN dimoun pe fer la? Zot pe priy avek en bef! Akoz zot pe fer sa?

Lefe ki Moiz ti pe reste lo montanny pour en bon pe letan, bann dimoun ti dir: ‘Nou pa konnen ki’n arive avek Moiz. Alor annou fer en bondye pour gid nou pour nou sorti dan sa pei.’

‘Oke,’ Aaron, frer Moiz ti dir. ‘Retir zot zanno lor, e anmenn kot mwan.’ Kan bann dimoun ti anmennen, Aaron ti fer fonn sa bann zanno e i ti fer en bef annor. E bann dimoun ti dir: ‘Sa i nou Bondye, ki’n fer nou sorti Lezip!’ Apre bann Izraelit ti fer en gran parti, e zot ti ador sa bef annor.

Kan Zeova ti vwar sa, i ti vreman ankoler. Alor i ti dir avek Moiz: ‘Degaze e desann. Bann dimoun pe vreman mal azir. Zot in oubliy mon bann lalwa e zot pe ador en bef annor.’

Moiz ti degaze i ti desann. E kan i ti ariv pros, se sa ki i ti vwar. Bann dimoun ti pe sante e danse otour sa bef annor! Moiz ti vreman ankoler, i ti zet sa de ros plat ki ti annan bann lalwa lo la, e zot ti kas pti bout par pti bout. Apre i ti pran sa bef annor e i ti fer fonn. I ti kraz li anpoud.

Bann dimoun ti’n fer en move keksoz. Alor Moiz ti demann serten zonm pour pran zot sab. Moiz ti dir: ‘Bann move dimoun ki’n ador sa bef annor i bezwen mor.’ Alor sa bann zonm ti touy trwa mil dimoun! Eski sa pa i montre nou ki nou bezwen fer atansyon ki nou ador selman Zeova, e non pa okenn lezot bann fo bondye?