Travers Larivyer Zourden

REGARDE! bann Izraelit pe travers Larivyer Zourden! Me oli delo? Lefe ki en kantite lapli ti tonbe pandan sa letan dan lannen, larivyer ti vreman plen zis en pti pe letan avan. Me aprezan tou delo in ale! E bann Izraelit pe travers lo later sek zis parey zot ti fer kot Lanmer Rouz! Kote tou sa bann delo in ale? Annou vwar.

Kan sa zour ti’n arive pour bann Izraelit travers Larivyer Zourden, par lord Zeova, Zozye ti dir avek bann dimoun: ‘Bann pret i devret pran lars lalyans e mars par devan nou. O moman ki pou zot met zot lipye dan delo Larivyer Zourden, delo pou aret koule.’

Alor bann pret ti pran lars lalyans, e anmenn li par devan bann dimoun. Kan zot ti ariv kot Zourden, bann pret ti antre dan delo san ezite. Delo ti pe koul vreman for e i ti fon. Me dek ki zot lipye ti tous delo, delo ti aret koule! Ti en mirak! Zeova ti fer delo aret koul en sel kou. Alor, en pti moman letan apre ti napa okenn delo dan larivyer!

Bann pret ki ti pe anmenn lars lalyans ti al tou drwat dan milye larivyer ki’n sek. Eski ou kapab vwar zot dan sa portre? Anmezir ki zot ti debout la, bann Izraelit ti travers Larivyer Zourden lo later sek!

Kan tou dimoun ti’n fini traverse, Zeova ti fer Zozye dir avek 12 zonm for: ‘Al dan larivyer kot bann pret pe debout avek lars lalyans. Anmas 12 ros, e met zot an ta kot zot pe reste aswar. Apre, dan lavenir, kan zot zanfan i demann zot ki sa bann ros i sinifye, zot devret dir zot zanfan ki delo ti aret koule kan lars lalyans Zeova ti travers Zourden. Sa bann ros pou rapel zot sa mirak!’ Zozye ti osi met 12 ros kot bann pret ti pe debout dan larivyer.

Anfen Zozye ti ordonn bann pret ki ti pe anmenn lars lalyans: ‘Sorti dan Zourden.’ Apenn ki zot ti’n sorti, larivyer ti konmans koul ankor.