Lanprizonnman an Babilonn ziska rekonstriksyon miray Zerizalenm

Letan ki zot ti an Babilonn konman prizonnyen, lafwa bann Izraelit ti ganny teste plizyer fwa. Sadrak, Mesak ek Abednego ti ganny zete dan en four dife, me Bondye ti retir zot vivan. Plitar, apre ki Babilonn ti’n ganny defet par bann Med ek Pers, Danyel ti ganny zete dan en trou kot ti annan bann lyon, me Bondye ti sov li osi.

Finalman, lerwa Pers, Siris ti liber bann Izraelit. Zot ti retourn dan zot pei zis 70 an apre ki zot ti’n ganny anmennen konman prizonnyen an Babilonn. Kan zot ti ariv Zerizalenm premye keksoz ki zot ti fer se ki zot ti konmans konstri tanp Zeova. Toutfwa, zot bann lennmi pa ti tarde pour aret zot travay. Ti pran zot 22 an pour fini konstri tanp.

Apre nou pou aprann konsernan vwayaz ki Ezra ti fer pour retourn Zerizalenm pour anbelir tanp. Sa ti 47 an apre ki tanp ti’n fini ganny konstri. Trez an plitar, apre vwayaz Ezra, Neemya ti ede pour rekonstrir miray Zerizalenm. Dan sa senkyenm parti nou pou vwar listwar pour 152 lannen.