Dan en lasanm anler dan letaz

APREZAN i Zedi swar, de zour plitar. Zezi ek son douz zapot ti’n vin la dan sa lasanm anler dan letaz pour manz repa Lapak. Sa zonm ki ou vwar pe ale se Zida Iskaryot. I ti pe al dir avek bann pret konman zot pou kapab atrap Zezi.

Son lavey, Zida ti al kot zot e i ti demann zot: ‘Ki zot pou donn mwan si mon ed zot atrap Zezi?’ Zot ti dir: ‘Trant pyes larzan.’ Alor Zida ti pe al kot sa bann zonm afen ki i ti kapab anmenn zot kot Zezi. Eski sa pa i en move keksoz pour fer?

Zot ti fini pran zot repa Lapak. Apre Zezi ti konmans en nouvo repa spesyal. I ti donn son bann zapot en dipen e i ti dir: ‘Manze, sa i reprezant mon lekor ki pou ganny ofer pour zot.’ Apre i ti donn zot en ver diven e i ti dir: ‘Bwar li, akoz sa i reprezant mon disan, ki pou ganny verse pour zot.’ Labib i apel sa ‘repa Senyer.’

Bann Izraelit ti manz repa Lapak pour rapel zot kan lanz Bondye ti ‘pas parlao’ zot lakaz an Lezip, me ti touy tou bann premye ne dan lakaz bann Ezipsyen. Me aprezan Zezi ti oule ki bann ki swiv li i mazin li, e konman ki i’n donn son lavi pour zot. Se pour sa rezon ki i ti demann zot pour selebre sa repa spesyal toulezan.

Apre ki zot ti’n fini manz Repa Senyer, Zezi ti demann son bann zapot pour vin brav e for dan lafwa. Finalman, zot ti sant bann kantik pour Bondye e zot ti ale. Ti’n vreman tar aprezan, petet minwi ti’n sonnen. Annou vwar kote zot ti ale.