En nouvo paradi lo later

GET sa bann gro pye dibwa, sa bann zoli fler ek sa gran montanny. Pa la i zoli? Gete konman sa serf pe manz dan lanmen sa pti garson. Get bann lyon ek bann seval pe debout laba dan laplenn. Eski ou ti a kontan reste dan en landrwa parey sa?

Bondye i oule ki ou viv pour touzour dan en paradi lo later. E i pa oule ki ou annan okenn douler ek soufrans ki dimoun pe gannyen ozordi. Sa se promes ki Labib in fer avek bann dimoun ki pou viv dan sa nouvo paradi: ‘Bondye pou avek zot. Pou nepli annan ni lanmor, ni plere, ni soufrans. Sa bann vye keksoz pou’n disparet.’

Zezi pou fer sir ki sa bann keksoz merveye i arive. Eski ou konnen kan sa pou arive? Wi, apre ki i pou’n tir tou bann move keksoz ek bann move dimoun lo later. Mazinen, ki letan Zezi ti lo later i ti geri bann dimoun ki ti annan tou sort maladi, e i ti menm lev bann ki ti’n mor. Zezi ti fer sa pour montre ki i pou fer lo later antye kan i vin Lerwa rwayonm Bondye.

Zis mazinen konman i pou gou dan sa nouvo paradi lo later! Zezi ansanm avek bann ki i’n swazir, pou dirize dan lesyel. Sa bann dirizan pou pran swen avek tou dimoun lo later e fer sir ki zot ere. Annou vwar ki nou devret fer pour Bondye donn nou lavi eternel dan son nouvo paradi.