SAPIT 13
Akoz En Lavi ki Konform avek Lavolonte Bondye i Aport Boner
1. Akoz nou kapab dir ki gidans Zeova i aport boner?
ZEOVA i en “Bondye ere,” e i oule ki ou rezwir lavi. (1 Timote 1:11, NW) An swivan son semen, ou kapab ganny bann byenfe e eksperyans en lape ki profon e dirab, zis parey en larivyer ki pa zanmen aret koule. Mars dan semen Bondye i osi ensit ou pour kontinyelman fer bann aksyon zis, “parey bann laroul dan lanmer.” Sa i aport vre boner.—Izai 48:17, 18.
2. Konman ki bann Kretyen i kapab ere menm si parfwa zot pa ganny trete byen?
2 Serten i kapab obzekte, ‘Parfwa, dimoun i soufer kan i fer sa ki byen.’ I vre, e se sa ki ti arive avek bann zapot Zezi. Pourtan, kantmenm persekisyon, zot ti rezwir e kontinyen “anons [bon nouvel konsernan] Zezi konman Mesi.” (Akt 5:40-42) Nou kapab tir bann bon leson dan sa. Premyerman, se ki viv an konformite avek lavolonte Bondye pa touzour garanti ki nou pou ganny trete byen. “Dayer” lapot Pol ti ekrir, “tou sa ki oule viv en lavi fidel dan Kris Zezi pou ganny persekite.” (2 Timote 3:12) Rezon pour sa, se ki Satan ek son lemonn i opoz bann ki viv an konformite avek Bondye. (Zan 15:18, 19; 1 Pyer 5:8) Me boner veritab, pa depan lo bann keksoz ki otour nou. I plito vin dan en konviksyon ki nou pe fer sa ki byen, ki fer nou ganny laprouvasyon Bondye.—Matye 5:10-12; Zak 1:2, 3; 1 Pyer 4:13, 14.
3. Ki mannyer ladorasyon pour Zeova i devret afekte lavi en dimoun?
3 I annan dimoun ki krwar ki zot kapab ganny faver Bondye atraver bann akt ladorasyon tanzantan e apre sa zot kapab oubliy li. Me an realite, vre ladorasyon Zeova Bondye i pa koumsa. En vre ladorasyon i devret afekte nou kondwit tou dilon lazournen, zour apre zour e lannen apre lannen. Se pour sa rezon ki i osi ganny apele “Semen.” (Akt 19:9; Izai 30:21) I en fason viv ki konform avek lavolonte Bondye e ki demann nou pour koze, ensi ki azir an armoni avek son Parol.
4. Akoz i dan nou lavantaz pour fer bann sanzman neseser ki konform avek prensip Bondye?
4 Kan bann nouvo etidyan Labib i vwar ki zot bezwen fer serten sanzman dan zot lavi pour fer plezir Zeova, zot kapab demann zot lekor, ‘Eski i vo lapenn viv an konformite avek lavolonte Bondye?’ Sirman i vo lapenn. Akoz nou dir sa? Akoz “Bondye i lanmour,” e kan i ansenny nou dan son fason, i pour nou prop profi. (1 Zan 4:8) Bondye i osi saz e i konnen kwa ki meyer pour nou. Vi ki Zeova i tou pwisan, i kapab donn nou lafors pour rezet en move pratik, afen ki nou a kapab realiz nou dezir pour fer li plezir. (Filipyen 4:13) Annou vwar serten prensip ki nou bezwen swiv pour viv an konformite avek lavolonte Bondye e nou pou vwar konman i aport boner kan nou aplik zot dan nou lavi.
LONNEKTE I EN SOURS BONER
5. Ki Labib i dir konsernan mansonz ek vole?
5 Zeova i “Bondye laverite.” (Psonm 31:5) San dout, ou annan sa dezir pour swiv son legzanp e pour annan repitasyon konman en dimoun onnet. Lonnekte i fer ou ganny respe pour ou prop lekor e i donn ou en santiman satisfaksyon. Toutfwa, parski malonnekte i sitan komen dan sa monn koronpi, i neseser ki bann Kretyen i rapel sa konsey: “Sakenn devre koz laverite avek son prosen . . . Sa ki abitye vole fodre i aret vole e travay pour ganny son lavi dan en fason onnet e osi pour ganny dekwa pour ed bann pov.” (Efezyen 4:25, 28) Bann Kretyen ki anploye, i akonpli onnetman zot zournen travay. Amwen ki zot anployer i donn permisyon, zot pa pran son bann keksoz. Ki swa dan travay, dan lekol oubyen dan lakour, en adorater Zeova i devret touzour ‘onnet dan tou keksoz.’ (Ebre 13:18, NW) En dimoun ki annan labitid pour manti oubyen vole pa kapab ganny faver Bondye.—Deterononm 5:19; Revelasyon 21:8.
6. Ki mannyer lonnekte en dimoun ki atase avek Bondye, i kapab anmenn laglwar pour Zeova?
6 Ler ou onnet, sa i anmenn bokou byenfe. Selina, en vev Afriken ki byen pov, i kontan Zeova ek son bann prensip zis. En zour, i ti anmas en sak ki ti annan en karnen labank ek en bon sonm larzan ladan. I ti servi liv telefonn pour trouv ladres sa propriyeter—en marsan ki ti’n ganny vole. Sa zonm pa ti oule krwar son lizye kan Selina, menm si i ti byen malad, ti rann li vizit pour retourn son sak avek tou son konteni ladan. I ti donn Selina en sonm larzan an dizan: “En lonnekte parey i devret ganny rekonpanse.” Sa ki pli enportan ankor, se ki sa zonm ti felisit larelizyon Selina. Wi, bann akt lonnekte i onor lansennyman Labib, i glorifye Zeova e i aport boner pour son bann adorater onnet.—Tit 2:10; 1 Pyer 2:12.
ZENEROZITE I ANMENN BONER
7. Ki annan mal avek zwe larzan?
7 Bann dimoun ki zenere i ere, tandis ki bann dimoun voras pa pou “erit Rwayonm Bondye.” (1 Korentyen 6:10) En form vorasite ki komen se zwe larzan, ki an realite i en lesey pour fer profi lo pert nou kanmarad. Zeova pa aprouv bann ki “kontan gen malonnet.” (1 Timote 3:8) Menm dan bann landrwa kot lalwa i otoriz bann zwe larzan oubyen menm si en dimoun pe zwe pour plezir, i kapab vin lesklav e menm promot en pratik ki’n rin lavi bokou dimoun. Zwe larzan i souvan anmenn difikilte familyal, dan lesans ki i kapab reste en pti gin larzan pour aste bann nesesite tel ki manze ek lenz.—1 Timote 6:10.
8. Ki legzanp Zezi in donnen lo zenerozite e ki mannyer nou kapab montre nou zenere?
8 Vi ki lanmour ki ensit zot pour donnen, bann Kretyen i zwaye kan zot ed lezot, sirtou zot bann konpanyon ki dan bezwen. (Zak 2:15, 16) Avan ki Zezi ti vin lo later, i ti obzerv zenerozite Bondye anver limanite. (Akt 14:16, 17) Zezi li menm ti donn son letan, son talan e menm son lavi an faver limanite. I ti alor byen kalifye pour dir: “I annan plis lazwa pour donnen ki pour resevwar.” (Akt 20:35) Zezi ti osi koz an byen lo en vev mizer ki ti met de pti kalen dan bwat trezor tanp, e i ti fer li avek tou son leker parski i ti “donn tou sa ki i ti annan pour li viv.” (Mark 12:41-44) Bann Izraelit dan letan lontan ek bann Kretyen premye syek ti manifeste, avek lazwa, en zenerozite egzanpler an servan zot resours materyel pour soutenir kongregasyon ek travay Rwayonm. (1 Kronik 29:9; 2 Korentyen 9:11-14) An plis ki fer bann kontribisyon materyel, bann Kretyen denozour i kontan pour ofer louanz Bondye e dedye zot lavi dan son servis. (Romen 12:1; Ebre 13:15) Zeova i beni zot vi ki zot servi zot letan, lenerzi ek lezot resours konman zot larzan pour soutenir vre ladorasyon e promouvwar sa travay predikasyon lo sa Rwayonm.—Proverb 3:9, 10.
LEZOT SOURS BONER
9. Ki annan mal avek bwar lalkol an ekse?
9 Pour vin ere, bann Kretyen i devret osi ‘gard zot kapasite refleksyon.’ (Proverb 5:1, 2) Alor, zot bezwen lir e medit lo Parol Bondye ek bann piblikasyon biblik ki edifyan. Me i neseser pour evit serten keksoz. Par egzanp, bwar lalkol an ekse i kapab fer en dimoun perdi kontrol lo son kapasite pour reflesir. Anba en tel lefe, bokou dimoun in les zot tonm dan kondwit imoral, vyolan, e menm provok bann aksidan fatal. I pa sirprenan ki Labib i dir ki bann soular pa pou erit Rwayonm Bondye! (1 Korentyen 6:10) Determinen pour reste “rezonnab,” bann vre Kretyen i evite vin sou e sa i ede pour promot boner parmi zot.—Tit 2:2-6.
10. (a) Akoz bann Kretyen pa servi taba? (b) Ki byenfe nou gannyen kan nou aret depann lo bann sibstans danzere?
10 En lekor ki prop i kontribye pour anmenn boner. Pourtan, bokou i vin depandan lo bann sibstans danzere. Par egzanp annou konsider litilizasyon taba. Lorganizasyon Mondyal pour Lasante i raporte ki fimen i “touy trwa milyon dimoun tou le-z-an.” I kapab difisil pour aret fimen akoz bann sentonm tanporer ki ou gannyen kan ou aret konsonm li. Me bokou bann ki’n aret fimen i admet ki zot aprezan annan en lasante pli meyer ek plis larzan pour satisfer bann bezwen familyal. Vreman, kan en dimoun i sirmont sa labitid pour servi taba oubyen lezot sibstans danzere, sa i permet li annan en lekor prop, en konsyans kler ek boner veritab.—2 Korentyen 7:1.
BONER DAN MARYAZ
11. Kwa ki neseser pour annan en maryaz ki legal, onorab e dirab?
11 Bann dimoun ki pe viv ansanm konman mari ek fanm, i devret fer sir ki zot maryaz in ganny byen anrezistre par lotorite sivil. (Mark 12:17) Zot devret osi konsider maryaz konman en responsabilite serye. I vre ki separasyon i kapab neseser dan bann ka kot en partner i volonterman refize siport lot, i sibir labi ekstrenm, oubyen son spirityalite i vreman ganny met an danze. (1 Timote 5:8; Galat 5:19-21) Me dan 1 Korentyen 7:10-19, lapot Pol i ankouraz bann koup pour reste ansanm. Byensir, pour trouv vre boner zot bezwen fidel avek kanmarad. Pol ti ekrir: “Ki maryaz i ganny onore par tou dimoun, [e ki lili maryaz i san tas, NW]. Bondye pou ziz bann ki anmenn en lavi dezordonnen e adilter.” (Ebre 13:4) Sa lekspresyon “lili maryaz” i vedir relasyon seksyel ant en zonm ek en fanm ki’n marye legalman. Tou lezot relasyon seksyel, par egzanp dan ka en zonm ki annan plizyer madanm, pa fer ki “maryaz i ganny onore par tou dimoun.” Deplis, Labib i kondann relasyon seksyel avan maryaz e osi omoseksyalite.—Romen 1:26, 27; 1 Korentyen 6:18.
12. Ki bann move fri ki en kondwit seksyel dezordonnen i aporte?
12 En lavi seksyel dezordonnen i kapab koz enn de pti moman plezir fizik, me i pa anmenn vre boner. I depler Bondye e i kapab kit bann mark lo konsyans en dimoun. (1 Tesalonisyen 4:3-5) Sida ek lezot maladi ki ganny transmet par seks i bann konsekans tris ki en tel kondwit seksyel i kapab les deryer. En rapor medikal i deklare: “I’n ganny estimen ki sak lannen plis ki 250 milyon dimoun i ganny enfekte avek gonore e apepre 50 milyon avek sifilis.” I annan osi problenm lansentman anba laz. Dapre Federasyon Enternasyonal pour Planifikasyon Familyal, plis ki 15 milyon zenn fiy, aze ant 15 a 19 an i tonm ansent sak lannen partou dan lemonn, e en tyer ladan i fer lavortman. Dan en pei Lafrik, en letid i montre ki 72 poursan ka lanmor parmi bann fiy adolesan, i rezilta en konplikasyon lavortman. Serten ki annan relasyon seksyel avan maryaz i kapab sov maladi ek lansentman, me pa bann lefe emosyonnel. Bokou i perdi lestim dan zot e menm zot deteste zot lekor.
13. Ki bann lezot problenm ki adilter i anmennen, e ki sor ki’n ganny rezerve pour bann ki kontinyen komet adilter ek fornikasyon?
13 Kantmenm adilter i kapab ganny pardonnen, i en rezon biblik ki valid pour sa enn inosan kapab divorse. (Matye 5:32; vwar Osea 3:1-5) Kan en maryaz i brize akoz en aksyon imoral, sa i riske afekte en kantite sa konzwen inosan ensi ki son zanfan. Pour dibyen lafanmiy imen, Parol Bondye i fer vwar ki son zizman defavorab pou vin lo bann fornikater ek adilter ki pa repantir. Deplis, i montre klerman ki bann ki pratik limoralite seksyel “pa pou erit Rwayonm Bondye.”—Galat 5:19, 21.
“ZOT PA FER PARTI LEMONN”
14. (a) Ki bann form idolatri bann ki atase avek Bondye i evite? (b) Ki konsey ki ganny donnen dan Zan 17:14 ek Izai 2:4?
14 Bann ki oule fer plezir Zeova e rezwir bann benediksyon ki son Rwayonm pou anmennen, i evit idolatri dan tou son laspe. Labib i fer vwar ki i mal pour fer e ador bann zimaz enkli zimaz Kris oubyen Mari, manman Zezi. (Egzod 20:4, 5; 1 Zan 5:21) Alor, bann vre Kretyen pa ador bann zimaz, lakrwa, ek stati. Zot osi rezet bann lezot form idolatri ki pa tro aparan, tel ki salye paviyon e sant bann lim nasyonal ki glorifye bann pei. Kan lezot i met zot anba presyon pour fer sa bann keksoz, bann Kretyen i mazin parol ki Zezi ti dir avek Satan: “Se Senyer ou Bondye ki ou devre adore e li tousel ki ou devre servi!” (Matye 4:8-10) Zezi ti dir ki son bann disip “pa fer parti lemonn.” (Zan 17:14) Sa i vedir ki zot pa siport oubyen pran par dan okenn zafer politik e zot viv anpe, an konformite avek Izai 2:4, ki dir: “I [Zeova Bondye] pou sertennman rann zizman omilye bann nasyon e i pou remet bann keksoz drwat pour bokou pep. E zot pou bezwen forz zot lepe an pyos e zot lans an sizay. Nasyon pa pou lev lepe kont nasyon e zot pou nepli aprann lager.”
15. Kisisa Gran Babilonn e ki plizyer nouvo etidyan Labib i fer pour sorti dan li?
15 “Pa fer parti lemonn” i egalman sinifye, aret tou lasosyasyon avek “Gran Babilonn,” lanpir mondyal bann fo relizyon. Bann ladorasyon enpir ti orizinalman sorti dan ansyen Babilonn e i’n propaz son lenfliyans spirityel destriktif, lo bann pep partou lo later. “Gran Babilonn” i enkli tou bann relizyon ki zot bann doktrin ek pratik pa an akor avek konnesans Bondye. (Revelasyon 17:1, 5, 15) Bann fidel adorater Zeova pa pou angaz zot dan bann ladorasyon ki partaz lafwa diferan relizyon oubyen antretenir bann relasyon spirityel avek okenn parti “Gran Babilonn.” (Nonm 25:1-9; 2 Korentyen 6:14) Se pour sa rezon ki plizyer dimoun ki pe etidye Labib depi en pe letan, i anvoy en let demisyon pour sa larelizyon ki zot ladan. Sa in anmenn zot pli pre avek sa vre Bondye, ki’n promet: “‘Sorti parmi zot, e separe avek zot,’ Zeova i dir, ‘pa tous okenn keksoz enpir;’ ‘e mon a resevwar zot.’” (2 Korentyen 6:17; Revelasyon 18:4, 5) Ganny aksepte par nou Papa seles! Eski pa sa ki ou vreman anvi?
KONMAN NOU KONSIDER BANN SELEBRASYON ANYEL
16. Akoz bann vre Kretyen pa selebre Nwel?
16 En lavi ki konform avek lavolonte Bondye, i liber nou dan selebrasyon bann lafet sa monn, ki souvan en fardo. Par egzanp, Labib pa revel dat egzakt nesans Zezi. Serten i kapab dir: ‘Mon ti krwar Zezi ti ne le 25 Desanm!’ Sa i enposib vi ki Zezi ti mor an prentan lannen 33 N.L., alaz 33 an edmi. Deplis, letan ki Zezi ti ne, bann berze “ti pas tou lannwit deor pour vey zot troupo mouton.” (Lik 2:8) Me alafen mwan Desanm, an Izrael, i fer fre e i annan bokou lapli, ki fer ki bann mouton ti a bezwen ganny garde dan en landrwa fermen pour protez zot kont lafreser liver. An realite, le 25 Desanm ti ganny rezerve par bann Romen konman dat lanniverser nesans soley ki zot ti konsider konman en bondye. Plizyer syek apre ki Zezi ti lo later, bann fo Kretyen ti adopte sa dat pour selebre lanniverser nesans Kris. Se pour sa, ki bann vre Kretyen pa selebre Nwel oubyen okenn lezot lafet baze lo bann fo krwayans relizye. Parski zot donn Zeova en latasman eksklizif, zot pa obzerv bann lafet, ki rann loner bann imen enparfe oubyen bann nasyon.
17. Akoz bann dimoun ki atase avek Bondye pa selebre lanniverser nesans, e akoz zot bann zanfan i zwaye kantmenm sa?
17 Labib i mansyonn selman de selebrasyon lanniverser nesans, ki ti tou le de ganny obzerve par bann zonm ki pa ti servi Bondye. (Zenez 40:20-22; Matye 14:6-11) Vi ki Lekritir pa revel dat nesans sa zonm parfe, Zezi Kri, akoz ki nou ti a bezwen donn en latansyon spesyal lanniverser bann imen enparfe? (Eklezyast 7:1) Byensir, bann paran Kretyen pa esper en zour partikilye pour montre lanmour zot zanfan. En zenn fiy Kretyen, aze 13 an, ti fer sa remark swivan: “Mwan avek mon fanmiy, nou diverti en kantite . . . Mon byen pros ek mon paran, e kan mon bann kanmarad i demann mwan akoz mon pa partisip dan bann lafet, mon dir zot ki pour mwan sak zour i en lafet.” En lot zenn Kretyen, aze 17 an, i dir: “Dan lakour nou donn kado souvan.” Annefe, i annan plis boner kan ou resevwar bann kado san ekspekte.
18. Ki selebrasyon anyel ki Zezi ti demann son bann disip pour obzerve, e ki sa i fer zot rapel?
18 I annan en zour ki ou devret obzerve si ou pe anmenn en lavi ki konform avek lavolonte Bondye. Sa se repa Senyer ki souvan ganny apele Memoryal lanmor Kris. Konsernan sa levennman, Zezi ti konmann son bann disip: “Fer sa an mon memwar.” (Lik 22:19, 20; 1 Korentyen 11:23-25) Le 14 Nizan lannen 33 N.L., Zezi ti enstitye sa repa an servan dipen san lelven ek diven rouz, ki ti reprezant son lekor imen san pese ek son disan parfe. (Matye 26:26-29) Se bann Kretyen swazir par lespri sen Bondye ki pran sa bann lanblenm. Zot form parti sa nouvo lalyans ek lalyans pour Rwayonm, e zot annan en lespwar pour viv osyel. (Lik 12:32; 22:20, 28-30; Romen 8:16, 17; Revelasyon 14:1-5) Toudmenm, tou bann ki prezan sa swar ki koresponn avek le 14 Nizan lo ansyen kalandriye Zwif, i retir bann byenfe. Sa i fer zot rapel lanmour ki Zeova Bondye ek Zezi Kri in manifeste an donan sa sakrifis ranson ki kouver pese e ki fer lavi eternel posib pour bann ki annan laprouvasyon divin.—Matye 20:28; Zan 3:16.
TRAVAY EK DIVERTISMAN
19. Ki difikilte bann Kretyen i fer fas avek pour ganny zot lavi?
19 Bann vre Kretyen i anba lobligasyon pour travay dir e fourni zot fanmiy avek bann nesesite lavi. Kan sa i ganny akonpli, bann sef lafanmiy i satisfe. (1 Tesalonisyen 4:11, 12) Evidaman, si en Kretyen i annan en lanplwa ki an konfli avek Labib, sa pou fer li perdi son lazwa. I vre ki parfwa i difisil pour ganny en travay ki an armoni avek bann prensip Labib. Par egzanp, serten travayer i ganny demande par zot anployer, pour tronp bann kliyan. Me par kont, plizyer anployer i pare pour fer konsesyon e pour respekte konsyans en travayer onnet, vi ki zot pa anvi perdi en anploye ki diny konfyans. Toutfason, ou kapab asire ki Zeova pou beni ou bann zefor ki ou fer, pour trouv en travay ki permet ou gard ou konsyans kler.—2 Korentyen 4:2.
20. Akoz nou bezwen swazir byen nou bann divertisman?
20 Vi ki Bondye i oule ki son bann serviter i zwaye, nou bezwen balans nou travay avek bann distraksyon ek repo ki rafresisan. (Mark 6:31; Eklezyast 3;12, 13.) Sa monn ki anba pouvwar Satan, i ankouraz bann divertisman ki Bondye pa aprouve. Me pour fer plezir Bondye, nou bezwen byen swazir bann liv ki nou lir, progranm radyo ek lanmizik ki nou ekoute, e pyes teat, konser, film, progranm televizyon, ki nou gete. Si bann divertisman ki nou ti swazir dan lepase, i an dezakor avek sa bann lavertisman ki nou lir dan Deterononm 18:10-12, Psonm 11:5, ek Efezyen 5:3-5, nou a fer plezir Zeova e nou a vin pli ere, si nou fer bann sanzman neseser.
RESPE POUR LAVI EK DISAN
21. Konman respe pour lavi i kapab enfliyans nou pwenn-vi lo lavortman, ensi ki nou bann latitid ek kondwit?
21 Pour konn vre boner, nou bezwen konsider lavi imen konman en keksoz sakre, parey Zeova i vwar li. Son parol pa permet nou pour komet mert. (Matye 19:16-18) An realite, Lalwa ki Bondye ti donn bann Izraelit, i montre ki i konsider en baba dan vant son manman konman en lavi ki presye—non pa en keksoz pour detrir. (Egzod 21:22, 23) Se pour sa ki nou pa devret pran lavi konmsi i en keksoz ki napa valer, an servan taba, abiz nou lekor avek drog ek lalkol oubyen pran bann risk initil. I pa pou byen osi pour nou angaz dan okenn aktivite ki koz en danze pour nou lavi oubyen menm inyor bann prekosyon sekirite ki ti a kapab rann nou koupab pour pran lavi en lot dimoun.—Deterononm 22:8.
22. (a) Ki pwenn-vi Bondye lo disan ek son litilizasyon? (b) Disan lekel ki vreman sov lavi?
22 Zeova ti eksplik Noe ek son fanmiy ki disan i reprezant nanm oubyen lavi. Alor, Bondye ti defann zot pour manz disan. (Zenez 9:3, 4) Vi ki nou bann desandans Noe, alor lalwa i aplik pour nou tou. Zeova ti osi dir bann Izraelit ki zot devret vers disan dan later e ki zot pa devret servi li. (Deterononm 12:15, 16) Lalwa Bondye lo disan ti ganny repete kan bann Kretyen premye syek ti ganny demande pour kontinyen abstenir disan. (Akt 15:28, 29) Akoz zot annan respe pour laspe sakre lavi, bann dimoun ki atase avek Bondye pa aksepte transfizyon disan, menm si lezot i ensiste ki en tel tretman ti a sov zot lavi. Plizyer lezot tretman medikal ki bann Temwen Zeova in prefere pran, in vreman efektiv e deplis, i pa ekspoz en pasyan avek danze ki transfizyon disan i kapab anmennen. Bann Kretyen i konnen ki selman disan Zezi ki ti ganny verse, ki vreman sov lavi. Lafwa dan sa disan, i fer nou ganny pardonnen nou pese e i donn nou lesperans pour viv pour touzour.—Efezyen 1:7.
23. Ki bann byenfe nou gannyen kan nou viv an konformite avek lavolonte Bondye?
23 Evidaman, viv an konformite avek lavolonte Bondye i demann zefor lo nou par. Manm lafanmiy oubyen zanmi i kapab sikann nou. (Matye 10:32-39; 1 Pyer 4:4) Me bann byenfe ki nou gannyen ler nou viv dan en tel fason, i bokou pli gran ki nenport ki difikilte. I donn nou en bon konsyans e osi lakonpanni senn lezot adorater Zeova. (Matye 19:27, 29) E osi, zis imazinen ki ou pe viv pour touzour dan sa nouvo monn zis ki Bondye in promet. (Izai 65:17, 18) E ki lazwa nou resanti kan nou swiv konsey Labib e fer leker Zeova rezwir! (Proverb 27:11) I pa sirprenan alor, ki en lavi ki konform avek lavolonte Bondye i aport boner!—Psonm 128:1, 2.
TESTE OU KONNESANS
Nonm ennde rezon akoz en lavi ki konform avek lavolonte Bondye i anmenn boner?
Ki bann sanzman ki en dimoun ti a bezwen fer, pour viv an konformite avek lavolonte Zeova?
Akoz ou anvi anmenn en lavi ki konform avek lavolonte Bondye?
[Portre lo paz 124, 125]
Bann aktivite spirityel ek bann moman detant byen ekilibre, i ogmant lazwa bann ki viv an konformite avek lavolonte Bondye