SAPIT 19
Ler Konnesans Bondye i Ranpli Later
1, 2. Ki mannyer kreasyon Zeova in arive andomaze?
SIPOZE en gran artis in fek fini konplet en tablo fantastik. Avek tou drwa, i konsider li vreman tre byen—en travay zenyal! Me pandan lannwit, en rival zalou i vin abim sa tablo. Natirelman, sa pou fer sa artis soufer en kantite. Konman i enpasyan pour vwar sa devaster ganny anprizonnen! E ou kapab imazinen ki gran dezir sa artis i annan pour redonn son kreasyon son labote orizinal.
2 Parey sa artis, Zeova ti fer en travay zenyal kan i ti prepar later e met imen lo la. Apre ki i ti’n kree zonm ek fanm, i ti dir ki tou son bann travay i “tre bon.” (Zenez 1:31) Adan ek Ev ti son prop zanfan, e i ti kontan zot. I ti anvizaz en lavenir ere e glorye pour zot. I vre ki Satan ti ensit zot pour rebele, me menm si i’n ganny andomaze, kreasyon merveye Bondye i kapab ganny repare.—Zenez 3:23, 24; 6:11, 12.
3. Kisisa “vre lavi”?
3 Bondye in determinen pour koriz sa sitiasyon. I vreman anvi vwar nou viv parey i ti’n plàn okonmansman. Nou legzistans kourt e trouble i pa sa “vre lavi,” parski i bokou enferyer avek sa ki Zeova ti annan antet. Sa vre lavi ki Bondye ti anvi pour nou i “lavi eternel” dan bann kondisyon parfe.—1 Timote 6:12, 19.
4, 5. (a) Ki mannyer sa lespwar pour Paradi pou ganny realize? (b) Akoz nou devret mazin lo nou lespwar pour lavenir?
4 Konnesans Bondye i anmenn responsabilite devan Zeova. (Zak 4:17) Me mazin sa bann benediksyon ki ou pou gannyen si ou aplik sa konnesans e aspir pour lavi eternel. Dan son Parol, Labib, Zeova Bondye in penn en zoli portre konman lavi pou ete dan Paradi teres, ki vreman pros. Byensir, konman pep Zeova nou pa servi Bondye selman akoz nou anvi en rekonpans. Nou servi li akoz nou kontan li. (Mark 12:29, 30) Deplis, nou pa merit lavi an retour pour nou servis ki nou donn Zeova. Lavi eternel i en don gratwit sorti kot Bondye. (Romen 6:23) I pou benefisye nou pour medit lo en tel lavi akoz lespwar pour Paradi, i rapel nou ki kalite Bondye Zeova i ete—sa enn “ki rekonpans tou bann ki rod li.” (Ebre 11:6) En lespwar ki vreman vivan dan nou lespri e dan nou leker, pou permet siport bann difikilte dan sa monn, gouvernen par Satan.—Zeremi 23:20.
5 Annou aprezan konsantre nou latansyon lo sa lesperans Biblik, pour lavi eternel dan en fitir Paradi lo later. Ki mannyer lavi pou ete ler konnesans Bondye i ranpli later?
APRE ARMAGEDON—EN PARADI TERES
6. Kisisa Armagedon, e ki i vedir pour limanite?
6 Parey nou’n vwar pli boner, Zeova Bondye pou byento detrir sa sistenm mesan aktyel. Lemonn pe rapidman apros sa ki Labib i apel Armagedon. Sa mo i kapab fer serten dimoun mazin en olokos nikleer, koze par bann nasyon ki pe lager me, Armagedon i byen diferan avek sa. Parey Revelasyon 16:14-16 i montre, Armagedon i konba “gran zour Bondye Toupisan.” I en lager ki enplik “bann lerwa lo later abite an antye,” oubyen bann nasyon. Lerwa apwente, ki Garson Zeova Bondye, pou byento antre dan batay Armagedon. Rezilta i totalman asire. Tou sa ki opoz Rwayonm Bondye e tou ki form parti sistenm mesan Satan, pou ganny eliminen. Selman sa bann ki fidel avek Zeova ki pou sirviv.—Revelasyon 7:9, 14; 19:11-21.
7. Kote Satan ek son bann demon pou ete pandan sa Mil An Renny Kris, e konman sa pou benefisye limanite?
7 Imazinen ki ou’n sirviv sa katastrof. Ki mannyer lavi pou ete lo later, dan sa nouvo monn ki Bondye in promet? (2 Pyer 3:13) Nou pa bezwen devinen, parski Labib i dir nou, e sa ki i dir i tre eksitan. Nou aprann ki pandan sa Mil An Renny Zezi Kri, Satan ek son bann demon pou nepli aktif parski zot pou ganny anprizonnen dan en labim, en leta inaktif. Sa bann kreatir mesan e malis pou nepli kekpar dan kasyet, pou koz bann problenm e esey pous nou pour vin enfidel avek Bondye. Pa i pou en soulazman!—Revelasyon 20:1-3.
8, 9. Dan sa nouvo monn, ki pou arive avek bann afliksyon, maladi ek lavyeyes?
8 Avek letan, tou kalite maladi pou disparet. (Izai 33:24) Bann bwate pou kapab debout, marse, taye e danse lo bann lipye an bonn sante e solid. Apre plizyer lannen dan zot monn silans, bann sourd pou antann bann son zwaye otour zot. Bann aveg pou ranpli avek sirpriz kan zot pou dekouver avek zot prop lizye, en monn ris avek kouler e laform. (Izai 35:5, 6) Zot pou anfen trouv figir bann ki zot kontan! Petet apre sa zot vizyon pou brouy en pti gin avek larm lazwa.
9 Zis mazinen! Pou nepli annan linet, bekiy, baton, medikaman, klinik dantis oubyen lopital! Maladi mantal ek depresyon pou nepli priv dimoun lazwa. Napa zanfan ki pou ganny aflize par maladi. Ravaz lavyeyes pou vin lanvers. (Zob 33:25) Nou pou ganny en meyer lasante e vin pli for. Tou le bomaten nou pou leve apre en lannwit byen agreab, ranpli avek lenerzi ek antouzyasm pour konmans en nouvo lazournen plen avek lavi ek travay satisfezan.
10. Ki travay bann sirvivan Armagedon pou antreprann?
10 Pou annan en kantite travay agreab pour bann sirvivan Armagedon fer. Zot pou transform later an en Paradi. Tou bann restan sa vye sistenm polye pou ganny anleve. Bann bidonvil ek bann later abandonnen, pou ganny transformen an bann zarden. Tou dimoun pou annan en lakaz konfortab e agreab. (Izai 65:21) Ofiramezir ki letan i pase, bann rezyon paradizyak pou agrandi e zwenn, ziska ki later antye i ariv sa standar labote ki nou Kreater ti etabli dan zarden Edenn. Pa i pou gou pour donn lanmen fer sa travay restorasyon!
11. Ki relasyon imen pou annan dan lavenir avek lanvironnman ek zannimo?
11 Tousala pou ganny fer anba gidans divin, afen ki lanvironnman pa ava ganny andomaze. Bann imen pou viv anpe avek bann zannimo. Olye touy zot san rezon, zonm ki pou rediriz later dan en fason responsab, pou pran byen swen avek zot. Mazin bann lelou ek mouton, bann lyon ek bef, pe manze ansanm—e bann zannimo domestik dan sekirite total. Menm en pti zanfan pa pou bezwen per bann bebet feros e trankilite sa nouvo monn pa pou ganny enteronpe par bann dimoun kriyel e sovaz. (Izai 11:6-8) I pou vreman en nouvo monn pezib!
LIMANITE I GANNY TRANSFORMEN
12. Konman Izai 11:9 pe ganny lakonplisman ozordi e konman i pou ganny akonpli dan Paradi?
12 Izai 11:9 i dir nou akoz later pa pou ganny andomaze. I dir ki: “Later pou ranpli avek konnesans Zeova parey bann delo i kouver lanmer.” Sa i konsern bann dimoun parski zannimo pa kapab pran “konnesans lo Zeova” e fer bann sanzman, vi ki zot ganny gouvernen par lensten. Me konnesans lo nou Kreater i vreman sanz dimoun. San dout ou’n deza fer bann sanzman ou menm apre ki ou’n aplik konnesans Bondye dan ou lavi. Anfet, plizyer milyon dimoun in fer li. Alor, sa profesi in deza konmans ganny akonpli lo bann ki pe servi Zeova. Toutfwa, i pe osi anons en letan kot dimoun partou dan lemonn antye pou rezet bann tandans zannimo oubyen vyolan, e pou vin pasifik pour touzour.
13. Ki progranm edikasyonnel ki pou ganny met an plas lo later?
13 Konman i pou merveye ler konnesans Bondye i ranpli later! Anba direksyon Lerwa Zezi Kri ek son 144,000 lerwa asosye, en progranm edikasyonnel entans pou ganny met an plas. Bann nouvo “liv” pou ganny servi. Evidaman sa i pou bann lenstriksyon an ekrir, ki pou servi konman en baz pour edik bann zabitan later. (Revelasyon 20:12) Limanite pa pou aprann lager, me lape. Tou bann zarm destriktif pou disparet pour touzour. (Psonm 46:9) Bann zabitan sa nouvo monn pou ganny edike pour tret zot kanmarad avek lanmour, respe ek dinite.
14. Ki mannyer lemonn pou diferan ler limanite pou vin en sel fanmiy ini?
14 Limanite pou vin en sel fanmiy ini. Pou napa okenn baryer pour linite ek fraternite. (Psonm 133:1-3) Lakaz okenn dimoun pa pou bezwen reste take pour anpes voler antre. Lape pou rennyen dan tou leker, dan tou lakour, dan tou kwen lemonn.—Mika 4:4.
REZIREKSYON POU ANMENN BOKOU LAZWA
15. Ki sa de group dimoun ki pou ganny resisite?
15 Pandan sa Mil An, i pou annan rezireksyon. Bann ki’n volonterman fer pese kont lespri sen Bondye, oubyen lafors aktif, an opozan son manifestasyon oubyen son direksyon san repantir, pa pou ganny resisite. (Matye 23:15, 33; Ebre 6:4-6) Byensir se Bondye ki pou deside lekel ki’n fer pese dan sa fason. Me de group dimoun diferan pou ganny resisite—“dimoun bon konman move.” (Akt 24:15) Vi ki tou pou ganny fer dan lord apropriye, i rezonnab pour konklir ki, premye pou ganny akeyir ankor lo later se bann bon dimoun, bann ki’n servi Zeova fidelman.—Ebre 11:35-39.
16. (a) Lekel ki pou parmi bann “dimoun bon” ki pou resisite lo later? (b) Lekel parmi bann fidel dan letan ansyen, ki ou pli anvi zwenn, e akoz?
16 Olye antann nouvel lo lager, maladi ek lanmor, bann serviter Zeova pou resevwar bann rapor merveye lo rezireksyon. I pou eksitan pour aprann retour bann zonm ek fanm fidel tel ki Abel, Enok, Noe, Abraam, Sara, Zob, Moiz, Raab, Rit, David, Eliya, ek Ester. Pa i pou pasyonan pour antann zot raport sa bann fe istorik ek bann detay lo konteks plizyer resi biblik! San dout, zot osi, ansanm avek bann bon dimoun ki’n mor dan bann letan pli resan, zot pou antouzyasme pour aprann lo lafen sistenm Satan e ki mannyer Zeova in sangtifye son non sen e zistifye son souvrennte.
17. Ki lasistans bann fidel pou donn lezot ki pou resisite?
17 Sa bann fidel pou vreman itil pandan sa faz rezireksyon ki pou swiv, kot plizyer bilyon “dimoun move” pou ganny libere dan lanmor. Laplipar imen pa’n ganny en sans pour konn Zeova. Satan ti pe ‘avegle zot lentelizans.’ (2 Korentyen 4:4) Me bann travay Dyab pou ganny efase. Bann enzis pou retourn lo en zoli later pezib. Zot pou ganny akeyir par en pep byen organize, ki pou ansenny zot lo Zeova ek son garson, Zezi Kri, ki pou aktyelman pe rennyen. Ofiramezir ki bann bilyon resisite pou konn e kontan zot Kreater, konnesans Zeova pou ranpli later dan en fason ki pa’n zanmen arive oparavan.
18. Konman ou panse ou pou santi kan ou pou akeyir bann resisite ki ou ti pros avek?
18 Ki kantite lazwa rezireksyon pou anmennen dan nou leker! Lekel ki pa’n soufer akoz nou lennmi lanmor? Annefe, lekel ki pa’n santi zot konpletman brize apre ki serten lyen lanmour ou lanmitye in kase kan maladi, lavyeyes, aksidan oubyen vyolans in pran lavi sa enn ki zot ti kontan? Alor, imazin lazwa pour reini ankor dan Paradi. Bann manman ek papa, garson ek fiy, zanmi ek fanmiy, pou tay dan lebra kanmarad, pe riye e plere avek lazwa.
PERFEKSYON ALAFEN DEFEN!
19. Ki mirak ki pou ganny realize pandan sa Mil An?
19 Diran sa Mil An, en mirak merveye pou ganny realize. Pour bann imen, sa pou petet laspe pli rezwisan dan sa Mil An Renny Kris. Zeova pou ordonn son Garson pour aplik bann byenfe son sakrifis ranson lo sak zonm ek fanm ki fidel e obeisan. Par sa mwayen, tou pese pou ganny anleve e bann imen pou ganny eleve dan perfeksyon.—1 Zan 2:2; Revelasyon 21:1-4.
20. (a) Ki i pou sinifye pour vin parfe? (b) Kan ki bann sirvivan Armagedon ek bann resisite pou konmans viv dan son sans konplet?
20 Perfeksyon! Ki i pou sinifye? I pou sinifye en retour dan sa lavi ki Adan ek Ev ti annan avan ki zot ti fer pese kont Zeova Bondye. Fizikman, mantalman, emosyonnelman, moralman, spirityelman—dan tou fason ki ou kapab mazinen—bann imen parfe pou montre zot plennman konpetan avek bann standar Bondye. Me eski tou dimoun pou parey alors? Pa ditou! Kreasyon Zeova—bann pye dibwa, fler, zannimo—tousala i ansenny nou ki Zeova i kontan varyete. Bann imen parfe pou annan diferan personnalite ek talan. Sakenn pou rezwir lavi parey Bondye ti oule. Revelasyon 20:5 i dir: “Lezot bann mor pa ti [repran vi, NW] ziska ki sa 1000 an ti’n pase.” Parey sa gran lafoul sirvivan Armagedon, bann resisite pou vin konpletman vivan ler zot atenn perfeksyon.
21. (a) Ki pou arive alafen sa Mil An Renny Kris? (b) Ki pou finalman arive avek Satan ek tou bann ki pou lo son kote?
21 Bann imen parfe pou fer fas avek en tes final. Alafen sa Mil An, Satan ek son bann demon pou ganny large dan labim pour en pe letan, e zot pou ganny otorize pour fer en dernyen zefor pour detourn bann dimoun kont Zeova. Serten pou fer move dezir pas avan zot lanmour pour Zeova me sa rebelyon pou dir pour en kourt peryod letan. Zeova pou egzekit sa bann dimoun egois ansanm avek Satan ek tou son bann demon. Tou bann ki pratik sa ki mal pou alor disparet pour touzour.—Revelasyon 20:7-10.
KI OU POU FER?
22. Ki ou anvizaze fer dan Paradi?
22 Pour bann ki kontan Zeova e ki pou viv dan Paradi teres, leternite pou etale devan zot. I difisil pour mazin zot lazwa, e ou osi ou kapab partaz sa. Dan domenn lanmizik, lar, ek lartizana, lakonplisman bann imen parfe pou depas pli zoli travay bann pli gran artis dan sa vye monn! Apre tou, bann imen pou parfe e pou annan letan endefini devan zot. Imazin sa ki ou pou kapab fer konman en imen parfe. Mazin osi sa ki ou ek lezot ou bann konpanyon pou aprann lo kreasyon Zeova—depi bann bilyon galaksi dan liniver ziska bann pli tipti partikil atomik. Tou sa ki limanite pou realize pou rezwir leker Zeova, nou papa lanmour.—Psonm 150:1-6.
23. Akoz lavi dan Paradi pa pou zanmen annwiyan?
23 Lavi pa pou annwiyan. I pou vin deplizanpli enteresan avek letan ki pase. Konnesans Bondye napa limit. (Romen 11:33) Toudilon leternite, pou touzour annan plis pour aprann e nouvo lorizon pour eksplore. (Eklezyast 3:11) E an mezir ki ou kontinyen aprann lo Zeova Bondye, ou pou kontinyen reste vivan—pa zis pour detrwa lannen me pour touzour!—Psonm 22:26.
24, 25. Akoz depi konmela menm ou devret viv an armoni avek konnesans Bondye?
24 En lavenir merveye dan en paradi teres, pa i vo tou zefor ek sakrifis ki ou fer? Byensir! Zeova in ofer ou lakle pour sa lavenir manifik. Sa lakle i konnesans Bondye. Eski ou pou servi li?
25 Si ou kontan Zeova, ou pou vwar li en plezir pour fer son lavolonte. (1 Zan 5:3) Ki kantite benediksyon ou pou gannyen an pourswivan son semen! Si ou aplik konnesans Bondye, ou lavi pou ere menm dan sa monn trouble. E bann fitir rekonpans i imans, parski sa i en konnesans ki anmenn ver lavi eternel! La i sa letan favorab pour ou azir. Determinen pour ou viv an armoni avek konnesans Bondye. Demontre ou lanmour pour Zeova. Onor son non sen e prouve ki Satan i en manter. An retour, Zeova Bondye, Sours vre sazes ek konnesans, pou rezwir pour ou dan son leker ki gran e ranpli avek lanmour. (Zeremi 31:3; Tsefanya 3:17) E i pou kontan ou pour touzour!
TESTE OU KONNESANS
Kisisa “vre lavi”?
Apre Armagedon, ki pou arive lo later?
Lekel ki pou ganny resisite?
Ki mannyer bann imen pou vin parfe e finalman ganny teste?
Ki ou lesperans an rapor avek Paradi?
[Portre lo paz 188, 189]
Eski ou swete viv dan Paradi ler konnesans Bondye pou ranpli later?