Eski i annan en sekre pour en fanmiy ere?

1. Akoz bann bon fanmiy i zwe en rol enportan dan sosyete imen?

FANMIY i pli vye lenstitisyon lo later, e i zwe en rol tre enportan dan sosyete imen. Toudilon listwar, bann bon fanmiy in ede konstri bann bon sosyete. Fanmiy i pli bon laranzman pour elve zanfan e fer zot vin bann adilt matir.

2-5. (a) Dekrir sa sekirite ki en zanfan i santi dan en fanmiy ki ere. (b) Ki difikilte serten fanmiy i rankontre?

² En fanmiy ki ere i konman en proteksyon ek sekirite. Pour en moman, imazin en fanmiy ideal. Aswar, pandan repa, papa ek manman i asiz avek zot zanfan e diskit sa ki’n pase dan lazournen. Bann zanfan i byen kontan pour rakont zot tou sa ki’n arive lekol. Sa bon moman ki zot in pase ansanm, i redonn zot tou lafors pour pas en lot lazournen an deor lakour son lannmen.

³ Dan en fanmiy ki ere, en zanfan i konnen ki son papa ek son manman pou pran swen avek li kan i tonm malad, petet fer sakenn son tour obor son lili tou lannwit. I konnen ki ler i rankontre problenm, i kapab apros son manman ouswa son papa pour resevwar konsey ek sipor. Wi, sa zanfan i santi li an sekirite, kantmenm lemonn i ranpli avek problenm.

⁴ Kan bann zanfan i vin adilt, ordinerman zot marye e annan en fanmiy pour zot menm. En proverb ki sorti dan bann pei Lazi i dir: “Kan ou annan zanfan pour ou menm, se la ki ou realize ki kantite ou dwa ou paran.” Avek rekonesans ek lanmour profon, bann zanfan ki’n vin adilt i esey fer zot prop fanmiy ere. Zot pran swen avek zot paran aze, ki rezwir dan konpanni zot bann pti zanfan.

⁵ Petet a sa staz ou pe panse: ‘Mon kontan mon fanmiy, me i pa parey sa enn ki’n fek ganny dekrir. Mwan avek mon madanm, nou annan diferan ler travay e nou vwar kanmarad apenn. Lamazorite nou konversasyon i baze lo problenm larzan.’ Oubyen ou kapab dir, ‘Mon bann zanfan ek mon bann pti zanfan i reste dan en lot landrwa, e mon pa zanmen vwar zot!’ I vre ki pour bann rezon ki souvan an deor zot kontrol, bokou dimoun napa en lavi fanmiy ki ideal. Me kantmenm sa, serten i annan en lavi fanmiy ki ere. Ki mannyer? Eski i annan en sekre pour ganny en fanmiy ere? Larepons i wi. Me avan ki nou diskite ki sa sekre, nou devret reponn en kestyon enportan.

KISISA EN FANMIY?

6. Ki kalite fanmiy ki nou pou diskit lo la dan sa liv?

⁶ Dan serten pei parey bann pei Lerop, laplipar fanmiy i annan en papa, en manman, ek zanfan. Bann granpapa ek granmanman i kapab reste tousel dan zot prop lakaz osi lontan ki zot kapab. Menm si sa fanmiy i gard kontak avek lezot fanmiy dan lwen, responsabilite anver zot i limite. Anfet, se sanmenm sa kalite fanmiy ki nou pou koz lo la dan sa liv. Toutfwa, dan sa bann dernyen lannen, deplizanpli nou vwar ki lezot kalite fanmiy pe ogmante—fanmiy ki annan zis en paran tousel, bann fanmiy ki annan boper ouswa belmer, e bann ki paran pa pe viv ansanm pour en rezon ou en lot.

7. Ki lot kalite fanmiy ki egziste dan serten pei?

⁷ Dan lezot kiltir, i popiler ki tou manm fanmiy i reste ansanm menm bann granparan oubyen serten fanmiy dan lwen. Dan sa kalite laranzman, si i posib, bann zanfan ek pti zanfan i regilyerman pran swen avek zot paran aze. Zot osi kapab fer sa avek bann fanmiy dan lwen. Par egzanp, bann manm fanmiy i kapab ede pour siport, elve e menm pey ledikasyon zot bann nyes ek neve, oubyen menm lezot fanmiy. Bann prensip ki pou ganny diskite dan sa liv i osi aplik pour sa bann gran fanmiy.

FANMIY I DAN PROBLENM

8, 9. Mansyonn bann problenm ki egziste dan serten pei ki montre ki fanmiy pe sanze?

⁸ Ozordi, fanmiy pe sanze—malerezman, pa pour lemeyer. Par egzanp, dan Lenn, en madanm i kapab viv dan menm lakaz avek fanmiy son mari e travay lanmenm kot lakaz anba lotorite son belmer ek son boper. Toutfwa, denozour, i komen pour bann madanm Endyenn ki’n marye rod travay an deor lakour. Me anmenmtan zot ekspekte ki sa madanm i osi desarz son rol kot lakour. Kestyon ki ganny souleve dan plizyer pei se, Konpare avek lezot manm fanmiy, ki kantite travay en madanm ki anploye i ekspekte fer kot lakour?

⁹ Dan bann pei Lazi, bann bon relasyon dan sa bann gran fanmiy, ki’n ganny mansyonnen pli boner, i en tradisyon. Toutfwa, sa tradisyon pe disparet akoz lenfliyans serten lezot pei ki met lanfaz lo konn zis nou prop lekor, e osi akoz presyon ki bann problenm ekonomik i anmennen. Pour sa rezon, bokou i konsider pran swen avek bann manm fanmiy ki aze konman en fardo olye ki en devwar oubyen en privilez. Serten paran aze i ganny trete dan bann move fason. Annefe, ozordi dan plizyer pei lemonn, bann dimoun aze i ganny maltrete e ganny neglize.

10, 11. Ki bann fe ki montre ki fanmiy pe sanze dan bann pei Lerop?

¹⁰ Divors in vin deplizanpli komen. An Lespanny, depi konmansman bann lannen 1990, lakantite ka divors in ogmante pour vin 1 dan tou le 8 maryaz—ki en gran ogmantasyon ler ou pran kont ki zis 25 an avan i ti 1 dan tou le 100 maryaz. Langleter, ki paret annan plis kantite ka divors dan Lerop (4 dan 10 maryaz i ekspekte kase), in eksperyans en ogmantasyon souden dan lakantite fanmiy ki annan zis en paran tousel.

¹¹ An Lalmanny, bokou dimoun i paret pe abandonn valer fanmiy tradisyonnel. Dan bann lannen 90, 35 poursan bann lakour ti annan selman en dimoun ladan e 31 poursan ti annan zis de dimoun. Bann Franse osi i marye mwens, e sa bann ki marye i divors pli souvan e pli boner ki oparavan. En gran kantite dimoun i prefere viv ansanm san pran bann responsabilite maryaz. Nou kapab trouv sa bann tandans partou dan lemonn.

12. Konman ki zanfan i soufer akoz sanzman dan fanmiy konmela?

¹² Ki pe arive avek bann zanfan? An Letazini ek bokou lezot pei, en gran kantite zanfan i ne an deor maryaz. Serten zot, zot paran i bann zenn adolesan. Bokou zenn fiy adolesan i annan zanfan ki annan diferan papa. Dapre rapor sorti partou dan lemonn, plizyer milyon zanfan ki napa landrwa reste pe ale vini lo semen; bokou pe sov bann lakour kot zot ganny abize oubyen zot in ganny pouse par bann fanmiy ki nepli kapab sonny zot.

13. Ki bann problenm komen ki anpes en fanmiy ere?

¹³ Wi, fanmiy i dan kriz. Deplis, rebelyon bann adolesan, labi zanfan, vyolans domestik, lalkolism, ek lezot problenm enkyetan i anpes bokou fanmiy annan en lavi ere. Pour plizyer zanfan ek adilt, fanmiy i nepli en landrwa sekirite.

14. (a) Dapre serten, pour ki rezon fanmiy pe pas dan kriz? (b) Konman ki en avoka premye syek ti dekrir sa lemonn ki nou pe viv ladan, e ki lefe lakonplisman son parol i annan lo lavi fanmiy?

¹⁴ Akoz fanmiy i dan en kriz? Serten dimoun i dir ki sa kriz i egziste denozour akoz bann madanm in antre dan lemonn travay. Lezot i dir i akoz degradasyon moral ki egziste ozordi e plizyer lezot lakoz in osi ganny site. Preski de mil an pase, en avoka byen renonmen ti predir ki bokou presyon pou afekte fanmiy, kan i ti ekrir: “Dan bann dernyen zour pou annan letan difisil. Parski zonm pou vin egois, kontan larzan, vantar, arogan zot pou koz kont Bondye, dezobeisan anver zot paran, engra, mank respe pour keksoz sen, zot pou annan leker dir, san pitye, kalomni zot prosen, vyolan, kriel, lennmi sa ki fer dibyen; zot pou tret, annan karakter vif, anfle avek lorgey, kontan plezir plis ki Bondye.” (2 Timote 3:1-4) Lekel ki pou doute ki sa bann parol pe ganny akonpli ozordi? Dan en lemonn ki dan bann kondisyon koumsa, eski nou etonnen ki bokou fanmiy pe pas dan en kriz?

SEKRE POUR EN FANMIY ERE

15-17. Dapre sa liv, kote nou kapab trouv sa sekre pour en fanmiy ere?

¹⁵ Konsey lo konman pour trouv boner dan lavi fanmiy i ganny ofer partou kote. Dan bann pei parey bann pei Lerop, i annan bokou bann liv ki donn lenstriksyon ek konsey pratik, ensi ki bann magazin ki ofer konsey. Problenm se ki bann konseye imen i kontredir kanmarad, e konsey ki akseptab ozordi i kapab pa efikas demen.

¹⁶ Kote alor, nou kapab trouv gidans solid pour lavi fanmiy? Eski ou pare pour egzamin en liv ki’n ganny konplete apepre 1,900 an pase? Oubyen eski ou santi ki en liv koumsa i definitivman nepli itil? Me an realite, vre sekre pour en fanmiy ere i trouve dan sa sours.

¹⁷ Sa sours i Labib. Dapre tou levidans, i’n ganny enspire par Bondye li menm. Ladan, nou vwar sa deklarasyon: “Tou Lekritir i enspire par Bondye e i itil pour ansennyen, pour koriz lerer, pour remet drwat, e pour formen pour viv byen selon Bondye.” (2 Timote 3:16) Dan sa liv nou pou ankouraz ou pour vwar konman Labib i kapab ed ou pour “remet drwat” keksoz kan ou pe tret problenm ki bann fanmiy pe rankontre denozour.

18. Akoz i rezonnab pour aksepte Labib konman sa lotorite pour donn konsey dan lavi maryaz?

¹⁸ Si ou annan sa tandans pour rezet sa lide ki Labib i kapab itil pour fer bann fanmiy ere, reflesir lo sa: Sa Enn ki’n enspir Labib i Loter maryaz. (Zenez 2:18-25) Labib i dir ki son non i Zeova. (Psonm 83:18) I Kreater e sa ‘Papa ki donn tou fanmiy son non.’ (Efezyen 3:14, 15) Zeova in obzerv lavi fanmiy depi ler imen in ganny kree. I konn bann difikilte ki kapab arive e i’n donn konsey pour rezourd zot. Toudilon listwar, bann dimoun ki’n senserman aplik prensip Labib dan zot lavi fanmiy in ganny en lavi fanmiy pli ere.

19-21. Ki bann leksperyans denozour ki montre ki Labib i annan pouvwar pour rezourd bann problenm dan maryaz?

¹⁹ Par egzanp, en manman an Lendonezi ti’n adik avek zwe larzan. Pour bokou lannen, i ti negliz son trwa zanfan e tanzantan dispit avek son mari. Apre, i ti konmans etidye Labib. Ptit-a-pti sa madanm ti arive krwar sa ki Labib i dir. Kan i ti aplik bann konsey Labib, i ti vin en pli bon madanm kot son lakour. Son bann zefor, ki ti baze lo bann prensip Labib, ti kontribye pour fer son fanmiy ere.

²⁰ En manman an Lespanny ti dir: “Zis apre enn an maryaz nou ti konmans ganny bann problenm serye.” Li avek son mari pa ti annan bokou keksoz an komen, zot pa ti koz bokou avek kanmarad, eksepte kan zot ti pe dispit. Menm si zot ti annan en pti fiy, zot ti deside pour separe. Avan ki sa ti arive, zot ti ganny ankouraze pour etidye Labib. Zot ti etidye bann konsey Labib pour bann zonm ek fanm marye e aplik zot. Pa bokou letan apre, zot ti konmans koz anpe avek kanmarad, e zot pti fanmiy ti ini dan lazwa.

²¹ Labib i osi ed bann dimoun en pe pli aze. Par egzanp, reflesir lo leksperyans en koup Zaponnen. Sa mari ti ankoler vitman e parfwa vyolan. Okonmansman, bann fiy sa koup ti konmans etidye Labib, kantmenm zot paran ti opoze. Apre, sa mari ti zwenn ansanm avek son bann fiy, me sa madanm ti kontinyen opoze. Toutfwa, anmezir ki lannen ti pase, sa madanm ti remark bon lefe ki prensip Labib ti fer lo son fanmiy. Son bann fiy ti pran byen swen avek li, e son mari ti vin pli kalm. Sa bann sanzman ti motiv sa madanm pour li osi egzamin Labib, ki ti fer menm lefe lo li. Souvan sa madanm aze ti dir: “Nou’n vin en vre koup marye.”

22, 23. Ki mannyer Labib i ed bann dimoun tou sort nasyonalite pour trouv lazwa dan zot lavi fanmiy?

²² Sa bann dimoun i parmi sa gran kantite ki’n aprann sa sekre pour annan en fanmiy ere. Zot in aksepte e aplik konsey Labib. I vre ki zot viv dan sa menm lemonn ki annan presyon ekonomik, vyolans, imoralite, parey tou lezot dimoun. Deplis zot enparfe, me zot ere kan zot esey akonpli lavolonte Loter fanmiy. Parey Labib i dir, Zeova Bondye i “sa Enn ki pe ansenny ou pour ou prop profi, sa Enn ki pe fer ou mars lo sa semen lo ki ou devret marse.”—Izai 48:17.

²³ Kantmenm Labib ti ganny konplete preski de mil an pase, son bann konsey i vreman azour. Deplis, i’n ganny ekrir pour tou dimoun. Labib pa en liv Ameriken oubyen Eropeen. “Apartir en sel zonm,” Zeova in “kree tou sa bann nasyon dan lemonn,” e I konnen ki mannyer imen i ete partou lo later. (Akt 17:26) Bann prensip Labib i efikas pour tou dimoun. Si ou aplik zot, ou osi ou pou konn sa sekre pour annan en fanmiy ere.